កុមារក្នុងវ័យ ៣ ដល់ ៥ ឆ្នាំ គឺជាវ័យដែលពោរពេញដោយការចង់ដឹងចង់ឃើញ មានការស្រមៃខ្ពស់ និងចូលចិត្តធ្វើសកម្មភាពច្រើន។ ទោះជាយ៉ាងណាក៏ដោយ វ័យនេះក៏ជាដំណាក់កាលដែលពួកគេ​ពិបាកគ្រប់គ្រងអារម្មណ៍ មួម៉ៅ និងមិនសូវចង់ធ្វើតាមការ​ណែនាំរបស់ឪពុកម្តាយ។

បើតាមគេហទំព័រ Parenting Tips មានគន្លឹះសំខាន់ៗ​មួយ​ចំនួន​ដែល​ឪពុកម្តាយ​អាច​យកទៅអនុវត្ត ដើម្បីជួយឱ្យកូនលូតលាស់បានល្អនៅក្នុងអំឡុងវ័យនេះ ៖

១. របបអាហារ និងអាហារូបត្ថម្ភ

កុមារវ័យនេះត្រូវការអាហាររូបត្ថម្ភចម្រុះ ដើម្បីទ្រទ្រង់រាងកាយ ដូច្នេះអាហារប្រចាំថ្ងៃរបស់ពួកគេ គួរផ្តល់ ៣ ពេល និងអាហារសម្រន់ ២ ពេល ដោយ​ផ្តោតលើបន្លែ ផ្លែឈើ សាច់ និងផលិតផលទឹកដោះគោដែលមានជាតិខ្លាញ់ទាប។ ហើយបើ​ចង់​ឱ្យ​កូនញ៉ាំបន្លែ មាតាបិតាគួរទទួលទានជាមួយកូន ដោយត្រូវញ៉ាំបន្លែបង្ហាញពួកគេ។

ជាមួយនឹងអាហារបីពេលនេះ ឪពុកម្តាយ​ក៏​ត្រូវ​ពិនិត្យ​កម្រិតកាឡូរីផងដែរ ដោយបើតាមការណែនាំរបស់ AAP កុមារត្រូវការកាឡូរីចន្លោះពី ១,២០០ ដល់ ២,០០០ កាឡូរី ក្នុងមួយថ្ងៃ (អាស្រ័យលើអាយុ និងសកម្មភាព)។

២. សកម្មភាពរាងកាយ និងការងារផ្ទះ

កុមារត្រូវការសកម្មភាពរាងកាយយ៉ាងតិច ៣ ម៉ោងក្នុងមួយថ្ងៃ (ក្នុងនោះ ១ ម៉ោងជាសកម្មភាពខ្លាំងក្លាដូចជា រត់ លោត ឬជិះកង់)។ ជាមួយគ្នា ឪពុកម្តាយ​ក៏​ត្រូវបង្រៀនពួកគេ​ឱ្យចេះជួយការងារ ដោយ​អាចឱ្យកូនជួយការងារស្រាលៗដូចជា ទុកដាក់របស់លេង និងសៀវភៅ, ជួយជូតតុ ឬបោសផ្ទះ (ប្រើអំបោសខ្នាតតូច) ក៏​ដូចជា រៀបចំគ្រែគេង (ដោយមានការជួយជ្រោមជ្រែង)។

៣. សុខភាព និងការសម្រាក

កុមារវ័យនេះត្រូវការគេងពី ១០ ដល់ ១៣ ម៉ោង ក្នុងមួយថ្ងៃ។ ប្រសិនបើកូនលែងចង់គេងថ្ងៃ អ្នកគួរជំនួសមកវិញនូវ “ម៉ោងសម្រាកស្ងប់ស្ងាត់” ដើម្បីបង្ការកុំឱ្យកូនមួម៉ៅនៅពេលល្ងាច។ ឪពុកម្តាយ ក៏​គួរ​ឆ្លៀតបង្រៀនកូនឱ្យចេះដុសធ្មេញដោយប្រើថ្នាំដុសធ្មេញដែលមានជាតិហ្វ្លុយអូរី (Fluoride) កម្រិតប៉ុនគ្រាប់សណ្តែក ហើយត្រូវជួយដុសឱ្យកូនបន្ថែមរហូតដល់គេចេះខ្ពុរមាត់ចោលបានស្ទាត់។ ជាមួយគ្នានេះ ក៏កុំភ្លេចនាំកូនទៅជួបគ្រូពេទ្យកុមារជារៀងរាល់ឆ្នាំ ដើម្បីតាមដានការលូតលាស់ និងទទួលវ៉ាក់សាំងតាមកាលកំណត់។

៤. សុវត្ថិភាពដែលមាតាបិតាត្រូវយកចិត្តទុកដាក់

សុវត្ថិភាពចំណីអាហារ ៖ បង្ការការស្លាក់អាហារ (ជាពិសេសកុមារក្រោម ៤ ឆ្នាំ) ដោយជៀសវាងការឱ្យកូនញ៉ាំគ្រាប់ធញ្ញជាតិទាំងមូល ផ្លែទំពាំងបាយជូរទាំងមូល ឬអាហារដែលមានដុំរឹងៗ។

សុវត្ថិភាពក្នុងផ្ទះ ៖ ដាក់សម្ភារៈសម្អាត និងថ្នាំសង្កូវឱ្យឆ្ងាយពីដៃកុមារ។ បិទរន្ធព្រីភ្លើង និងប្រើរបងរាំងជណ្តើរ។

សុវត្ថិភាពក្នុងទឹក ៖ ទោះបីកូនចេះហែលទឹក ក៏ត្រូវតែមានមនុស្សធំមើលថែជាប់ជានិច្ចនៅពេលកូនលេងទឹក។

៥. ការប្រើប្រាស់បច្ចេកវិទ្យា (Screen Time)

បច្ចុប្បន្នជា​សម័យបច្ចេកវិទ្យា ដូច្នេះចៀសមិនផុតទេដែល​កុមារ​ត្រូវ​មើលអេក្រង់ មិនថាទូរទស្សន៍ ឬទូរស័ព្ទ, តែយ៉ាងណា ឪពុកម្តាយ​គួរកំណត់ការមើលទូរទស្សន៍ ឬទូរស័ព្ទរបស់ពួកគេ​ត្រឹម ១ ម៉ោងក្នុងមួយថ្ងៃ។ ហើយ​ជ្រើសរើសកម្មវិធីសម្រាប់ពួកគេ​ដែលមានគុណភាព និងការអប់រំ។ ជា​ការ​សំខាន់បំផុតនោះ ឪពុកម្តាយគួរមើលជាមួយកូន និងជជែកលេងជាមួយពួកគេអំពីអ្វីដែលកំពុងមើល ដើម្បីបង្កើនទំនាក់ទំនង។

ចូរចងចាំថា ក្នុងវ័យ ៣ ដល់ ៥ ឆ្នាំ ជាវ័យដែលកុមាររៀនសូត្រតាមរយៈការសង្កេត និងការលេង។ ដូច្នេះការអត់ធ្មត់ និងការផ្តល់ក្តីស្រឡាញ់ គឺជាគន្លឹះក្នុងការជួយឱ្យពួកគេឆ្លងកាត់ដំណាក់កាលនេះដោយជោគជ័យ៕