លោកវេជ្ជបណ្ឌិត ម៉ក់ មុនិន្ទ ប្រាប់អំពីសារៈសំខាន់នៃការបំបៅដោះកូន

ភ្នំពេញ៖ អាណាព្យាបាលខ្មែរយើងជាច្រើនសុទ្ធតែធ្លាប់បានលឺការណែនាំឱ្យបំបៅដោះកូនដោយទឹកដោះម្តាយ តែពេលខ្លះគាត់មិនទាន់បានយល់ច្បាស់នៅឡើយពីលក្ខខណ្ឌវិទ្យាសាស្ត្រ និងលក្ខណៈពិសេសពិតប្រាកដនៃទឹកដោះម្តាយចំពោះកូន។

លោកវេជ្ជបណ្ឌិត ម៉ក់ មុនិន្ទ អ្នកឯកទេសជាន់ខ្ពស់ផ្នែកអាហាររូបត្ថម្ភនៃអង្កការទស្សន:ពិភពលោក (World Vison Cambodia) មានប្រសាសន៍ថា៖

“ម្ដាយត្រូវបំបៅដោះកូនភ្លាមក្នុងអំឡុងពេល១ម៉ោងបន្ទាប់ពីសម្រាលកូនរួច ពីព្រោះវាធ្វើឱ្យម្ដាយអាចផលិតទឹកដោះបានច្រើន ធ្វើឱ្យស្បូនកន្រា្តក់បានល្អដើម្បីទប់ស្កាត់ការធ្លាក់ឈាម ក៏ដូចជាជួយបង្ការមេរោគផ្សេងៗបានផងដែរ។ លោកថា ទឹកដោះដំបូងមានសារៈសំខាន់ណាស់សម្រាប់ទារក ព្រោះវាអាចធ្វើឱ្យទារកមាន ភាពស្និតស្នាលជាមួយម្ដាយ”

លោកបន្ថែមថា ទឹកដោះដំបូងគឺជាទឹកដោះដែលចេញពីម្ដាយក្នុងរយៈពេលបីទៅបួនថ្ងៃដំបូងបន្ទាប់ពីសម្រាលរួច វាគឺជាទឹកដោះដែលមានពណ៌លឿង ខាប់ ឬថ្លា។ ទឹកដោះដំបូងនេះ មានអង្គបដិបក្ខការពារ និងសម្លាប់មេរោគ ហើយវាជាថ្នាំដំបូងក្នុងការការពារទារក។

លោកវិជ្ជបណ្ឌិត ម៉ោង មុនិន្ទ បាននិយាយថា៖

“ទឹកដោះដំបូងមានបរិមាណតិច ប៉ុន្តែវាឆ្លើយតបទៅនឹងតម្រូវការសម្រាប់ទារកក្នុងការប្រើប្រាស់៦ខែដំបូង។ ទឹកដោះដំបូងមានសារធាតុជាច្រើនដូចជា វីតាមីន ប្រូតេអ៊ីន ថាមពល ធ្វើឱ្យពោះវៀនទារករឹងមាំ និងមានជាតិទឹកគ្រប់គ្រាន់ចំពោះ៦ខែដំបូង។ បើសិនជាទារកមានបញ្ហារាគរូស ម្ដាយត្រូវបង្កើនការបំបៅដោះឱ្យបានញឹកញាប់”

អ្នកជំនាញខាងលើបានលើកឡើងផងដែរថា បើសិនជាម្ដាយជាប់រវល់ជាមួយការងារ ម្ដាយត្រូវរៀបចំទឹកដោះទុកដើម្បីឱ្យអ្នកថែទាំផ្ដល់ឱ្យកុមារ។ ទឹកដោះម្ដាយគឺជួយឱ្យទារក ឬក៏កុមារមានភាពវ័យឆ្លាត ប្រាជ្ញាវាងវ័យ និងជួយរក្សាទំនាក់ទំនងល្អរវាងម្ដាយនិងទារកក្នុងរយៈពេលបំបៅដោះ។ លើសពីនេះ វាជួយឱ្យម្ដាយមានសុខភាពល្អ និងការពារម្ដាយមិនឱ្យមានផ្ទៃពោះសម្រាប់៦ខែដំបូងបានផងដែរ។

ជាការណែនាំលោកវេជ្ជបណ្ឌិតបានផ្តល់ដំបូន្មានថា ម្ដាយដែលបំបៅដោះកូន ត្រូវមានអារម្មណ៍ល្អ និងប្រុងប្រយ័ត្នខ្ពស់ចំពោះការរៀបចំទារក។ ម្តាយត្រូវធ្វើបែបណាឱ្យទារកអាចទទួលយកទឹកដោះបានច្រើននៅក្នុងពេលបំបៅដោះ។ ម្ដាយត្រូវបំបៅដោះទារកឱ្យបានញឹកញាប់តាមដែលអាចធ្វើទៅបាន ហេតុនេះមជ្ឈដ្ឋានេះជុំវិញខ្លួនដូចជាស្វាមី ឪពុកម្តាយ និងបងប្អូន គួរផ្តល់បរិយាកាស រួមទាំងជួយគាំទ្រដើម្បីឱ្យការបំបៅដៅទទួលបានលទ្ធផលល្អ។

លោកវេជ្ជបណ្ឌិត ម៉ក់ មុនិន្ទ និយាយថា ទីតាំងនិងកន្លែងដែលត្រឹមត្រូវសម្រាប់បំបៅដោះទារក គឺត្រូវដាក់ក្បាល និងដងខ្លួនទារកនៅក្នុងខ្សែបន្ទាត់តែមួយ។ ម៉្យាងវិញទៀត មុខរបស់ទារក និងសុដន់របស់ម្ដាយត្រូវនៅទល់មុខគ្នា ហើយមុខម្ដាយនិងមុខរបស់ទារកត្រូវមើលគ្នាផងដែរ។ ម្ដាយត្រូវរុញចុងសុដន់ចូលក្នុងមាត់ទារកឱ្យបានត្រឹមត្រូវ ហើយម្ដាយត្រូវបន្តក្នុងការបំបៅដោះម្ខាងទាល់តែអស់ ពីព្រោះទឹកដោះចុងក្រោយនេះគឺមានសារជាតិច្រើន មុននឹងបន្តឱ្យទារកទៅបំបៅដោះម្ខាងទៀត៕

លោក សន តុលា | Mr. Sorn Tola

ជីវប្រវត្តិ: លោក សន តុលា កំពុងសិក្សានៅដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍នៃសាកលវិទ្យាល័យភូមិន្ទភ្នំពេញ។ បច្ចុប្បន្នលោកជាអ្នកសរសេរ និងអ្នករាយការណ៍ព័ត៌មានអប់រំនៃ AMS Education។