ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា កាលពីថ្ងៃទី៥ ឧសភា បានជូនដំណឹងថា សាធារណរដ្ឋ អាស៊ែបៃហ្សង់ នឹងផ្តល់អាហារូបករណ៍ដល់និស្សិតកម្ពុជា ចំនួន ៣កន្លែង ក្រោមកម្មវិធីអាហារូបករណ៍ “Heydar Aliyev-International Education Grand Program” សម្រាប់ឆ្នាំសិក្សា២០២៥-២០២៦ ដើម្បីទៅបន្តការសិក្សា ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ ថ្នាក់បណ្ឌិត ថ្នាក់វេជ្ជសាស្ត្រទូទៅ និងថ្នាក់ Medical Residency Programme សិក្សានៅសាធារណរដ្ឋអាស៊ែបៃហ្សង់។
បើតាមក្រសួងអប់រំ ភាគីសាធារណរដ្ឋអាស៊ែបៃហ្សង់ នឹងផ្តល់ជូនថ្លៃសិក្សា សំបុត្រយន្តហោះ ប្រាក់ឧបត្ថម្ភ ការស្នាក់នៅ អាហារហូបចុក ថ្លៃធានារ៉ាប់រងសុខភាព ទិដ្ឋាការ និងថ្លៃចុះឈ្មោះចូលរៀន។
លក្ខខណ្ឌនៃការចុះឈ្មោះ ៖ បេក្ខជនទាំងពីរភេទត្រូវមាន សញ្ជាតិខ្មែរ, អាយុក្រោម ៣៥ឆ្នាំ សម្រាប់បេក្ខជនថ្នាក់បរិញ្ញាបត្រ និងថ្នាក់វេជ្ជសាស្ត្រទូទៅ, អាយុក្រោម ៤០ឆ្នាំ សម្រាប់បេក្ខជនថ្នាក់បរិញ្ញាបត្រជាន់ខ្ពស់ និងថ្នាក់ Medical Residency Programme, អាយុក្រោម ៤៥ឆ្នាំ សម្រាប់បេក្ខជនថ្នាក់បណ្ឌិត, ត្រូវមានសញ្ញាបត្រ ឬព្រឹត្តិបត្រពិន្ទុពីវិទ្យាល័យ សាកលវិទ្យាល័យ (ថតចម្លង), វិញ្ញាបនបត្រភាសាអង់គ្លេសកម្រិត IELTS 5.0 ឬ TOEFL 40 សម្រាប់បេក្ខជនថ្នាក់បរិញ្ញាបត្រ, វិញ្ញាបនបត្រភាសាអង់គ្លេសកម្រិត IELTS 5.5 ឬ TOEFL 50 សម្រាប់បេក្ខជនបួនកម្រិតផ្សេងទៀតក្រៅពីថ្នាក់បរិញ្ញាបត្រ, CV ឬ Resume និងលិខិតឆ្លងដែនថតចម្លង, លិខិតចំណាប់អារម្មណ៍លើកម្មវិធីអាហារូបករណ៍ (Motivation Letter), សុខភាពល្អបរិបូណ៌ទាំងកាយសម្បទា និងសតិបញ្ញា (ភ្ជាប់លិខិតបញ្ជាក់អំពី HIV/AIDS និងជំងឺរលាកថ្លើមប្រភេទ B និង C)។
ការដាក់ពាក្យសុំអាហារូបករណ៍ ៖ បេក្ខជនទាំងពីរភេទ ដែលមានចំណាប់អារម្មណ៍ចង់ចូលរួមកម្មវិធីអាហារូបករណ៍ខាងលើ ត្រូវបំពេញពាក្យ សុំអាហារូបករណ៍ និងឯកសារផ្សេងៗ ដែលមាននៅក្នុងគេហទំព័រ https://studyinazerbaijan.edu.az/financial-support រួចយកសំណុំឯកសារ (Hard copy) ដែលបានបំពេញរួច ទៅដាក់នៅការិយាល័យសហប្រតិបត្តិការទ្វេភាគី និង ពហុភាគី នៃក្រសួងអប់រំ យុវជន និងកីឡា ដែលមានអាសយដ្ឋាន អគារលេខ៨០ មហាវិថីព្រះនរោត្តម ស្ថិតក្នុង ទីស្តីការក្រសួងអប់រំ យុវជន និងកីឡា ឱ្យបានមុនថ្ងៃទី១២ ខែឧសភា ឆ្នាំ២០២៥ ដើម្បីចាត់ចែងបន្ត។
ចំពោះព័ត៌មានលម្អិតទាក់ទងនឹងកម្មវិធីអាហារូបករណ៍នេះ សូមទាក់ទងតាមរយៈលេខទូរសព្ទមន្ត្រីទទួលបន្ទុក ០៩៥ ៦២៤ ៨៩៥ ឬ អ៊ីម៉ែលទៅកាន់ scholars@mfa.gov.az ឬ info@studyinazerbaijan.edu.az៕
