ក្រសួងអប់រំ យុវជន និងកីឡា នឹងបង្កើនសាលារៀនជំនាន់ថ្មី ចំនួន ៨ បន្ថែមទៀត សម្រាប់ឆ្នាំសិក្សាថ្មីនេះ ពោល​គឺចាប់ផ្ដើមពីថ្ងៃទី១ ខែវិច្ឆិកា ឆ្នាំ២០២៥ខាងមុខ​។

លោកជំទាវបណ្ឌិត ឃួន វិច្ឆិកា អ្នកនាំពាក្យ​ក្រសួងអប់រំ យុវជន និងកីឡា មានប្រសាសន៍ថា សម្រាប់ឆ្នាំសិក្សាថ្មី ក្រសួងអប់រំ បានឯកភាពបង្កើតសាលារៀនជំនាន់ថ្មីចំនួន ៨បន្ថែមទៀតទាំងនៅរាជធានីភ្នំពេញ និងតាមបណ្ដាខេត្តមួយចំនួន។ បើតាម​លោកជំទាវ ឃួន វិច្ឆិកា សាលារៀនដែលនឹងវិវត្តខ្លួនទៅជាសាលារៀនជំនាន់ថ្មី រួមមាន វិទ្យាល័យ នេតយ៉ង់ ខេត្តបាត់ដំបង, វិទ្យាល័យហ៊ុនសែន ស្គន់ ខេត្តកំពង់ចាម, វិទ្យាល័យ ហ៊ុនសែន សេរីភាព, វិទ្យាល័យ សម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ដើមឬស ខេត្តកណ្ដាល, វិទ្យាល័យព្រះយុគន្ធរ រាជធានីភ្នំពេញ, វិទ្យាល័យសម្ដេចឪសម្ដេចម៉ែ ខេត្តរតនគីរី វិទ្យាល័យស្វាយរៀង និងវិទ្យាល័យ ហ៊ុនសែន ប្រសូតិ ខេត្តស្វាយរៀង។

សាលារៀនជំនាន់ថ្មីទាំង៨នេះ ក្រសួងអប់រំគ្រោងចំណាយថវិកាប្រមាណ ៤លានដុល្លារសម្រាប់រយៈពេល ៤ឆ្នាំ ដោយប្រើប្រាស់ថវិកាគម្រោង STEP UP របស់ធនាគារអភិវឌ្ឍអាស៊ី។

អ្នកនាំពាក្យក្រសួអប់រំបញ្ជាក់ថា ការបង្កើតសាលារៀនជំនាន់ថ្មីចំនួន៨បន្ថែមទៀត គឺដោយសារគុណភាព និងភាពល្បីល្បាញរបស់សាលារៀនជំនាន់ថ្មី ដែលធ្វើឱ្យសិស្សានុសិស្ស ក៏ដូចជាអាណាព្យាបាលជាច្រើនចង់បញ្ជូនកូនមករៀន។ ខណៈសិស្សានុសិស្សដែលចង់ចូលរៀននៅសាលារៀនជំនាន់ថ្មី ត្រូវប្រឡងជាមុនសិន ដើម្បីឱ្យការជ្រើសរើសទទួលយកបាន មានតម្លាភាព ហើយផ្ដល់យុត្តិធម៌សម្រាប់គ្រប់គ្នា។

លោកជំទាវបណ្ឌិត ឃួន វិច្ឆិកា បន្ថែមថា ការវិវត្តប្រែក្លាយពីសាលារៀនធម្មតា ទៅជាសាលារៀនជំនាន់ថ្មីនេះ ពុំមែនគ្រប់សាលារៀន អាចទទួលបានសិទ្ធិក្នុងការបង្កើតនោះទេ។ ពោលសាលារៀនត្រូវដាក់ពាក្យស្នើសុំ និងត្រូវឆ្លងកាត់ការត្រួតពិនិត្យវិនិច្ឆ័យច្បាស់លាស់។ ក្នុងនោះចំណុចសំខាន់បំផុត រួមមាន ទី១. គណៈគ្រប់គ្រងសាលា និងគ្រូបង្រៀនត្រូវតែស្ម័គ្រចិត្ត ហើយរីករាយរួមគ្នាចង់ក្លាយជាសាលារៀនជំនាន់ថ្មី ទី២. មានការគាំទ្រពីសហគមន៍ ដៃគូរួចជាស្រេចក្នុងការទ្រទ្រង់សាលារៀន ទាំងស្មារតី ក៏ដូចជាធនធាននានា ទី៣. អភិបាលកិច្ច និងទី៤. សមត្ថភាពគ្រូបង្រៀន។

ដោយឡែកសម្រាប់គ្រូបង្រៀន ដែលនឹងត្រូវ​ជ្រើសរើស​សម្រាប់សាលារៀនជំនាន់ថ្មី បើតាមអ្នកនាំពាក្យក្រសួអប់រំ សម្រាប់ឆ្នាំនេះ ក្រសួងអនុវត្តការជ្រើសរើសគ្រូបង្រៀនដែលមកង្រៀននៅសាលារៀនជំនាន់ថ្មី ដោយ​ត្រូវតែប្រឡងជាប់ក្របខណ្ឌរដ្ឋ ហើយបង្រៀនសាលានៅក្នុងខេត្តណា គឺត្រូវតែជាបុគ្គលិកនៅក្នុងខេត្តនោះដូចគ្នា ព្រមទាំងមិនប៉ះពាល់ដល់សាលាដែលខ្លួនបានចាកចេញ និងត្រូវបំពេញតាមគុណវុឌ្ឍដែលក្រសួងបានកំណត់។

ពាក់ព័ន្ធនឹង​ការពង្រឹងគុណភាពសាលារៀននៅ​កម្ពុជាវិញ បើតាម​លោកជំទាវបណ្ឌិត ឃួន វិច្ឆិកា មិនមែនមានតែសាលារៀនជំនាន់ថ្មីទេដែលកំពុងខិតខំប្រឹងប្រែង ក្នុងនោះមានសាលារៀនគំរូ និងសាលារៀននានាទូទាំងប្រទេស ក៏កំពុងខិតខំប្រកួតប្រជែងគ្នាយ៉ាងស្វិតស្វាញ ដើម្បីក្លាយជាសាលាស្តង់ដាគំរូទាំងអស់គ្នា។

គួរជំរាបជូនថា បច្ចុប្បន្នសាលារៀនជំនាន់ថ្មី នៅប្រទេសកម្ពុជាមានចំនួន ១៤សាលារៀន ដែលកំពុងដំណើរការ។ ដោយឡែក​សាលារៀនដែល​ជាប់ជាស្តង់ដាសាលារៀនគំរូមានចំនួន ២៥០សាលា, សាលារៀនគំរូទាំងនេះ ត្រូវអនុវត្ត​ស្តង់ដាដូចជា មានការពង្រឹងអភិបាលកិច្ចសាលារៀន ការពិនិត្យកែ​សម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្រប ទៅតាមតម្រូវ​ការក្នុងការពង្រឹងចំណេះដឹង៕