ការរស់បែបប្រើប្រាស់ល្បឿនធម្មតាៗ ឬយឺតៗ ដើម្បីបំពេញភារកិច្ចប្រចាំថ្ងៃបានក្លាយជាចំណែកមួយ ជះឥទ្ធិពលទាំងផ្នែកសុខភាពផ្លូវការ និងសុខភាពផ្លូវចិត្ត។ តាមការ​សិក្សា​គេ​រកឃើញថា ការប្រើប្រាស់របៀបរស់នៅបែបមួយៗ ចូលរួមកាត់បន្ថយស្រ្តេស ជំរុញសុខុមាលភាព រក្សាតុល្យភាពនៃការរស់នៅ  និងបង្កើនបាននូវផលិតភាពការងារ។

តាមរយៈ គេហទំព័រ Positivemindworks បានប្រាប់អំពីអត្ថប្រយោជន៍ ៣ចំណុច នៃការរស់នៅតាមបែបមិនប្រញាប់ប្រញាល់ខ្លាំង ដែលមានដូចជា៖

១. ពង្រឹងសុខភាព ៖ ការប្រើប្រាស់រាងកាយ ឱ្យដំណើរការតាមរយៈអនុវត្តន៍សកម្មភាពប្រចាំថ្ងៃមួយៗ ឬយឺតៗ បានផ្តល់អត្ថប្រយោជន៍ជាច្រើនចំពោះសុខភាព ព្រោះការអនុញ្ញាតឱ្យរាងកាយប្រព្រឹត្ត​តាមសម្រួល នោះស្មារតីក៏មានឱកាសនិងតាមទាន់ ក៏ដូចជា ផ្ទៀងផ្ទាត់អំពីបច្ចុប្បន្នភាពបានលម្អិតជាងកាលដែលធ្វើអ្វីមួយបែបរួសរាន់។ ទុកចន្លោះធ្វើសកម្មភាពរាងកាយយឺតៗក្នុងការធ្វើសកម្មភាពប្រចាំថ្ងៃ ហើយរៀនរីករាយរាល់សកម្មភាពដែលកំពុងមាន មិនថា កំពុងដើរ កំពុងជិះកង់ និងសកម្មភាពលេងកម្សាន្តដទៃទៀត។

ការរស់នៅដោយដំណើរធម្មតាៗមួយៗ ជាពិសេស ពេលធ្វើដំណើរកម្សាន្តទៅក្រៅផ្ទះ អាចជួយសម្រួលដល់សុខភាពបេះដូង ផ្លូវចិត្ត រួមទាំងពង្រឹងរាងកាយឱ្យរឹងមាំតាមរយៈការស្រូបយកពន្លឺព្រះអាទិត្យដែលពោរពេញដោយវិតាមីន D ទៅកាន់តម្រូវការ នៃសុខភាពរាងកាយ។ ការរស់បែបដំណើរមួយៗ ផ្តល់គុណសម្បត្តិជាច្រើនរាប់មិនអស់ចំពោះរាងកាយ និងដើរតួនាទីសំខាន់ជំរុញដល់សុខភាពផ្លូវចិត្តផងដែរ មានដូចជា ជួយឱ្យការសម្រេចចិត្តមួយដែលល្អចំពោះខ្លួនឯង អាចរស់ដោយមានតុល្យភាព និងការប្រឈមមុខដោះស្រាយបញ្ហាថ្មីៗ។

២. កាត់បន្ថយភាពតានតឹង និងស្រ្តេស ៖ បុគ្គលម្នាក់ៗ ហាក់ជួបប្រទះនូវបញ្ហាដែលស្រដៀងគ្នាមួយចំនួន ដូចជា ស្រ្តេស អាការតានតឹង ឬក៏ជំងឺបាក់ទឹកចិត្តក្នុងដំណាក់កាល នៃដំណើររស់នៅក្នុងគ្រាណាមួយ ដែលកត្តាទាំងនេះ ប៉ះពាល់ទៅដល់ការរស់នៅក្នុងរយៈពេលវែង។  ចំពោះ បុគ្គលដែលមានទម្លាប់រស់នៅសាមញ្ញៗ ធ្វើសកម្មភាពតាមដំណើរយឺតៗ មានឱកាសក្នុងការហ្វឹកហាត់ផ្លូវចិត្តបានច្រើន ដោយការដកដង្ហើមមួយៗ និងមានស្មារតីរឮកដឹងជាប្រចាំ។

ការរស់នៅមួយៗ ផ្តល់ឱកាសឱ្យមនុស្សម្នាក់ៗ អាចវិភាគកាលៈទេសៈនីមួយៗបានយ៉ាងលម្អិត និងអាចស្វែងយល់អំពីទស្សនៈផ្ទុយចម្រុះគ្នា រួមទាំងមានគំនិតទូលំទូលាយក្នុងការស្វែងរកដំណោះស្រាយ ទោះស្ថិតក្នុងស្ថានភាពដែលលំបាកៗក្ដី ហើយថែមទាំងងាយក្នុងការស្វែងរកវិធីសាស្រ្តចាកចេញពីស្ថានភាពដែលស្រ្តេស។

៣. រក្សាទំនាក់ទំនងកាន់តែរឹងមាំ ៖ ក្នុងទំនាក់ទំនង ជាទូទៅតែងមានបញ្ហា ដែលកម្រនិងជៀសរួចណាស់ ប៉ុន្តែការរស់នៅមួយៗ គិតមួយៗ អាចរួមចំណែកដល់ការធ្វើឱ្យទំនាក់ទំនងត្រូវដល់ផ្លូវបញ្ចប់ត្រូវបានបញ្ចៀស កាត់បន្ថយជម្លោះ ដោយជំនួសមកវិញនូវការស្វែងរកវិធីសាស្រ្តដើម្បីផ្សារភ្ជាប់ទំនាក់ទំនងជាមួយមនុស្សនៅជុំវិញខ្លួនឱ្យប្រសើរឡើងវិញ៕