ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការគេង គឺជាកត្តាដ៏សំខាន់បំផុតមួយសម្រាប់ទ្រទ្រង់សុខភាពរាងកាយ និងស្មារតីរបស់មនុស្សយើង។ ការទទួលបានការគេងលក់ដ៏ស្កប់ស្កល់ពេញមួយយប់ មិនត្រឹមតែជួយឱ្យរាងកាយមានថាមពលឡើងវិញនោះទេ ប៉ុន្តែវាក៏ជួយពង្រឹងប្រព័ន្ធការពាររាងកាយ និងមុខងារខួរក្បាលផងដែរ។ ទោះជាយ៉ាងណាក៏ដោយ នៅពេលដែលធាតុអាកាសឡើងកម្តៅខ្លាំង វាតែងតែបង្កជាការរំខានដ៏ធំមួយ ដែលធ្វើឱ្យយើងពិបាកក្នុងការគេង ធ្វើឱ្យគេងមិនលក់ ឬគេងភ្ញាក់ៗពាក់កណ្តាលយប់។
បច្ចុប្បន្ននេះ បញ្ហារលកកម្តៅមិនត្រឹមតែកើតមានឡើងនៅក្នុងប្រទេសកម្ពុជានោះទេ សូម្បីតែបណ្តាប្រទេសនៅតំបន់អឺរ៉ុប ដូចជាចក្រភពអង់គ្លេស បារាំង អេស្ប៉ាញ និងអាឡឺម៉ង់ ក៏កំពុងជួបប្រទះនូវការកើនឡើងកម្តៅយ៉ាងខ្លាំងរហូតដល់កម្រិតប្រកាសអាសន្ន និងបំបែកកំណត់ត្រាសីតុណ្ហភាពទាំងថ្ងៃទាំងយប់ ដែលបង្កផលប៉ះពាល់យ៉ាងធ្ងន់ធ្ងរដល់សុខភាព និងការរស់នៅរបស់ប្រជាជន។ អ្នកវិទ្យាសាស្ត្របានបង្ហាញថា បាតុភូតរលកកម្តៅដែលកើតឡើងញឹកញាប់ និងអូសបន្លាយពេលយូរនេះ គឺជាសញ្ញាសម្គាល់នៃការឡើងកម្តៅផែនដី ដែលភាគច្រើនបណ្តាលមកពីសកម្មភាពមនុស្ស ដូចជាការដុតធ្យូងថ្ម ប្រេង និងឧស្ម័ន។
ដើម្បីដោះស្រាយបញ្ហាប្រឈមនេះ យោងតាមការណែនាំពីសារព័ត៌មាន BBC និងស្ថាប័នសុខភាពជាតិអង់គ្លេស (NHS UK) យើងអាចអនុវត្តនូវគន្លឹះងាយៗចំនួន ៥ យ៉ាងដូចខាងក្រោម ដើម្បីជួយឱ្យគេងលក់ស្រួល ក្នុងអំឡុងពេលអាកាសធាតុក្តៅ៖
១. ជៀសវាងការគេងថ្ងៃច្រើនពេក
ជាទូទៅ អាកាសធាតុក្តៅខ្លាំងអាចធ្វើឱ្យរាងកាយរបស់អ្នកប្រើប្រាស់ថាមពលកាន់តែច្រើន ដើម្បីគ្រប់គ្រង និងរក្សាសីតុណ្ហភាពខាងក្នុងឱ្យមានតុល្យភាព ដែលជាហេតុធ្វើឱ្យអ្នកមានអារម្មណ៍អស់កម្លាំង និងងងុយគេងនៅពេលថ្ងៃ។ ទោះជាយ៉ាងណាក៏ដោយ ប្រសិនបើដំណេករបស់អ្នកត្រូវបានរំខាននៅពេលយប់ ចូរព្យាយាមជៀសវាងការគេងពេលថ្ងៃច្រើនពេក ឬយូរពេក ព្រោះវាអាចប៉ះពាល់ និងធ្វើឱ្យអ្នកកាន់តែពិបាកគេងលក់នៅពេលយប់។
២. រក្សាទម្លាប់នៃការគេងឱ្យបានជាប់លាប់
អាកាសធាតុក្តៅអាចជំរុញចិត្តឱ្យអ្នកចង់ផ្លាស់ប្តូរទម្លាប់រស់នៅមួយចំនួន ប៉ុន្តែការធ្វើបែបនេះអាចរំខានដល់នាឡិកាជីវសាស្ត្ររបស់រាងកាយ។ ចូរព្យាយាមរក្សាទម្លាប់ចូលគេង និងក្រោកពីគេងឱ្យបានទៀងទាត់ដូចពេលធម្មតា។ បន្ថែមពីនេះ មុនពេលចូលគេង អ្នកគួរបង្កើតទម្លាប់ដែលជួយឱ្យខួរក្បាលសម្រាក ដូចជា ការផ្តាច់ខ្លួនចេញពីទូរស័ព្ទដៃ ឬឧបករណ៍អេឡិចត្រូនិក ហើយជំនួសមកវិញនូវការអានសៀវភៅ ឬការសរសេរកំណត់ហេតុខ្លីៗ ដើម្បីឱ្យស្មារតីបានធូរស្រាល។
៣. ជ្រើសរើសសម្លៀកបំពាក់រលុងៗ និងធ្វើពីសរសៃធម្មជាតិ
ការជ្រើសរើសសម្លៀកបំពាក់សម្រាប់គេងពិតជាមានសារៈសំខាន់ណាស់ក្នុងការគ្រប់គ្រងកម្តៅ។ អ្នកគួរតែស្លៀកសម្លៀកបំពាក់ដែលមានលក្ខណៈរលុងទូលាយ និងផលិតចេញពីសរសៃសូត្រធម្មជាតិ ដូចជាក្រណាត់កប្បាស (Cotton) ឬក្រណាត់ទេសឯក (Linen)។ សាច់ក្រណាត់ប្រភេទនេះមានសមត្ថភាពជួយសម្រួលដល់ខ្យល់ចេញចូលបានល្អ និងជួយស្រូបសំណើមពីស្បែក ដែលធ្វើឱ្យរាងកាយរបស់អ្នកមានអារម្មណ៍ត្រជាក់ស្រួល។
៤. រក្សាជាតិទឹកក្នុងខ្លួន និងកម្រិតភេសជ្ជៈរំញោច
ការញ៉ាំទឹកឱ្យបានគ្រប់គ្រាន់ពេញមួយថ្ងៃគឺជារឿងចាំបាច់ដើម្បីការពាររាងកាយពីការខ្សោះជាតិទឹក។ ប៉ុន្តែ អ្នកគួរតែជៀសវាងការញ៉ាំទឹកច្រើនពេកនៅពេលជិតចូលគេង ព្រោះវាអាចធ្វើឱ្យអ្នកភ្ញាក់ឡើងដើម្បីចូលបន្ទប់ទឹកនៅពាក់កណ្តាលយប់។ អ្វីដែលត្រូវប្រុងប្រយ័ត្នបន្ថែម គឺការជៀសវាងភេសជ្ជៈដែលមានផ្ទុកជាតិកាហ្វេអ៊ីនខ្ពស់ (ដូចជាកាហ្វេ ឬតែក្រាស់ៗ) ព្រោះវាជួយរំញោចប្រព័ន្ធសរសៃប្រសាទកណ្តាល ធ្វើឱ្យស្មារតីស្វាង និងពិបាកគេង។ ស្របពេលជាមួយគ្នានេះដែរ គួរជៀសវាងការពិសាគ្រឿងស្រវឹងច្រើនពេក ទោះបីជាគ្រឿងស្រវឹងអាចធ្វើឱ្យងងុយគេងភ្លាមៗក៏ពិតមែន ប៉ុន្តែវាបំផ្លាញគុណភាពនៃការគេង និងជំរុញឱ្យអ្នកភ្ញាក់ពីព្រលឹមពេកទាំងមិនទាន់ស្កប់ស្កល់។
៥. ងូតទឹកក្តៅឧណ្ហៗមុនពេលចូលគេង
ការងូតទឹកមុនពេលចូលគេងគឺជាវិធីសាស្ត្រដ៏ប្រសើរមួយ។ ទោះជាយ៉ាងណាក៏ដោយ ស្ថាប័ន NHS របស់ចក្រភពអង់គ្លេស បានណែនាំឱ្យជ្រើសរើសការងូតទឹកដែលមានសីតុណ្ហភាពក្តៅឧណ្ហៗ ជាជាងការងូតទឹកដែលត្រជាក់ខ្លាំង។ មូលហេតុគឺដោយសារតែទឹកដែលត្រជាក់ពេក នឹងទៅជំរុញលំហូរចរន្តឈាមរត់ឱ្យកាន់តែលឿន ដែលអាចធ្វើឱ្យសីតុណ្ហភាពខាងក្នុងរាងកាយរបស់អ្នកកើនឡើងខ្ពស់ជាងមុនបន្ទាប់ពីងូតទឹករួច។ ការងូតទឹកក្តៅឧណ្ហៗនឹងជួយឱ្យរាងកាយចុះត្រជាក់បន្តិចម្តងៗតាមធម្មជាតិ និងជួយឱ្យសាច់ដុំសម្រាកបានល្អ។
តាមរយៈការអនុវត្តនូវគន្លឹះសុខភាពទាំង ៥ យ៉ាងនេះ លោកអ្នកនឹងអាចការពាររាងកាយពីការរំខាននៃអាកាសធាតុក្តៅ និងទទួលបានការគេងលក់ដ៏ស្កប់ស្កល់ ដើម្បីត្រៀមថាមពលសម្រាប់ថ្ងៃថ្មីប្រកបដោយសុខភាពល្អបរិបូរណ៍៕
