លោកស្រី ឆាម វិច្ឆិកា គឺជា​បុគ្គលិកក្រុមហ៊ុន​ឯកជន​មួយ​ក្នុង​រាជធានីភ្នំពេញ, កាលពីចុងសប្តាហ៍​កន្លងទៅនេះ លោកស្រី បាន​នាំ​យក​កូនរុក្ខជាតិជាច្រើន​​មក​តាំងលក់​​ក្នុង​កម្មវិធី ពិព័រណ៍រុក្ខជាតិ និងសួនច្បារភ្នំពេញលើកទី៥។ លោកស្រី វិច្ឆិកា និយាយថា កូនរុក្ខជាតិលម្អបានជួយ​ដល់ការកែប្រែអារម្មណ៍តានតឹង និងសុខភាពផ្លូវចិត្ត​របស់លោកស្រី, លោកស្រីបាន​ដឹងពីអត្ថប្រយោជន៍​របស់វា នៅកំឡុង​ពេលនៃការ​ផ្ទុះរីករាលដាល​ជំងឺកូវីដ១៩ ដែល​តម្រូវ​ឱ្យ​លោកស្រីនៅ​តែក្នុងផ្ទះ។ ចាប់តាំងពីពេលនោះមក លោកស្រីចាប់ផ្ដើមស្រឡាញ់ការដាំកូនរុក្ខជាតិ ហើយ​បច្ចុប្បន្នលោកស្រី​នៅ​តែបន្តដាំ និងឆ្លៀតលក់នៅតាម Online ក្រោយ​ពី​បញ្ចប់​ការ​ងារពេញ​ម៉ោង​របស់លោកស្រីថែមទៀត។

បើតាម​លោកស្រី ឆាម វិច្ឆិកា កូនរុក្ខជាតិលម្អ មិនបានប៉ះពាល់ដល់ពេលវេលាលោកស្រីច្រើន​ប៉ុន្មានឡើយ ពោល​គឺ​លោកស្រីចំណាយពេល​នៅថ្ងៃចុងសប្ដាហ៍ដើម្បី​ដាំរុក្ខជាតិទាំងនោះ ហើយ​នៅពេល​លោកស្រី​ផ្ចង់អារម្មណ៍ក្នុងការថែទាំ និង​ចាប់ដីដាំកូនរុក្ខជាតិទាំងនោះ លោកស្រីហាក់មានសន្តិភាពផ្លូវចិត្ត អារម្មណ៍ស្រស់ស្រាយ និងស្រឡះខួរក្បាល។ ក្រៅពីការដាំ ថែទាំ និងបំបែកកូន ការរង់ចាំមើលលទ្ធផលនៃការបង្កាត់កូនរុក្ខជាតិនីមួយៗ ក៏​បានធ្វើឱ្យលោកស្រីសប្បាយចិត្តមួយបែបដែរ ព្រោះនៅពេលដែលកូនរុក្ខជាតិចេញមក តែងតែផ្ដល់ស្លឹកមានពណ៌ និងរូបរាងខុសៗគ្នា។

លើសពីជួយសុខភាពផ្លូវចិត្ត លោកស្រី វិច្ឆិកា ក៏បានលើកឡើងពីអត្ថប្រយោជន៍របស់រុក្ខជាតិទាំងនោះ ដោយវាបានជួយ​បន្សុតខ្យល់នៅក្នុងផ្ទះ បន្ទប់ទឹក បន្ទប់គេង និងក្នុងបរិវេនផ្សេងៗនៃគេហដ្ឋានទៀតផង។ ការបន្សុតខ្យល់ទាំងនោះ អាចជួយឱ្យអ្នករស់នៅក្នុងផ្ទះ​មានអារម្មណ៍ល្អ ខណៈពួកវា​អាចស្រូបជាតិពុលពីបរិយាកាស ហើយ​ធ្វើឱ្យបរិយាកាសក្នុងផ្ទះកាន់តែស្រស់ស្រាយ។

“នៅពេលដែលដៃនៅជាមួយដី ហើយចាប់កាន់រុក្ខជាតិលាយឡំគ្នា អាចធ្វើឱ្យអារម្មណ៍ប្រែប្រួល និងទម្លាក់ចោលភាពតានតឹងបានច្រើន”

លោកស្រី ឆាម វិច្ឆិកា

រុក្ខជាតិដែលលោកស្រី វិច្ឆិកា បានដាំភាគច្រើនជាអម្បូរ Monstera ច្រើនប្រភេទលើកលែងតែប្រភេទកេសកូលព្រោះជារុក្ខជាតិដែលត្រូវការទីតាំងដាំ និងពិបាកក្នុងការមើលថែទាំ។ ជាទូទៅអម្បូរ​ Monstera ឬប្រភេទប្រទាលបន្សុតខ្សល់នេះ ងាយស្រួលដាំ និងថែទាំ ដោយអ្នកមិនសូវដឹងពីបច្ចេកទេសដាំ និងមិនមានថវិកាច្រើនក៏អាចចាប់ផ្ដើមដាំបានដែរ។

យោង​តាម ឯកសាររបស់ NASA Clean Air Study បានបង្ហាញថា អម្បូររុក្ខជាតិ Monstera គឺជាប្រភេទរុក្ខជាតិក្នុងផ្ទះដ៏ពេញនិយមមួយនាពេលបច្ចុប្បន្ន។ ក្រៅពីភាពស្រស់ស្អាតនៃរូបរាងស្លឹករបស់វា Monstera ក៏មានអត្ថប្រយោជន៍ជាច្រើនទៀតសម្រាប់បរិស្ថានក្នុងផ្ទះផងដែរ ដូចជាវាមានសមត្ថភាពអាចជួយបន្សុទ្ធខ្យល់ក្នុងផ្ទះ ស្រូបយកជាតិពុលមួយចំនួនដូចជា ហ្វកម៉ាល់ដឺអ៊ីដ (formaldehyde) និង បេនហ្សេន (benzene) ដែលមាននៅក្នុងសារធាតុគីមីប្រើប្រាស់ប្រចាំថ្ងៃ, ជួយកាត់បន្ថយបញ្ហាអាលែកហ្ស៊ី និងធ្វើឱ្យបរិយាកាសក្នុងផ្ទះកាន់តែល្អប្រសើរ។ ភាពបៃតងស្រស់របស់ Monstera ក៏អាចផ្ដល់នូវអារម្មណ៍ស្រស់ស្រាយ និងជួយបង្កើតបរិយាកាសវិជ្ជមានសម្រាប់ក្នុងរស់នៅ​ក្នុងផ្ទះផងដែរ។

យ៉ាងណាក៏ដោយ​ក្នុងនាមជាអ្នកចូលចិត្តដាំកូនរុក្ខជាតិ ដែលជាចំណែកមួយ នៃការដាំដើមឈើ លោកស្រី ឆាម វិច្ឆិកា លើកទឹកចិត្តដល់គ្រប់គ្នាឱ្យស្រឡាញ់ និងងាកមកដាំដុះ ថែទាំ កូនរុក្ខជាតិនៅក្នុងបន្ទប់ ឬរុក្ខជាតិនៅក្នុងបរិវេណផ្ទះ ដែលអាចជួយដល់សុខភាពផ្លូវចិត្ត លម្អក្នុងផ្ទះ និងដើម្បីជួយដល់បរិស្ថានប្រឆាំង​នឹង​ការប្រែប្រួលអាកាសធាតុ៕