ក្រពះពោះវៀនរបស់យើងមានមីក្រូសរីរាង្គប្រហែល ១០០ពាន់ពាន់លាន ដែលភាគច្រើនជាបាក់តេរី។ សារពាង្គកាយទាំងនោះ ត្រូវបានគេស្គាល់ថា ជាអតិសុខុមប្រាណពោះវៀន (gut microbiome)។ បាក់តេរីភាគច្រើន នៅក្នុងក្រុមអតិសុខុមប្រាណរបស់យើងគឺ ជាបាក់តេរីល្អ។ តួនាទីចម្បងរបស់បាក់តេរីល្អ គឺទប់ទល់នឹងប្រភេទបាក់តេរីអាក្រក់ ដើម្បីរក្សាពោះរៀនរបស់មនុស្សឱ្យមានសុខភាពល្អ។ លើសពីនេះ ពពួកបាក់តេរីល្អ ក៏ផ្ដល់អត្ថប្រយោជន៍ ផ្សេងៗទៀតសម្រាប់សុខភាពផងដែរ។

ប៉ុន្តែមានពេលខ្លះ តុល្យភាពរវាងបាក់តេរីល្អ និងបាក់តេរីអាក្រក់ មិនមានលំនឹងនោះទេ ហើយពេលនោះហើយ ដែលប្រូបាយអូទិច មានតួនាទីសំខាន់។ ប្រូបាយអូទិច គឺជាបាក់តេរីរស់ និងផ្សិត។ ពពួកប្រូបាយអូទិច បំពេញពោះវៀនរបស់អ្នកជាមួយនឹងបាក់តេរីល្អ ដើម្បីសា្តរតុល្យភាពរវាងបាក់តេរីល្អ និងបាក់តេរីអាក្រក់។ ក្រៅពីនេះ វាក៏មានសារៈសំខាន់ផងដែរ ក្នុងការរក្សាតុល្យភាព ក្រុមអតិសុខុមប្រាណ ក្នុងរាងកាយ។

តើព្រី​បាយអូទិច គឺជាអ្វី?

ព្រីបាយអូទិច គឺជាសារធាតុផ្សំនៅក្នុងអាហារជាច្រើនដែលពោះវៀនរបស់អ្នកមិនអាចរំលាយបានទាំងស្រុង។ ការលើកឧទាហរណ៍ អំពីព្រីបាយអូទិច រួមមានម្ស៉ៅមួយចំនួន ដូចជា សារធាតុ oligosaccharides, សារធាតុ inulin និងសារធាតុ pectin ដែលក្រុមសារធាតុទាំងនេះ មានទំនោរសម្បូរទៅដោយអាហារ ដែលមានជាតិសរសៃខ្ពស់។

ព្រីបាយអូទិច (Prebiotics) ដំណើរការស្របគ្នាជាមួយ ប្រូបាយអូទិច (Probiotics)។ ខណៈប្រូបាយអូទិច គឺជាអតិសុខុមប្រាណមានជីវិត ដែលរក្សា ឬកែលម្អតុល្យភាពបាក់តេរីល្អ និងអាក្រក់ នៅក្នុងប្រព័ន្ធរំលាយអាហាររបស់អ្នក។ ប្រភេទអាហារ ដែលសម្បូរទៅដោយ ​ព្រីបាយអូទិច មានដូចជា ទឹកដោះគោយ៉ាអួ គីមឈី ឈីស ជ្រក់ តែកុំបុឆា (Kombucha) និង ស្ពៃក្តោបជ្រក់ (sauerkraut) ជាដើម។

ម៉្យាងវិញទៀត ព្រីបាយអូទិច ដើរតួជាអាហារូបត្ថម្ភសម្រាប់បាក់តេរីក្នុងពោះវៀន ជួយឱ្យពួកគេលូតលាស់។ នៅពេលដែលបាក់តេរីត្រូវបានផ្តល់អាហារដល់អ្វីដែលពួកគេត្រូវការ ដើម្បីឱ្យមានសុខភាពល្អ ពួកវារក្សារាងកាយរបស់យើងឱ្យមានសុខភាពល្អជាថ្នូរនឹងការត្រឡប់មកវិញ។

ព្រីបាយអូទិច និងអត្ថប្រយោជន៍សម្រាប់សុខភាព

ប្រភេទអាហារពី្របាយអូទិច អាចធ្វើឱ្យក្រុមអតិសុខុមប្រាណនៅក្នុងពោះវៀនរបស់អ្នកប្រសើរឡើង និងពង្រឹងសុខភាពរបស់មនុស្ស។ អ្នកជំនាញនៅតែសិក្សាបន្ថែមអំពីអត្ថប្រយោជន៍នៃព្រីបាយអូទិច ហើយការស្រាវជ្រាវបានរកឃើញថា ការទទួលទានអាហារ ដែលមានព្រីបាយអូទិចខ្ពស់ នឹង ធ្វើឱ្យប្រសើរឡើងនូវការស្រូបយកជាតិកាល់ស្យូមក្នុងពោះវៀន គ្រប់គ្រងជាតិស្ករក្នុងឈាមឱ្យកាន់តែប្រសើរឡើង ពង្រឹងប្រព័ន្ធភាពស៊ាំឱ្យដំណើរការបានល្អ និងកាត់បន្ថយហានិភ័យ នៃជំងឺមហារីកពោះរៀនធំ។

ប្រភេទអាហារព្រីបាយអូទិច ដែលអាចបន្ថែមទៅក្នុងរបបអាហាររបស់អ្នក

សារធាតុព្រីបាយអូទិច ត្រូវបានរកឃើញក្នុងពពួកគ្រាប់ធញ្ញជាតិ បន្លែ និងផ្លែឈើ ដែលមានជាតិសរសៃខ្ពស់។ អាហារព្រីបាយអូទិច ដែលល្អបំផុតមានដូចជា ខ្ទឹមស ខ្ទឹមបារាំង ចេក សណ្ដែកសៀង ត្រពាំងបារាំង ស្រូវសាលី និងគ្រាប់ធញ្ញជាតិជាដើម។

យ៉ាងណាក៏ដោយ ការញ៉ាំអាហារ ដែលសម្បូរសារធាតុព្រីបាយអូទិចច្រើន មិនមែនជាគំនិតល្អ ដែលត្រូវអនុវត្តសម្រាប់មនុស្សគ្រប់គ្នានោះទេ។ ជាក់ស្ដែង មនុស្សដែលមានជំងឺរាគរូស ដោយសារមានបញ្ហាពោះវៀនធំ បានរកឃើញថា របបអាហារ ដែលមានជាតិព្រីបាយអូទិច អាចធ្វើឱ្យស្ថានភាពរោគសញ្ញារបស់គេកាន់តែអាក្រក់ឡើង។ ផ្ទុយទៅវិញ សម្រាប់អ្នក ដែលមានបញ្ហាទល់លាមក អាចធ្វើឱ្យមុខងារពោះវៀនរបស់គេប្រសើរឡើង ក្រោយពេលដែលញ៉ាំព្រីបាយអូទិច៕