ក្នុងដំណាក់កាលនៃវ័យជំទង់ យុវវ័យមានតម្រូវការដ៏ចាំបាច់ក្នុងការផ្តោតជាអាទិភាពលើការសិក្សា រៀនជំនាញ ដុសខាត់សមត្ថភាព និងរុករកសកត្តានុពលផ្ទាល់ខ្លួន ដើម្បីត្រៀមខ្លួនសម្រាប់អនាគត។ នៅក្នុងយុគសម័យឌីជីថលនេះ បណ្តាញសង្គម បានក្លាយជាកន្លែងដ៏សំខាន់មួយដែលផ្តល់ការផ្សារភ្ជាប់ទំនាក់ទំនង និងការកម្សាន្ត។ ប៉ុន្តែជាមួយគ្នានោះ កម្មវិធីទាំងនេះត្រូវបានរៀបចំឡើងយ៉ាងប៉ិនប្រសប់ដើម្បីទាក់ទាញឱ្យមនុស្ស ជក់ចិត្តដិតអារម្មណ៍ និងលង់លក់នឹងការប្រើប្រាស់វាអស់ជាច្រើនម៉ោងដោយមិនដឹងខ្លួន។ ការប្រើប្រាស់លើសលប់នេះ មិនត្រឹមតែបំផ្លាញពេលវេលាដ៏មានតម្លៃរបស់យុវវ័យប៉ុណ្ណោះទេ ប៉ុន្តែវាក៏បានក្លាយជាកត្តាដ៏ធ្ងន់ធ្ងរដែល ប៉ះពាល់ដល់សុខភាពផ្លូវចិត្ត របស់ពួកគេថែមទៀតផង។

តាមរយៈគេហទំព័រ The University of Queensland បានឱ្យដឹងថា នៅពេលដែលយុវជនប្រើប្រាស់បណ្តាញសង្គមច្រើន អាចជំរុញឱ្យមានសញ្ញានៃការប៉ះពាល់សុខភាពផ្លូវចិត្តមួយចំនួន និងស្តែងចេញតាមអាការបាក់ទឹកចិត្ត​​ ភាពតានតឹង, ​​ថប់បារម្ភ , ឯកោមិនចុះចូលក្នុងសង្គម, ​ការប្រៀបធៀបជីវិតខ្លួនឯងទៅនឹងអ្នកដទៃ បង្កើនអារម្មណ៍មិនសុខចិត្តជាមួយនឹងរបៀបរស់នៅរបស់ខ្លួនជាដើម។

ការបាក់ទឹកចិត្ត និងថប់បារម្ភ ៖​ ការប្រើប្រាស់បណ្តាញសង្គមលើសលប់ នាំឱ្យបង្កើតបាននូវភាពសោកសៅ បាក់ទឹកចិត្ត និងថប់បារម្ភ គេអាចកត់សម្គាល់តាមរយៈសញ្ញាដូចជា ចាប់ផ្តើមភ័យៗ ឬបារម្ភខ្លាំងទៅលើការវិវឌ្ឍន៍របស់ខ្លួន មិនថាបញ្ហាសុខភាព ភាពនឹងធឹងនៃហិរញ្ញវត្ថុ ការបារម្ភអំពីឱកាសការងារ និងភាពចូលចុះក្នុងសង្គមជាដើម។

ការភ័យបារម្ភលើសលប់ទាំងនេះ អាចបណ្តាលមកពីការតាមដានមាតិកាដែលបង្ហាញនៅក្នុងសង្គម ដែលពោរពេញទៅដោយភាពស៊ីវិល័យ ភាពជោគជ័យ ភាពល្អឥតខ្ចោះនៃរូបភាពនីមួយៗ និងការរស់នៅដ៏ទំនើបសម្បូរបែបរបស់មនុស្សជុំវិញខ្លួនជាដើម។ នៅពេលដែលតាមដានច្រើនពេក អាចធ្វើឱ្យយុវវ័យមិនមានពេលគ្រប់គ្រាន់ក្នុងការឆ្លុះបញ្ចាំង និងវិភាគអំពីតថភាពពិតថា អ្វីដែលមាននៅក្នុងបណ្តាញសង្គមវាជាជ្រុងមួយនៃដំណើររបស់បុគ្គលម្នាក់ៗប៉ុណ្ណោះ ដែលនេះហើយបង្កទៅជាការប្រៀបធៀប និងមិនពេញចិត្តជាមួយនឹងដំណើរជីវិតផ្ទាល់ខ្លួនថា តើក្នុងដំណាក់កាលជាយុវវ័យត្រូវ​ផ្តោតលើ​អ្វីឱ្យពិតប្រាកដទើបមានប្រសិទ្ធភាព និងឆ្លើយតបជាមួយគោលដៅក្នុងរយៈពេលខ្លី និងរយៈពេលវែង។

កម្រិតនៃការស្គាល់ពីគុណតម្លៃខ្លួនឯងធ្លាក់ចុះ ៖ កត្តាដែលបណ្តាញសង្គមប៉ះពាល់ទៅកាន់សុខភាពផ្លូវចិត្ត និងកម្រិតនៃការស្គាល់ពីគុណតម្លៃខ្លួនឯងធ្លាក់ចុះ គឺដោយសារសមត្ថភាព នៃការថ្លឹងថ្លែងអំពីមាតិកាក្នុងបណ្តាញសង្គមនៅមានកម្រិត។ អ្នកផលិតមាតិកា តារាល្បីៗ ឬអ្នកមានឥទ្ធិពលបានខ្នះខ្នែងក្នុងការផលិតមាតិកា ដែលធ្វើយ៉ាងណាដើម្បីបង្កើនប្រជាប្រិយភាពតាមដែលអាចធ្វើបាន ខណៈអ្នកតាមដាន ជាពិសេសមនុស្សក្នុងវ័យជំទង់ប្រតិបត្តិតាមទាំងស្រុង ជាជាងការមើលដើម្បីកម្សាន្ត ឬជាព័ត៌មាន និងចំណេះដឹង! ដោយសារតែភាពប្រណិតនៃការបង្ហាញតាមរយៈបណ្តាញសង្គម បានរុញច្រានឱ្យមនុស្ស​វ័យជំទង់យល់ថា ខ្លួនមិនដល់គេ មិនល្អដូចគេ និងបង្កើតទម្លាប់ប្រៀបធៀបយ៉ាងលឿនរហ័ស ហើយប៉ះពាល់ដល់សុខភាពផ្លូវចិត្តបន្តិចម្តងៗដោយមិនដឹងខ្លួន។

តើពេលណាដែលអាណាព្យាបាលគួរផ្តល់ការគាំទ្រ និងកំណត់ពេលប្រើប្រាស់ ៖ ដោយសារតែបណ្តាញសង្គមបានផ្តល់ទាំងផលវិជ្ជមានផង និងអវិជ្ជមានផង ជាហេតុត្រូវការឱ្យសង្កេតជាមុនសិន មុននឹងចូលជួយពួកគេ ព្រោះពេលខ្លះពួកគេក៏អាចប្រើប្រាស់វាក្នុងការផ្សារភ្ជាប់ទំនាក់ទំនងមិត្តរួមសាលាដើម្បីផ្លាស់ប្តូរយោបល់ ហើយពេលខ្លះទៀតក៏ប្រើប្រាស់ដើម្បីតាមដានព័ត៌មានអំពីការធ្វើបច្ចុប្បន្នភាពកម្មវិធីសិក្សា។ ដូច្នេះពេលវេលាដែលសាកសមបំផុតក្នុងការហាមឃាត់ ឬកាត់បន្ថយការប្រើប្រាស់ គឺនៅពេលដែលសង្កេតឃើញថា កូនៗ ឬកុមារដែលស្ថិតក្នុងបន្ទុកការថែទាំ កំពុងញៀននឹងការប្រើប្រាស់រហូតភ្លេចការសិក្សា និងការទទួលទានអាហារជាដើម ឬនៅពេលក្មេងប្រើប្រាស់ភាសាឆ្គាំងឆ្អង (តិះដៀល) នៅតាមបណ្តាណសង្គម ឬក៏មួយវិញទៀត នៅពេលដែលសង្កេតឃើញថា សុខភាពផ្លូវចិត្តនិងការផ្តោតលើការសិក្សាចាប់ផ្តើមធ្លាក់ថមថយ៕