ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ទោះបីជាមនុស្សបានដឹងថា ទម្លាប់មួយចំនួនប៉ះពាល់ដល់ខ្លួនឯងក្ដី ក៏ប៉ុន្តែនៅតែមិនអាចផ្លាស់ប្តូរបាន ឬកាត់ចោលដោយងាយៗ។ ទាំងនេះដោយសារការត្រាំត្រែងនឹងទម្លាប់ទាំងនោះ ក្នុងរយៈពេលយូរពេក ឧទាហរណ៍ សកម្មភាពដែលបានដឹងជាទូទៅដូចជា ការជក់បារី ការទទួលទានគ្រឿងស្រវឹង ឬសកម្មភាពដទៃៗទៀតដែលមិនឆ្លើយតបនឹងការរស់នៅប្រចាំថ្ងៃប្រកបដោយសុខុមាលភាព។ តាមរយៈ psychologytoday បានបង្ហាញគន្លឹះមួយចំនួនដែលឆ្លើយតបទៅនឹងចំណោទបញ្ហាទាំងនេះ ក៏ដូចជាការបង្ហាញជូនអំពីមូលហេតុដែលអាកប្បកិរិយាមិនល្អពិបាកផ្លាស់ប្តូរ។
ការជំរុញដោយអារម្មណ៍អវិជ្ជមាន ៖ មានកត្តាមួយចំនួនដែលបណ្តាលឱ្យអារម្មណ៍អវិជ្ជមានកើតឡើង គឺបណ្តាលមកពីការសោកស្ដាយ ភាពខ្មាសអៀន ការភ័យខ្លាច និងសកម្មភាពដទៃៗទៀត ដែលជំរុញឱ្យមនុស្សចាប់ផ្តើមស្រវាចាប់យកសកម្មភាពដទៃៗ ដើម្បីបន្លប់រឿងរ៉ាវដែលពួកគេមិនសប្បាយចិត្តជាមួយ។ ដូច្នេះការស្វែងរកវិធីសាស្រ្តក្នុងការព្យាបាលរបួសផ្លូវចិត្ត ក៏ដូចជាការអនុវត្តសកម្មភាពទាំងឡាយណា ដែលជំរុញដល់ការថែទាំសុខភាពផ្លូវចិត្តខ្លួនឯង ជាចំណែកបញ្ចៀសពីការបន្តធ្វើសកម្មភាព ដែលបំផ្លាញដល់ការរស់នៅក្នុងរយៈពេលវែង។
ការគិតដែលមិនផ្តល់ជាប្រយោជន៍ ៖ ការផ្តោតលើលទ្ធផល នៃការផ្លាស់ប្តូរអ្វីមួយពេក អាចជាការគិតមួយដែលមិនផ្តល់ជាប្រយោជន៍ ហើយក៏ជាកត្តាជំរុញឱ្យកើតមានអាការលើសលប់ តួយ៉ាងដូចជាការរំពឹងចង់ផ្លាស់ប្តូរប្រចាំថ្ងៃ ដូចជាការទុកដាក់សម្ភារឱ្យមានរបៀបរៀបរយ ប៉ុន្តែនៅពេលមិនអាចដូចចិត្តភ្លាមៗ វាក៏បង្កឱ្យមានអាការតានតឹងកើតមានបន្ថែម។ ឆ្លើយតបនឹងករណីនេះ ការគិតច្រើន រំពឹងលទ្ធផលលឿន ដោយមិនបំបែកឱ្យមានភាពងាយស្រួល ឬមិនទទួលយកលទ្ធផលបន្តិចម្តងៗ មិនចំណេញអ្វីទៅកាន់ការផ្លាស់ប្តូរទៅរកភាពវិជ្ជមានក្នុងពេលវែងនោះទេ។
ចង់បានលទ្ធផលភ្លាមៗលឿន ៖ ជាថ្មីម្តងទៀត មិនថា ការដែលចង់ផ្លាស់ប្តូរក្នុងរូបភាពធំក្ដី ឬតូចក្ដី នៅពេលផ្តោតលើតែលទ្ធផលតែមួយមុខ នោះនឹងភ្លេចគិតទៅដល់វិធីសាស្រ្តបង្រួមការផ្លាស់ប្តូរដែលមានប្រសិទ្ធភាព។ ជាឧទាហរណ៍ ជំនួសឱ្យការចង់ទៅកន្លែងហាត់ប្រាណ គួរគិតអំពីការដើរលេងៗក្រោយបញ្ចប់ការងារ ឬដោយការអនុវត្តពីភាពសាមញ្ញៗ គឺជាការចាប់ផ្តើមនូវអ្វីដែលអាចធ្វើបានដោយមានភាពជាក់លាក់៕
