ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អគ្គលេខាធិការអង្គការសហប្រជាជាតិ លោកអាន់តូនីញ៉ូ ហ្គូទែរស៍( António Guterres) បានអំពាវនាវឱ្យប្រទេសទាំងអស់រួមគ្នាបង្កើតក្របខណ្ឌអភិបាលកិច្ចសកលសម្រាប់បញ្ញាសិប្បនិម្មិត (AI) ដោយព្រមានថា បច្ចេកវិទ្យានេះកំពុងវិវឌ្ឍក្នុងល្បឿនយ៉ាងលឿន និងអាចបង្កហានិភ័យធ្ងន់ធ្ងរដល់សន្តិសុខ សិទ្ធិមនុស្ស និងស្ថិរភាពសង្គម ប្រសិនបើគ្មានការគ្រប់គ្រងប្រកបដោយប្រសិទ្ធភាព។
ក្នុងកិច្ចសន្ទនាសកលលើកដំបូងរបស់អង្គការសហប្រជាជាតិស្តីពីអភិបាលកិច្ច AI នៅទីក្រុងហ្សឺណែវ ប្រទេសស្វីស លោក ហ្គូទែរស៍ បានលើកឡើងថា បន្ទះឈីប AI ដែលដើមឡើយត្រូវបានអភិវឌ្ឍសម្រាប់ការប្រើប្រាស់ស៊ីវិល កំពុងត្រូវបានយកទៅប្រើប្រាស់ក្នុងវិស័យយោធា ខណៈប្រព័ន្ធអាវុធស្វ័យប្រវត្តិ ឬ «មនុស្សយន្តឃាតករ» កំពុងក្លាយជាការពិតនៅលើសមរភូមិ។
លោកបានសង្កត់ធ្ងន់ថា កិច្ចព្រមព្រៀងអន្តរជាតិណាមួយស្តីពី AI ត្រូវតែអាចទទួលបានការជឿទុកចិត្តពីសហគមន៍អន្តរជាតិ និងផ្តល់អាទិភាពដល់សុវត្ថិភាព ជាពិសេសសម្រាប់កុមារ ដើម្បីការពារពួកគេពីការបោកបញ្ឆោត ការកេងប្រវ័ញ្ច និងការរំលោភបំពានតាមរយៈបច្ចេកវិទ្យាឌីជីថល។
ទន្ទឹមនឹងនេះ ប្រធានមហាសន្និបាតអង្គការសហប្រជាជាតិ លោកស្រី Annalena Baerbock ក៏បានអំពាវនាវឱ្យមានកិច្ចសហប្រតិបត្តិការជាសកល ដើម្បីទប់ស្កាត់ការប្រើប្រាស់ AI ក្នុងផ្លូវអវិជ្ជមាន។ លោកស្រីបានបង្ហាញថា ប្រហែល ៩៩ ភាគរយនៃមាតិកាឌីបហ្វេក (Deepfake) មានលក្ខណៈផ្លូវភេទ ខណៈ ៩៦ភាគរយផ្តោតលើស្ត្រី និងក្មេងស្រី ដែលឆ្លុះបញ្ចាំងពីការគំរាមកំហែងយ៉ាងធ្ងន់ធ្ងរចំពោះសិទ្ធិ សេចក្តីថ្លៃថ្នូរ និងសុវត្ថិភាពរបស់ពួកគេ។
លោក ហ្គូទែរស៍ ក៏បានអំពាវនាវឱ្យធានាថា ប្រទេសកំពុងអភិវឌ្ឍន៍ទទួលបានឱកាសស្មើគ្នាក្នុងការចូលប្រើ និងអភិវឌ្ឍបច្ចេកវិទ្យា AI ដើម្បីកាត់បន្ថយគម្លាតឌីជីថល។ លោកក៏បានជំរុញឱ្យមជ្ឈមណ្ឌលទិន្នន័យ AI ទូទាំងពិភពលោក ប្តូរមកប្រើប្រាស់ថាមពលកកើតឡើងវិញឱ្យបានពេញលេញនៅឆ្នាំ២០៣០ ដើម្បីកាត់បន្ថយផលប៉ះពាល់ដល់បរិស្ថាន។
លោកបានបញ្ជាក់ថា ទោះបី AI នឹងដើរតួនាទីកាន់តែសំខាន់ក្នុងអនាគតរបស់មនុស្សជាតិក៏ដោយ ការសម្រេចចិត្តចុងក្រោយត្រូវតែស្ថិតនៅក្នុងដៃមនុស្ស មិនមែនម៉ាស៊ីននោះទេ៕
