សាកលវិទ្យាល័យ Shanghai Jiao Tong University (SJTU) ដែលជាគ្រឹះស្ថានសិក្សាដ៏ល្បីល្បាញលំដាប់កំពូលនៅក្នុងទីក្រុងស៊ាងហៃ ប្រទេសចិន កំពុងប្រកាសជ្រើសរើសនិស្សិតអន្តរជាតិ ដើម្បីទទួលអាហារូបករណ៍រដ្ឋាភិបាលចិន (CSC Type B) សម្រាប់ឆ្នាំសិក្សាថ្មី។

កម្រិតសិក្សាដែលផ្តល់ជូន ​ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត ទៅលើជំនាញ ដូចជា វិទ្យាសាស្ត្រសម្ភារៈ និងវិស្វកម្ម, វិស្វកម្មអគ្គិសនី, ស្វ័យប្រវត្តិកម្ម និងការវាស់វែងឆ្លាតវៃ, វិទ្យាសាស្ត្រកុំព្យូទ័រ, វិស្វកម្មមេកានិក និងជំនាញជាច្រើនទៀត។

អត្ថប្រយោជន៍​ដែលទទួលបានពីអាហារូបករណ៍ ៖ ថ្លៃសិក្សា, ប្រាក់ឧបត្ថម្ភប្រចាំខែ, កន្លែងស្នាក់នៅ, ការធានារ៉ាប់រងសុខភាព។

កម្មវិធីសិក្សា​ផ្តល់ជូនទាំង២ភាសា គឺភាសាអង់គ្លេស និង​ភាសាចិន។

លក្ខខណ្ឌ និងឯកសារតម្រូវ

ដើម្បីដាក់ពាក្យស្នើសុំ បេក្ខជនត្រូវរៀបចំឯកសារសំខាន់ៗដូចខាងក្រោម៖

១. ពាក្យសុំអាហារូបករណ៍ ៖ បំពេញព័ត៌មានតាមរយៈគេហទំព័រ CSC Online Application
https://studyinchina.csc.edu.cn/#/login
(ជ្រើសរើស Type B និងលេខកូដសាលា Agency Number: 10248)។

២. គម្រោងសិក្សា ឬ សេចក្តីថ្លែងការណ៍ផ្ទាល់ខ្លួន ៖ រួមជាមួយប្រវត្តិរូបសង្ខេប (CV)។

៣. លិខិតបញ្ជាក់ការសិក្សា (Academic Record): ព្រឹត្តិបត្រពិន្ទុដើម (Original Transcript)។

៤. សញ្ញាបត្រ ៖ សេចក្តីចម្លងសញ្ញាបត្រ ឬលិខិតបញ្ជាក់ការសិក្សាចុងក្រោយបង្អស់។

៥. លិខិតណែនាំ (Reference Letters): ចំនួន ០២ ច្បាប់ (ពីសាស្ត្រាចារ្យ ឬសាស្ត្រាចារ្យរង)។

៦. វិញ្ញាបនបត្រភាសា៖ សម្រាប់កម្មវិធីសិក្សាជាភាសាចិន ត្រូវ​មាន HSK កម្រិត 5 ឬ 6។ សម្រាប់កម្មវិធីសិក្សាជាភាសាអង់គ្លេស ត្រូវ​មាន វិញ្ញាបនបត្រ TOEFL, IELTS ឬលិខិតបញ្ជាក់ថាធ្លាប់សិក្សាជាភាសាអង់គ្លេសពីសាលាដើម។

៧. លិខិតឆ្លងដែន (Passport) ដែលមានសុពលភាព។

៨. លិខិតបញ្ជាក់ការពិនិត្យសុខភាព (Foreigner Physical Examination Form) និងលិខិតបញ្ជាក់ការមិនមានទោសទណ្ឌ (Non-criminal record)។

ចាប់ទទួលពាក្យពីថ្ងៃនេះ ផុតកំណត់នៅថ្ងៃទី១៥ ខែកុម្ភៈ ឆ្នាំ២០២៦

សម្រាប់ព័ត៌មានបន្ថែម សូមចូលទៅកាន់ការិយាល័យអាហារូបករណ៍របស់សាកលវិទ្យាល័យ https://global.sjtu.edu.cn/en/ ៕