មនុស្សមួយចំនួនជ្រើសរើសវិធីសាស្រ្តរាំទៅតាមរបៀបរបស់ពួកគេ ដូចជារាំតាមចង្វាក់ភ្លេងដែលត្រូវនឹងចំណូលចិត្តតាមរយៈម៉ាស៊ីនចាក់ភ្លេង ឬតាមរយៈវិទ្យុផ្សាយ។ ចំណែកមួយចំនួនទៀតចូលចិត្តរាំតាមក្បាច់ដូចជារាំញាក់ស្មារនិងដងខ្លួន ឬទៅតាមលំនាំផ្លូវការជាដើម ហើយពេលខ្លះទៀតពួកគាត់ចូលហាត់រាំតាមរយៈបណ្តុះបណ្តាលក្នុងតំបន់ដែលគាត់រស់នៅ។ មិនថាចំណូលចិត្តរបស់អ្នកគឺជាការរាំបែបណាឡើយ ឱ្យតែអ្នកអាចអនុវត្តន៍បានជាប្រចាំ សកម្មភាពទាំងនោះនឹងផ្តល់ផលវិជ្ជមានទៅកាន់សុខភាពរបស់អ្នក។

យោងតាម គេហទំព័រ verywellmind ការរាំមិនត្រឹមតែជំរុញឱ្យរាងកាយរស់រវើកប៉ុណ្ណោះទេ ប៉ុន្តែវាក៏ជាវិធីក្នុងការបញ្ចេញអារម្មណ៍មកក្រៅផងដែរ ដោយហេតុថាពេលរាំជំរុញឱ្យកាឡូរីត្រូវបានដុតកម្ដៅ ថែមទាំងធ្វើឱ្យរាងកាយកាន់តែស្វាហាប់។

ជាងនោះទៅទៀត រាំត្រូវបានគេចាត់ទុកថា ជាវិធីសាស្រ្តហាត់ប្រាណប្រកបដោយភាពច្នៃប្រតិដ្ឋ និងទទួលបានអត្ថប្រយោជន៍ជាច្រើនចម្រុះផ្សេងៗគ្នា។ ទន្ទឹមគ្នានោះរាំជួយសម្រួលដល់ប្រព័ន្ធដំណើរការខួរក្បាលឱ្យមានភាពប្រសើរជាមុនផងដែរ ជាពិសេសអនុវត្តការរាំ ក្រោយពេលដែលលោកអ្នកសម្រាកពីកាតព្វកិច្ចនានា ដូចជាការចំណាយពេលជាមួយសមាជិកគ្រួសារ និងការងារដែលមានភាពតានតឹង ការគិតស្មុគស្មាញ បើពុំបានប្រើប្រាស់វិធីក្នុងការរំសាយអារម្មណ៍អវិជ្ជមានទេ នោះវានឹងនាំឱ្យមនុស្សចាប់ផ្តើមនិយាយពាក្យអវិជ្ជមានទៅកាន់ខ្លួនឯងជារឿយៗ ដូច្នេះហើយបានជាការរាំវាសំខាន់ ព្រោះវាអាចរារាំងការគិតអំពីអកប្បកិរិយាមិនល្អទាំងនោះ ជំនួសមកវិញនូវការកម្សាន្ត ហើយជួយដល់សុខភាពទាំងផ្លូវចិត្ត និងផ្លូវកាយ។

ជាការអធិប្បាយដោយសង្ខេប សុខភាពផ្លូវចិត្តនឹងពង្រឹងបានពីការរាំមានដូចជា រក្សាចិត្តឱ្យនឹងធឹង មានការគោរពចំពោះខ្លួនឯង មានជំនាញសង្គម បង្កើនភាពរីករាយ ងាយក្នុងការបង្កើតទំនាក់ទំនងជាមួយអ្នកដទៃ ជួយឱ្យអារម្មណ៍ល្អ កាត់បន្ថយភាពឯកោរនិងភាពតានតឹង បន្ថយទម្លាប់មិនល្អ អភិវឌ្ឍន៍ការចងចាំ ការពារពីជំងឺវង្វេង និងកាត់បន្ថយភាពសៅហ្មងដែលកប់ទុកបានមួយចំនួន។

ដោយឡែកអត្ថប្រយោជន៍ពីការរាំ ចំពោះសុខភាពរាងកាយវិញគឺ ជួយសម្រួលសាច់ដុំ ឬពង្រឹងសាច់ដុំឱ្យរឹងមាំ កាត់បន្ថយអាការៈបេះដូងលោតខុសចង្វាក់ ជួយឱ្យសួតមានសុខភាពល្អ ប្រព័ន្ធសរសៃឈាមមានដំណើរការល្អ កាយសម្បទារឹងមាំ ឥរិយាបថងាយស្រួលក្នុងការផ្លាស់ប្តូរនិងមានភាពបត់បែន បង្កើនភាពរហ័សរហួន ជួយឱ្យឆ្អឹងរឹងមាំ កាត់បន្ថយជំងឺពុកឆ្អឹង គ្រប់គ្រងទម្ងន់រាងកាយឱ្យមានតុល្យភាពស្របនឹងតម្រូវការ ថែមទាំងបង្កើនភាពអត់ធ្មត់។

មានមនុស្សមួយចំនួនខ្មាសអៀនមិនហ៊ានរាំ ហើយពិបាកក្នុងការសាកល្បង ព្រោះបារម្ភថា ខ្លាចនឹងមើលទៅមិនសមទំនង ខ្លាចគេសើចចំអកតាមរយៈស្ទិល ប្លែកៗ របស់ខ្លួន ជារួមខ្លាចកែវភ្នែកនិងការគិតរបស់អ្នកដទៃផ្តោតមកខ្លួនកំឡុងពេលរាំ។ ប៉ុន្តែអ្នកត្រូវដឹងថា ក្នុងបរិយាកាសរង្វង់រាំ កម្រនឹងមានអ្នកចាប់អារម្មណ៍មកលើអ្នកណាស់ ដោយមនុស្សម្នាក់ៗចាប់អារម្មណ៍តែការបញ្ចេញក្បាច់រាំរៀងៗខ្លួនដើម្បីជាការកម្សាន្ត ឬការហាត់។ ហើយបើអ្នកនៅតែមិនហ៊ានរាំទេ អ្នកអាចចាប់ផ្តើមដោយការរាំម្នាក់ឯង រាំក្នុងទីតាំងមានផាសុកផាព រាំជាមួយមនុស្សជិតស្និត ឬក៏ទៅរាំនៅកន្លែងដែលមានទទួលបង្ហាត់បង្រៀនដើម្បីបង្កើនទំនុកចិត្តក្នុងការរាំ និងពង្រឹងបាននូវសុខភាពល្អស្ទើរតែគ្រប់ផ្នែកនៃរាងកាយ៕