ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តម្លៃគ្រឿងទេសនិងអាហារ ពេលបច្ចុប្បន្នមានការកើនឡើងជាលំដាប់ ដោយសារតែអតិផរណាមានការកើនឡើង រហូតដល់ក្នុងករណីខ្លះមនុស្សមិនអាចសម្របខ្លួនទាន់ពេលជាមួយនឹងការកើនឡើងនៃថ្លៃសម្ភារៈដែលទីផ្សារបានកំណត់។ តាមរយៈគេហទំព័រ Wealth Of Geeks បានបង្ហាញគន្លឹះ៧ចំណុចដែលអាចជួយសន្សំសំចៃថវិកាក្នុងការចាយវាយប្រចាំថ្ងៃ។
១. រៀនចម្អិនម្ហូប ៖ ភារកិច្ចចម្អិនម្ហូបដោយខ្លួនឯងនៅផ្ទះ ហាក់ដូចជាមិនមែនជារឿងងាយស្រួលប៉ុន្មានទេ សម្រាប់អ្នកដែលមិនមានទម្លាប់ធ្វើវាពីមុនមក ឬអ្នកមិនធ្លាប់ចម្អិនសោះតែម្តង ហើយអ្នកអាចនឹងវិភាគឃើញថា ពេលវេលាក្នុងការចម្អិនគឺមិនគ្រប់គ្រាន់នោះទេ ឬក៏មិនដឹងថាត្រូវចាប់ផ្តើមដោយរបៀបណា។ ក្នុងសម័យឌីជីថល ការរៀនសូត្រអំពីរបៀបដាំស្ល មិនពិបាកពេកនោះទេ ព្រោះការបង្រៀនតាមរយៈវីដេអូ ឬសៀវភៅបោះពុម្ភផ្សាយមានភាពទូលំទូលាយជាងមុន និងមានបង្ហាញជម្រើសនៃរបៀបវារៈនីមួយៗ ទៅតាមលទ្ធភាពរៀងៗខ្លួន ដែលនេះជាការរួមចំណែកយ៉ាងសំខាន់ក្នុងការកាត់បន្ថយចំណាយ។ ប្រសិនបើមានការរៀបចំផែនការ និងបែងចែកពេល នោះការចំណាយពេលក្នុងការចម្អិននឹងក្លាយទៅជាទម្លាប់ ហើយប្រើពេលកាន់តែតិចទៅៗ។
២. ទិញចំណីអាហារពីកសិករផ្ទាល់ៗ ៖ ចំពោះអ្នករស់នៅជិតកសិដ្ឋាន ឬស្រែចំការ ការទៅទិញបន្លែបង្ការ ត្រីសាច់ និងផ្លែឈើពីកសិករផ្ទាល់ៗ មិនត្រឹមតែបង្ហាញពីការគាំទ្រអ្នកផលិត ឬផលិតផលក្នុងស្រុកនោះទេ ប៉ុន្តែទទួលបាននូវតម្លែសមរម្យ រៀនសូត្រអំពីជីវភាពរស់នៅក្នុងតំបន់ និងមានឱកាសទទួលទានអាហារស្រស់ៗថ្មីៗ ស្របទៅតាមរដូវកាល។
៣. ដូរទិសដៅដែលត្រូវទៅទិញអាហារ ឬសម្ភារៈ ៖ ទិញសម្ភារៈប្រើប្រាស់ ឬអាហារនៅទីតាំងដែលមានប្រភពផ្សេងៗគ្នា ជាឱកាសក្នុងការឱ្យយើងស្គាល់អំពីតម្លៃទីផ្សារ របៀបរកស៊ី និងការសម្រេចចិត្តបានល្អចំពោះស្ថានភាពហិរញ្ញវត្ថុ។ កុំកំណត់ខ្លួនឯងទៅទិញតែមួយទីតាំង ព្រោះជាទូទៅជាពិសេសក្នុងតំបន់ទីផ្សារសេរី អ្នកលក់ទំនិញតែងមានការដាក់តម្លៃដែលអាចប្រកួតប្រជែងគ្នា នេះគឺជាឱកាសឱ្យអ្នកទិញទំនិញអាចកាត់បន្ថយការចំណាយបានមួយកម្រិត។
៤. ចាយជាសាច់ប្រាក់ ៖ មនុស្សមានទំនោរចាយថវិកាលឿនជាងសព្វមួយដង នៅពេលពួកគេសម្រេចចិត្តចាយតាមរយៈកាត ឬការចាយតាមប្រព័ន្ធអេឡិចត្រូនិច។ ប៉ុន្តែពេលប្រើប្រាស់លុយបែបសាច់ប្រាក់វិញ ពួកគេអាចនឹងមានការគិតច្រើនមុននឹងចាយ ព្រោះឃើញទឹកលុយជាក់ស្តែងដែលបានចំណាយអស់។
៥. ធ្វើផែនការអាហារប្រចាំថ្ងៃ ៖ ការធ្វើផែនការអាហារ ជាយុទ្ធសាស្រ្តមួយជួយឱ្យការចំណាយលុយទៅលើហាងទំនិញគ្រឿងទេសត្រូវបានកាត់បន្ថយ ដោយហេតុថា កាលដែលដឹងអំពីការចំណាយចំពោះការបរិភោគប្រចាំថ្ងៃ យើងនឹងអាចទិញគ្រឿងផ្សំក្នុងបរិមាណមួយដែលស្របនឹងតម្រូវការជាក់ស្តែង ហើយអាចកាត់បន្ថយភាពខ្ជះខ្ជាយ។
៦. ផ្ទៀងផ្ទាត់នូវសម្ភារៈដែលមានក្នុងស្តុក ៖ រៀងរាល់មុនពេលទៅផ្សារទិញគ្រឿងទេសបន្ថែម គឺត្រូវពិនិត្យរបស់របរដែលមានស្រាប់ជាមុនសិន ពិនិត្យរាល់ចំនួនទំនិញដែលតម្កល់ទុកបម្រុងក្នុងទូ ដើម្បីបញ្ចៀសនូវការទិញសម្ភារៈដែលមិនឆ្លើយតបទៅនឹងបច្ចុប្បន្នភាព។
៧. បរិភាគឱ្យឆ្អែតសឹមទៅផ្សារ ៖ ការធ្វើដំណើរទៅផ្សារទាំងមិនទាន់ទទួលទានអ្វីសោះ គឺជាដើមចមនាំលោកអ្នកឱ្យទិញនូវសម្ភារៈមិនចាំបាច់។ មិនថាប្រញាប់ខ្លាំងយ៉ាងណាក៏ដោយ សូមព្យាយាមទទួលទានអាហារសម្រន់បន្តិចបន្តួចសិន ដើម្បីជាការផ្តល់ថាមពលក្នុងការគិត និងការសម្រេចចិត្តចំណាយថវិកាក្នុងកម្រិតមួយប្រកបដោយភាពត្រឹមត្រូវ៕
