ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – យុវតី ផល អរុណវតី ជាសិស្សថ្នាក់ទី៩ នៃវិទ្យាល័យវេស្ទើនអន្តរជាតិ រាជធានីភ្នំពេញ បានជាប់ជ័យលាភីលេខ១ ក្នុងការប្រឡងសិស្សពូកែទូទាំងប្រទេស ផ្នែករូបវិទ្យាថ្នាក់ទី៩ ។ នេះជាមោទនភាពមួយដែលយុវតីវ័យរូបនេះ បានខិតខំប្រឹងប្រែងរៀនសូត្ររហូតទទួលបានលទ្ធផលល្អសម្រាប់ខ្លួនឯង គ្រួសារ និងសង្គមជាតិ។
សិស្សពូកែទូទាំងប្រទេសផ្នែករូបវិទ្យាថ្នាក់ទី៩ រូបនេះបានឱ្យដឹងថា កត្តាដែលធ្វើឱ្យរូបគេជោគជ័យក្នុងការប្រឡងសិស្សពូកែទូទាំងប្រទេសផ្នែករូបវិទ្យា រួមមាន កត្តាខ្លួនឯង បានមកពីការខិតខំសិក្សាស្រាវជ្រាវស្វែងរកសំណួរ ឬលំហាត់ផ្សេងៗដែលទាក់ទងទៅនឹងមុខវិជ្ជាប្រឡង។ បន្ទាប់មក កត្តាសាលារៀន ដែលលោកគ្រូ អ្នកគ្រូ ខិតខំយកចិត្តទុកដាក់បង្រៀន គ្រួសារផ្ដល់ឱកាសឱ្យបានសិក្សារៀនសូត្រ និងមានមិត្តភក្ដិជំរុញលើកទឹកចិត្ត។
ជាមួយគ្នា យុវតីវ័យ១៦ឆ្នាំរូបនេះ ក៏បានផ្តល់ជាគន្លឹះសម្រាប់សិស្សានុសិស្សដែលចង់ចូលរួមប្រឡងសិស្សពូកែទូទាំងប្រទេសថ្នាក់ទី៩ គឺគួរត្រៀមខ្លួនចាប់តាំងពីថ្នាក់ទី៧ទៅ ដើម្បីទទួលបានគន្លឹះច្រើន ហើយប្រសិនចង់ប្រឡងសិស្សពូកែថ្នាក់ទី១២ គឺគួរត្រៀមខ្លួនចាប់តាំងពីដើមឆ្នាំទៅ។
“ប្រសិនបើយើងមានគ្រឹះរឹងមាំតាំងពីដើមឆ្នាំ នឹងអាចឈានដល់ការប្រឡងជាប់ជាសិស្សពូកែទូទាំងប្រទេសបាន”
ម្ចាស់ជ័យលាភីលេខ១ សិស្សពូកែទូទាំងប្រទេសផ្នែករូបវិទ្យាថ្នាក់ទី៩ រូបនេះ ក៏បានលើកទឹកចិត្តដល់យុវជនផ្សេងទៀតដែលមានបំណងចង់ចូលប្រឡងសិស្សពូកែ គឺត្រូវខិតខំស្រាវជ្រាវអំពីឯកទេសរបស់ខ្លួនឱ្យបានច្រើន ស្រាវជ្រាវទាំងសៀវភៅឬឯកសារជាភាសាខ្មែរផង និងភាសាអង់គ្លេសផង ដើម្បីទទួលបានគំនិតច្រើនអំពីសំណួរ និងលំហាត់ដែលអាចចេញក្នុងការប្រឡង។
គួរជម្រាបជូនថា ក្រសួងអប់រំ យុវជន និងកីឡា បានរៀបចំការប្រឡងសិស្សពូកែទូទាំងប្រទេសផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២ ក្នុងបំណងដើម្បីពង្រឹងគុណភាពអប់រំ និងអភិវឌ្ឍធនធានមនុស្សប្រកបដោយសីលធម៌។ សម្រាប់ឆ្នាំ២០២៣នេះ វិទ្យាល័យ នេត យ៉ង់ ស្ថិតក្នុងខេត្តបាត់ដំបង ត្រូវបានធ្វើជាមណ្ឌលប្រឡងសិស្សពូកែទូទាំងប្រទេស៕
