ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បច្ចុប្បន្នបណ្តាញសង្គមបានក្លាយជាផ្នែកមួយដ៏សំខាន់នៃជីវិតប្រចាំថ្ងៃរបស់យើង ទាំងសម្រាប់ការទំនាក់ទំនង ការងារ និងការកម្សាន្ត។ ប៉ុន្តែ ការប្រើប្រាស់វាច្រើនពេកអាចបង្កជាបញ្ហាផ្លូវចិត្ត និងបាត់បង់ពេលវេលាផ្ទាល់ខ្លួន។ តើគេត្រូវកត់សម្គាល់បែបណា ដើម្បីដឹងថា ទម្លាប់នៃការប្រើប្រាស់បណ្តាញសង្គមរបស់អ្នកកំពុងប៉ះពាល់ដល់ផលិតភាព និងការរស់នៅប្រចាំថ្ងៃ?
តាមរយៈគេហទំព័រ Calm បានបង្ហាញអំពីសញ្ញា និងការកត់សម្គាល់ ក្នុងការតាមដានខ្លួនឯងនៅពេលមានអាការអវិជ្ជមានមួយចំនួនកើតឡើងដូចខាងក្រោម ៖
អារម្មណ៍មិនស្រណុកប្រៀបធៀបនឹងការរស់នៅរបស់អ្នកដទៃ ៖ ប្រសិនបើម្តងម្កាលមានអារម្មណ៍ច្រណែននឹងការរស់នៅរបស់អ្នកដទៃ វាពុំបានចោទជាបញ្ហាធំដំនោះទេ ប៉ុន្តែបើកើតមានជារឿយៗគួរមានការប្រុងប្រយ័ត្ន និងរកវិធីដោះស្រាយ។ បណ្តាញសង្គមអាចថា ជាចំណោទបញ្ហាមួយដែលជំរុញឱ្យមនុស្សតាមដានសាច់រឿងចម្រុះពីមជ្ឈដ្ឋានខាងក្រៅ មានរឿងខ្លះពិត ហើយមានសាច់រឿងខ្លះប្រឌិត ប៉ុន្តែទោះចង់ ឬមិនចង់ វាបានរុញច្រានឱ្យអ្នកតាមដានទទួលរងនូវឥទ្ធិពល ក៏ដូចជាចាប់ផ្តើមមិនពេញចិត្តជាមួយនឹងការរស់នៅរបស់ខ្លួនឯង ដែលនេះក៏ជាសញ្ញាមួយប្រាប់ថា គួរតែប្តេជ្ញា ឬក៏បង្កើតទម្លាប់កាត់បន្ថយ ឬក៏កាត់ផ្តាច់ពីការប្រើប្រាស់បណ្តាញសង្គមមួយរយៈ។
បណ្តាញសង្គមមួយចំនួន ឬមាតិកាមួយចំនួនបង្កើតឡើង ដើម្បីជំរុញឱ្យមនុស្សញៀននឹងការប្រើប្រាស់ ក៏ដូចជាការទទួលយក និងជឿជាក់ទៅលើអ្វីដែលបានបង្ហាញនៅក្នុងកម្មវិធីទាំងនោះ យ៉ាងណាក៏ដោយអ្នកគួរដឹងថា សាច់រឿងដ៏ខ្លីៗដែលបានបង្ហាញ វាពុំបានឆ្លុះបញ្ចាំងពីសាច់រឿងទាំងស្រុងនៃការរស់នៅនោះទេ។
ជួបប្រទះទៅលើបញ្ហានៃការគេង ៖ នេះជាករណីជាទូទៅមួយ ដែលមនុស្សភាគច្រើនបានដឹងថា ពន្លឺដែលជះចេញពីអេក្រង់ បានជះឥទ្ធិពលអវិជ្ជាមានទៅកាន់ការគេង ជាពិសេសនៅពេលដែលប្រើនៅក្នុងកម្រិតមួយលើសលប់ មិនថាពន្លឺទាំងនោះចេញពីទូរស័ព្ទ ថេប្លេត ឬក៏ឧបករណ៍ដទៃៗណានោះទេ ។ ជាការពិតនាពេលបច្ចុប្បន្ន ការងារមួយចំនួនតម្រូវឱ្យប្រើប្រាស់ឧបករណ៍ទាំងនោះជាចាំបាច់ដើម្បីបង្កើនផលិតភាព និងប្រសិទ្ធភាពការងារ ដូច្នេះការប្រើអេក្រង់ដើម្បីប្រើប្រាស់បណ្តាញសង្គមគួរតែត្រូវបានកាត់បន្ថយ ខណៈសកម្មភាពនេះ ក៏ពុំមានភាពចាំបាច់ក្នុងការធ្វើឱ្យជីវិរស់នៅមានភាពល្អប្រសើរនោះដែរ។ ដូច្នេះនៅពេលប្រទះឃើញខ្លួនឯង មានបញ្ហាគេងមិនលក់ជាញឹកញាប់ ការផ្អាកពីបណ្តាញសង្គម ក៏បានជំរុញឱ្យផ្អាកពីការប្រើប្រាស់ស្រ្គីនច្រើនម៉ោង និងការគិតគូរអំពីគុណភាពនៃការគេងត្រឡប់មកវិញ។
ឆែកបណ្តាញសង្គមញឹកញាប់ខុសពីធម្មតា ៖ ការមើលទូរស័ព្ទក្នុងគោលដៅទំនាក់ទំនងការងារ និងភាពចាំបាច់ណាមួយ វាស្ថិតក្នុងដំណាក់កាលអាចទទួលយកបាន ប៉ុន្តែបើនៅសុខៗក៏ទាញទូរស័ព្ទទាំងដែលមិនបានគិត ដោយសារមានទម្លាប់ចុចជារឿយៗ ដូចជាប្រើកំឡុងពេលប្រជុំសំខាន់ៗ កំពុងនិយាយគ្នា និងប្រើកំឡុងពេលជួបជុំណាមួយ នេះជាសញ្ញាដែលគួរតែប្រើយុទ្ធសាស្រ្តក្នុងការផ្អាក តួយ៉ាងដូចជាការលុបកម្មវិធី និងការដាក់កំណត់ម៉ោងប្រើប្រាស់ឱ្យជាក់លាក់ជាដើម៕
