សមាគមអតីតនិស្សិតកម្ពុជាពីសហភាពសូវៀត និងរុស្ស៊ី សហការជាមួយ សព័ន្ធនិស្សិតកម្ពុជា នៅបរទេស (Camstudent) និង មជ្ឈមណ្ឌលវិទ្យាសាស្ត្រ និងវប្បធម៌រុស្ស៊ី នៅភ្នំពេញ ដោយទទួលបានការគាំទ្រពី ស្ថានឯកអគ្គរដ្ឋទូតសហព័ន្ធរុស្ស៊ីប្រចាំកម្ពុជា, ស្ថានឯកអគ្គរដ្ឋទូតកម្ពុជា ប្រចាំសហព័ន្ធរុស្ស៊ី, និងសាកលវិទ្យាល័យមួយចំនួននៅកម្ពុជា នឹងរៀបចំសិក្ខាសាលាអនឡាញស្តីពី “Study In Russia: Russian Government Scholarship 2026–2027” ដែល​នឹងប្រព្រឹត្តទៅនៅថ្ងៃសុក្រ ទី១២ ខែធ្នូ ឆ្នាំ២០២៥ ពេលម៉ោង ១:៥០ រសៀល ដល់ ៤:៣០ ល្ងាច (ម៉ោងនៅរាជធានីភ្នំពេញ)។

សិក្ខាសាលានេះមាន​អត្ថប្រយោជន៍យ៉ាងខ្លាំងសម្រាប់បងប្អូននិស្សិតកម្ពុជាដែលមានបំណងបន្តការសិក្សាតាមរយះអាហារូបករណ៍រដ្ឋាភិបាល នៅក្នុងប្រទេសដែលមានឥទ្ធិពលខ្លាំងក្នុងវិស័យវិទ្យាសាស្ត្រ សិល្បៈ និងការច្នៃប្រឌិត។ គោលបំណងនៃសិក្ខាសាលានេះគឺដើម្បីផ្សព្វផ្សាយវិស័យអប់រំ បង្កើនទំនាក់ទំនងកម្ពុជា–រុស្ស៊ី និងជួយណែនាំនិស្សិតកម្ពុជាក្នុងការបន្តការសិក្សានៅសហព័ន្ធរុស្ស៊ី។

វាគ្មិនដែលនឹងចូលរួមជាកិត្តិយសនៅក្នុងសិក្ខាសាលារួមមាន៖

• លោក ណោង រិទ្ធី, អគ្គនាយកសព័ន្ធនិស្សិតកម្ពុជានៅបរទេស (Camstudent)
• ឯកឧត្តម អាណាតូលី ប៉ូរ៉ូវីក, ឯកអគ្គរដ្ឋទូតសហព័ន្ធរុស្ស៊ីប្រចាំព្រះរាជាណាចក្រកម្ពុជា
• លោកបណ្ឌិត ញិល រដ្ឋា, ប្រធានសមាគមអតីតនិស្សិតកម្ពុជាពីសហភាពសូវៀត និងរុស្ស៊ី

អាហារូបករណ៍រដ្ឋាភិបាលរុស្ស៊ី នឹងបើកសម្រាប់និស្សិតកម្ពុជាក្នុងគ្រប់កម្រិតសិក្សា រួមទាំង បរិញ្ញាបត្រ (Bachelor’s), ជំនាញឯកទេស (Specialist), បរិញ្ញាបត្រជាន់ខ្ពស់(Master’s) និងបណ្ឌិត (PhD)។

ប្រទេសរុស្ស៊ីមានសាកលវិទ្យាល័យរាប់រយ និងជំនាញឯកទេសជាច្រើនដែលល្បីល្បាញក្នុងកម្រិតខ្ពស់ និងមានភាពពិសេស ដូចជា វិស្វកម្មនុយក្លេអ៊ែរ វិស្វកម្មសំណង់ វេជ្ជសាស្ត្រ បច្ចេកវិទ្យាព័ត៌មាន អាកាសចរណ៍ សេដ្ឋកិច្ច ច្បាប់ និងសិល្បៈ ដែលជាកត្តានាំអោយនិស្សិតកម្ពុជាទទួលបានចំណេះដឹង និងចំណេះជំនាញដែលអាចរួមចំណែកទៅដល់ការអភិវឌ្ឍជាតិនៅកម្ពុជាបានយ៉ាងមានប្រសិទ្ធភាព។

ប្រវត្តិសង្ខេបនៃការគាំទ្រក្នុងវិស័យអប់រំរបស់រុស្ស៊ីចំពោះកម្ពុជា

បន្ទាប់ពីរបបខ្មែរក្រហមបំផ្លាញប្រព័ន្ធអប់រំកម្ពុជា ប្រទេសរុស្ស៊ីបានចូលរួមសង្គ្រោះកម្ពុជាតាមរយៈការផ្តល់អាហារូបករណ៍​ដល់​និស្សិតកម្ពុជាទៅសិក្សានៅសហភាពសូវៀត។ តាំងពីឆ្នាំ ១៩៨២មក មាននិស្សិតកម្ពុជា ជាង ៨,០០០ នាក់ ទទួលបានសញ្ញាបត្រនៅប្រទេសរុស្ស៊ី និងសហភាពសូវៀត។ ហើយបន្ទាប់ពីការដួលរលំរបស់សហភាពសូវៀត, រុស្ស៊ីបានបន្តផ្តល់អាហារូបករណ៍ឡើងវិញចាប់តាំងពីឆ្នាំ ១៩៩៦ មក។

មាតិកាសំខាន់ៗដែលនឹងត្រូវចែករំលែកក្នុងសិក្ខាសាលា

ដំណើរការដាក់ពាក្យសុំអាហារូបករណ៍រដ្ឋាភិបាលរុស្ស៊ី គឺសាមញ្ញ ពិតមែនតែពោលពេញទៅដោយការប្រកួតប្រជែងខ្លាំង។ ព័ត៌មានអំពីប្រព័ន្ធអប់រំរុស្ស៊ី និងចំនួនកន្លែងទទួលសម្រាប់ឆ្នាំសិក្សា ២០២៦–២០២៧ នឹងត្រូវលើកឡើងនៅក្នុងសិក្ខាសាលានេះ។ ព័ត៌មាននេះនឹងត្រូវបង្ហាញដោយ៖ លោក សុខ ច័ន្ទឡុងហ្វុង, និស្សិតថ្នាក់បណ្ឌិតនៅសាកលវិទ្យាល័យ Peoples’Friendship University of Russia។

បន្ថែមពីនេះទៅទៀតសិក្ខាសាលានេះនឹងលើកយកការចែករំលែកបទពិសោធន៍ទាក់ទងទៅនឹងជីវិតសិក្សា បរិបទសង្គម បញ្ហាភាសា និងជាពិសេស បច្ចេកទេសក្នុងការទទួលបានអាហារូបករណ៍ គឺមានសារៈសំខាន់យ៉ាងខ្លាំងសម្រាប់អ្នកចូលរួម។ ទោះបីជា “ការសិក្សាក្រៅប្រទេសមើលទៅគួរឱ្យចាប់អារម្មណ៍” ក៏ដោយ ការយល់ដឹងអំពីភាពជាក់ស្តែងនៃបទពិសោធន៍សិក្សានៅបរទេសគឺចាំបាច់បំផុត។

វាគ្មិនកិត្តិយសដែលនឹងចែករំលែកបទពិសោធន៍ផ្ទាល់រួមមាន ៖

• លោក តុន ចាន់រិទ្ធិ, និស្សិតបរិញ្ញាបត្រជាន់ខ្ពស់ផ្នែកវិទ្យាសាស្ត្រនយោបាយនៃសាលកវិទ្យាល័យ HSE
• លោក ឃឿន ចន្ទតូ, និស្សិតបរិញ្ញាបត្រផ្នែកវិស្វកម្មថាមពលនុយក្លេអ៊ែរ និងកម្ដៅ នៅសាកលវិទ្យាល័យ National Research Nuclear University MEPhI
• កញ្ញា ព្រាប ចាន់ថារិទ្ធ, និស្សិតបរិញ្ញាប័ត្រជាន់ខ្ពស់ផ្នែក Political Economy of the ASEAN–Russia Strategic Partnership នៃ MGIMO University

សិក្ខាសាលានេះនឹងនាំនិស្សិតកម្ពុជាស្វែងយល់ពីឱកាសដើម្បីបន្តការសិក្សាថ្នាក់ឧត្តមសិក្សានៅប្រទេសរុស្ស៊ី ក៏ដូចជាជួយនិស្សិតកម្ពុជាឱ្យយល់កាន់តែច្បាស់អំពីដំណើរការដាក់ពាក្យសុំអាហារូបករណ៍ និងឱកាសសិក្សានៅក្នុងប្រទេសរុស្ស៊ី ដែលមានប្រព័ន្ធអប់រំកម្រិតខ្ពស់ និងជំនាញឯកទេសជាច្រើន។ និស្សិតកម្ពុជាទាំងអស់ដែលមានចំណាប់អារម្មណ៍ចង់សិក្សាថ្នាក់ឧត្តមសិក្សានៅប្រទេសរុស្ស៊ីត្រូវបានលើកទឹកចិត្តយ៉ាងខ្លាំងឱ្យចូលរួម និងទាញយកអត្ថប្រយោជន៍ពីសិក្ខាសាលានេះ ដោយ​ចូលរួមតំណភ្ជាប់ Google Meet៖ https://meet.google.com/xgr-dpcm-tku ៕