ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ និងបណ្ដុះបណ្ដាលវៀតណាម បានស្នើថា សាលារៀននៅទូទាំងប្រទេស ត្រូវចាប់ផ្ដើម បង្រៀនភាសាឡាវ ចាប់ពីឆ្នាំ២០២៦ ហើយបន្ទាប់មកទៀត គឺភាសាខ្មែរ ថៃ និងឥណ្ឌូនេស៊ី, នេះបើយោងតាមសារព័ត៌មាន VN Express។
ជាផ្នែកមួយនៃកម្មវិធីបង្រៀនភាសាបរទេសនៅចន្លោះឆ្នាំ២០២៦ ដល់ ២០៣៥ ដែលបានប្រកាសកាលពីសប្ដាហ៍មុន ក្រសួងអប់រំវៀតណាមគ្រោងនឹងបញ្ចូលភាសាខ្មែរ ក្នុងកម្មវិធីសិក្សានៅឆ្នាំ២០២៨ និងភាសាថៃ និងឥណ្ឌូនេស៊ីនៅឆ្នាំ ២០៣០ ដើម្បីជួយអនុវត្តកិច្ចព្រមព្រៀង ដែលវៀតណាមមានជាមួយប្រទេសជិតខាង។
រដ្ឋមន្ត្រីក្រសួងអប់រំ លោក Nguyen Kim Son បានលើកឡើងអំពីផែនការ ដាក់បញ្ចូលភាសាឡាវ គឺក្រោយពីមានជំនួបពិភាក្សាកាលពីដើមខែមិថុនា ជាមួយលោក Khamphao Ernthavanh ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាធិបតេយ្យប្រជាមានិតឡាវប្រចាំនៅវៀតណាម។
ការសាកល្បងដំបូង នឹងត្រូវធ្វើឡើងក្នុងតំបន់ជាប់ព្រំដែនឡាវ និងពង្រីកនៅពេលដែលមានគ្រូបង្រៀនគ្រប់គ្រាន់។ ប្រទេសវៀតណាម មានសិស្សច្រើនជាង ១៤លាននាក់ចាប់ពីថ្នាក់ទី១ ដល់ទី១២ ហើយជម្រើសភាសាបរទេស របស់ពួកគេ រួមមាន ភាសាអង់គ្លេស រុស្ស៊ី បារាំង ចិន អាល្លឺម៉ង់ ជប៉ុន និងកូរ៉េ។
ភាសាអង់គ្លេស ត្រូវបានបង្រៀននៅគ្រប់ខេត្ត-ក្រុង ហើយតំបន់ចំនួន ៤០ ក្នុងចំណោម ៦៣ ត្រូវបានបញ្ចូលគ្នាទៅជា ៣៤ ចាប់តាំងពីខែកក្កដា ក៏ផ្ដល់នូវវគ្គបង្រៀនភាសាអង់គ្លេសផងដែរ។ បន្ទាប់ពីភាសាអង់គ្លេស ភាសាបារាំង គឺជាភាសា ដែលមានចំនួនសិស្សរៀនច្រើនជាងគេ ក្នុងនោះមានចំនួន ៣០,៧០០នាក់ បន្ទាប់មកគឺជប៉ុន មាន ២០,៨០០នាក់ និងចិន មាន ១៤,៤០០នាក់។
ចំនួននេះ រួមមានសិស្ស ដែលបានចុះឈ្មោះក្នុងកម្មវិធី៧ និង១០ឆ្នាំ ហើយអ្នកដែលសិក្សាភាសាបរទេសទី២ និងអ្នកដែលសិក្សានៅក្នុងកម្មវិធីសិក្សាសាកល្បង។
ដើម្បីបង្កើនចំនួនការសិក្សាភាសាបរទេស ក៏ដូចជាបង្រៀនមុខវិជ្ជាមួយចំនួន ជាភាសាបរទេស ក្រសួងអប់រំវៀតណាម នឹងបង្កើនចំនួនគ្រូបង្រៀនភាសាបរទេសបន្ថែមទៀត រួមទាំងអ្នកនិយាយភាសាដើម។ ក្រៅពីមានគោលដៅលើកកម្ពស់ ការប្រើប្រាស់បច្ចេកវិទ្យា និងវេទិកាបញ្ញាសិប្បនិម្មិតផងដែរ៕
