ការប្រឡងរបស់កុមារមានច្រើនប្រភេទ ហើយសម្ពាធនៃការទទួលខុសត្រូវ អាស្រ័យលើទំហំនៃការសិក្សា និងការរំពឹងទុករបស់សិស្សម្នាក់ៗ​ តែយ៉ាងណា ប្រសិនបើមានការជ្រោមជ្រែងពីឪពុកម្តាយ ឬអាណាព្យាបាល គឺជាសកម្មភាពដែលកាន់តែជំរុញដល់ប្រសិទ្ធភាពនៃការសិក្សា និងកាត់បន្ថយអាការស្រេ្តសរបស់កូនៗ។

តាមរយៈគេហទំព័រ Allsaints បានឱ្យដឹងថា ពេលនៅក្នុងផ្ទះ កូនៗដែលកំពុងស្រេ្តសនឹងការប្រឡង ឬមមាញឹកនឹងការរៀបចំកាលវិភាគប្រឡង ក្នុងនាមជាឪពុកម្តាយ ក៏ដូចជាអាព្យាបាល អាចរួមចំណែកតាមរយៈសកម្មភាពមួយចំនួននៅខាងក្រោម ៖

ទុកកន្លែងឱ្យកូនៗរៀនសូត្រ ៖ សម្ពាធ ឬស្រេ្តស ពីការសិក្សាត្រូវការឱ្យអាណាព្យាបាលចូលរួមដោះស្រាយទាំងអស់គ្នា ព្រោះបើពុំដូច្នោះទេ អាកប្បកិរិយាអវិជ្ជមាន ឬក៏សម្ពាធពីកូនៗ បានរួមចំណែកផ្តល់ផលមិនល្អទៅកាន់បរិយាកាសក្នុងផ្ទះទាំងមូល។ ហើយតាមរយៈការផ្តល់បរិយាកាសស្ងប់ស្ងាត់ល្អ និងការរួមចំណែកគាំទ្រ តាមរយៈរូបភាពចម្រុះគ្នា គឺជាការជួយកូនៗឱ្យទទួលបានប្រសិទ្ធភាពនៃការសិក្សា ក៏ដូចជា កាត់បន្ថយភាពតានតឹងជារួម។ ការចាប់ផ្តើមដំបូងៗ គឺធ្វើយ៉ាងណាឱ្យប្រាកដចិត្តថា នៅក្នុងផ្ទះមានទីតាំងសមល្មមដែលកូនអាចផ្តោតលើការសិក្សា មិនលាយលំសម្ភារៈដែលពុំចាំបាច់នៅទីតាំងដែលត្រូវអង្គុយរៀន ហើយកន្លែងរៀនត្រូវមានមានភាពស្ងាត់ល្អ ឬទីតាំងដែលមានទ្វារបិទជិត មិនមានការរំខានសូម្បីសម្លេងពីខាងក្រៅ។ ក្រៅតែផ្តល់ទីតាំងមួយដែលគ្មានការរំខានដល់កូនៗ អាណាព្យាបាលគួរមានការកំណត់ពេលវេលា នៃការប្រើប្រាស់ទូរស័ព្ទដៃ ឬក៏ឧបករណ៍អេឡិចត្រូនិចដែលពុំចាំបាច់ ដោយដាក់នៅកន្លែងផ្សេងគ្នាពីកន្លែងដែលកូនៗសិក្សា។

ផែនការ និងការបង្ហាញពេលដែលត្រូវរៀន ៖ នៅពេលដែលទទួលបាននូវតារាង ឬក៏កាលវិភាគប្រឡង អាណាព្យាបាលគួរក្រឡេកមើលនៅត្រង់ចំណុចនេះដែរ គឺដើម្បីសម្របខ្លួន និងការជួយផ្តល់ជាកម្លាំងចិត្ត និងការគាំទ្រឱ្យត្រូវពេល មួយវិញទៀតនៅពេលដែលបានដឹងអំពីពេលវេលា មិនថាម៉ោងសិក្សា និងការប្រឡង ក្នុងនាមជាអាណាព្យាបាល គឺកាន់តែងាយស្រួលក្នុងការប្រាប់ឱ្យកូនៗសម្រាក ឬប្រាប់ឱ្យរំលឹកមេរៀនជាដើម។

ជជែកគ្នាអំពីការរំពឹងទុក ៖ ការជជែកគ្នាទុកជាមុន អំពីការរំពឹងទុករបស់ភាគីម្ខាងៗ មិនថាកូនៗ ឬឪពុកម្តាយ ការជជែកគ្នា ជាការកាត់បន្ថយការអាក់អន់ចិត្តនៅពេលដែលលទ្ធផលសម្រេចចុងក្រោយចេញមក។ ការជជែកអាចឱ្យកូនបានដឹងជាមុនថា តើអាណាព្យាបាលផ្តល់តម្លៃលើការខិតខំប្រឹងប្រែងជាង ឬផ្តោតលើលទ្ធផលជាង ហើយការជជែកគ្នាក៏ជាការកាត់បន្ថយការដាក់សម្ពាធទៅកាន់កូនៗ។

អ្វីដែលអាណាព្យាបាលអាចគាំទ្រទៅកាន់កូនៗ ៖ មិនថាដោយផ្ទាល់ និងប្រយោលនោះទេ​ អាណាព្យាបាលគ្រប់រូបសុទ្ធតែមានលទ្ធភាពគាំទ្រទៅកាន់កូនៗ​ តាមរបៀបរៀងៗខ្លួន ដូចជាពិនិត្យមើលជារឿយៗថា តើកូនៗបានទទួលទានចំណីអាហារបានគ្រប់គ្រាន់ ឬទៀងទាត់ពេលវេលាទេ និងមានសារធាតុចិញ្ចឹមកម្រិតណាដែរ? ជាពិសេសមុនពេលប្រឡង និងថ្ងៃប្រឡងមកដល់ ហើយត្រូវដាក់កាលវិភាគរំលឹកពួកគេឱ្យបានជាប្រចាំអំពីអាហារដែលរួមចំណែកដល់សុខភាព ព្រោះការទទួលទានបានល្អ ក៏ជាការធ្វើឱ្យស្មារតីផ្តោតលើការសិក្សាមានប្រសិទ្ធភាពជាងមុនដែរ។

ជាងនេះទៅទៀត ការតាមដានអំពីពេលវេលាដែលត្រូវចូលគេងគឺជាចំណុចសំខាន់ពុំអាចខ្វះបានដូចគ្នា អាណាព្យាបាលត្រូវប្រាកដចិត្តថា ពួកគេគេងបានគ្រប់គ្រាន់ និងស្ងប់ ហើយកាត់បន្ថយការចំណាយពេលច្រើនម៉ោងជាមួយស្រ្គីនអេឡិចត្រូនិច ជំនួសមកវិញដោយសកម្មភាពមួយចំនួនដូចជា ការស្តាប់ភ្លេង ឬចម្រៀងនាំឱ្យចិត្តស្ងប់ ហាត់យូហ្កា និងឧស្សាហ៍ពិនិត្យមើលលើសីតុណ្ហភាពនៅក្នុងកន្លែងគេង ថា តើផ្តល់ផាសុកភាពកម្រិតណា? ការពិនិត្យលើការរស់នៅប្រចាំថ្ងៃរបស់កុមារ ឬមនុស្សវ័យជំទង់ គឺជាការរួមចំណែកដ៏សំខាន់ក្នុងការរក្សាគុណភាព នៃការសិក្សា និងការជួយឱ្យកុមារ មានការត្រៀមខ្លួនសម្រាប់ថ្ងៃប្រឡងកាន់តែមានប្រសិទ្ធភាព៕