យុវជនខ្មែរពីររូប ជានិស្សិតឆ្នាំទី២ ផ្នែកវិស្វកម្មអគ្គិសនី នៃវិទ្យាស្ថានអភិវឌ្ឍន៍មុខជំនាញកម្ពុជា-ថៃ បានសហការគ្នាបង្កើតម៉ាស៊ីនចិតដូងខ្ចី ប្រើរយៈពេលខ្លីចិតដូងបានស្អាត ដោយក្នុងមួយថ្ងៃអាចចិតបាន៦០០រយផ្លែ។

យុវជន ជុំ វិច្ឆិកា បានប្រាប់ឱ្យដឹងថា ការសហការគ្នាបង្កើតម៉ាស៊ីនចិតដូងខ្ចីនេះឡើង ដោយសារចង់ប្រើប្រាស់ចំណេះដឹងដែលខ្លួនបានរៀនមកអនុវត្តជាក់ស្តែង។ លើសពីនេះ ដើម្បីចូលរួមជួយសម្រួលដល់ការលំបាករបស់អាជីវករលក់ដូង អាចងាយស្រួលចិតដូងរហ័សជាងមុន និងមិនរង់ចាំយូរ។

និស្សិតឆ្នាំទី២ ផ្នែកវិស្វកម្មអគ្គិសនី នៃវិទ្យាស្ថានអភិវឌ្ឍន៍មុខជំនាញកម្ពុជា-ថៃ រូបនេះ បន្ថែមថា លក្ខណៈពិសេសរបស់ម៉ាស៊ីនចិតដូងខ្ចីនេះ គឺម៉ាស៊ីនអាចចិតដូងមួយផ្លែសម្រេចជាលទ្ធផល ប្រើរយៈពេលត្រឹមតែមួយនាទីប៉ុណ្ណោះ ដូច្នេះក្នុងរយៈពេលមួយថ្ងៃម៉ាស៊ីនអាចចិតដូងបានចម្លោះពី ៥០០ទៅ៦០០ផ្លែ។

ជុំ វិច្ឆិកា បញ្ជាក់បន្ថែមថា ការបង្កើតម៉ាស៊ីនចិតដូងខ្ចី ជាលើកដំបូងនេះ ប្រើរយៈពេលមួយខែពេញ។ វិច្ឆិកា បន្តថា នៅក្នុងដំណើរការបង្កើតម៉ាស៊ីនចិតដូងខ្ចីនេះ ចែកចេញជា ៣ដំណាក់កាល គឺដំណាក់កាលទី១ ការធ្វើគ្រោងម៉ាស៊ីន, ដំណាក់កាលទី២ ការធ្វើមុខកាំបិត និងមុំ, ដំណាក់កាលទី៣ ការដំឡើងផ្នែកប្រព័ន្ធអគ្គិសនី និងគ្រឿងម៉ាស៊ីន។

ចំពោះផលលំបាក ក្នុងការបង្កើតម៉ាស៊ីនចិតដូងខ្ចីនេះ ជុំ វិច្ឆិកា និយាយថា នេះជាគម្រោងលើកដំបូងរបស់ក្រុមខ្លួន ទើបជួបការលំបាកច្រើនដែលត្រូវចេះជំនាញមេកានិច ហើយត្រូវចេះកំណត់ កម្លាំងម៉ូទ័រមិនឱ្យលឿនពេក ឬយឺតពេក។ លើសពីនេះ ម៉ាស៊ីនចិតដូងខ្ចីនេះ ទម្រាំអាចចិតដូងបានស្អាត គឺបានតេស្តសាកល្បងប្រមាណ២០ ទៅ៣០ដង។

ជាមួយគ្នានេះ យុវជន ហៃ សុភ័ក្ត និស្សិតឆ្នាំទី២ ផ្នែកវិស្វកម្មអគ្គិសនី នៃវិទ្យាស្ថានអភិវឌ្ឍន៍មុខជំនាញកម្ពុជា-ថៃ ដែលចូលរួមក្នុងគម្រោងនេះ បានប្រាប់បន្ថែមថា កាលពីមុនអ្នកលក់ដូង ចិតដូងដោយប្រើដៃ ចំណាយពេលយូរ ទើបក្រុមខ្លួន​មានគោលគំនិតសហការគ្នា បង្កើតម៉ាស៊ីនចិតដូងនេះឡើង ដោយ​ប្រើកម្លាំងមេកានិចដែលអាចប្រើរយៈពេលខ្លី ចិតដូងបានស្អាត និងលឿនរហ័ស។

ហៃ សុភ័ក្ត បញ្ជាក់ដែរថា ការបង្កើតម៉ាស៊ីនចិតដូងខ្ចីនេះ ចំណាយថវិកាអស់ប្រមាណ ៥០០ដុល្លារ ដោយសារសម្ភារៈប្រើប្រាស់ដូចជា ម៉ូទ័រមានតម្លៃថ្លៃ។ សុភ័ក្ត បន្តថា ប្រសិនមានម្ចាស់អាជីវករ ចាប់អារម្មណ៍ចង់បានយកទៅប្រើប្រាស់ ខ្លួន​នឹងសហការគ្នាដំឡើងម៉ាស៊ីនចិតដូងខ្ចីនេះជូនបាន។

សម្រាប់គម្រោងនៅថ្ងៃខាងមុខ វិច្ឆិកា និងសុភ័ក្ត នឹងបន្តកែលម្អ ម៉ាស៊ីនចិតដូងខ្ចីនេះ ដោយប្រើប្រព័ន្ធ PLC ដើម្បីកំណត់កម្មវិធីគ្រប់គ្រងប្រព័ន្ធម៉ាស៊ីនដោយស្វ័យប្រវត្តិ ធ្វើយ៉ាងណាឱ្យម៉ាស៊ីនដំណើរការកាន់តែលឿនជាងមុន ចំណាយថវិកាតិចក្នុងការផលិត និងទំហំតូចជាងមុន៕