ឱកាសសិក្សាអាហារូបករណ៍ថ្នាក់បរិញ្ញាបត្រជាន់ខ្ពស់នៅសាលាគោលនយោបាយសាធារណៈលីក្វាន់យូ នៃសាកលវិទ្យាល័យជាតិសិង្ហបុរីសម្រាប់មន្ត្រីរាជការកម្ពុជា​ និងសមាជិក សមាជិកាសហភាពសហព័ន្ធយុវជនកម្ពុជា។ អាហារូបករណ៍ផ្ដល់ជូនក្នុងគោលបំណងពង្រឹងសមត្ថភាព និងអភិវឌ្ឍចំណេះដឹងដើម្បីជាទុនបន្ថែមក្នុងការចូលរួមបម្រើសង្គមជាតិ។

ជំនាញដែលអាហារូបករណ៍ផ្ដល់ជូនសម្រាប់សិក្សាមាន៣ដូចជា រដ្ឋបាលសាធារណៈ (MPA) ១ឆ្នាំ ជំនាញគោលនយោបាយសាធារណៈ (MPP) សិក្សារយៈពេល២ឆ្នាំ និងជំនាញកិច្ចការអន្តរជាតិ (MIA) សិក្សារយៈពេល២ឆ្នាំ។ ជាមួយគ្នានេះបេក្ខជនដែលចង់សិក្សាជំនាញនីមួយៗត្រូវមានបទពិសោធន៍ការងារដូចជា ជំនាញ MPA ត្រូវមានបទពិសោធន៍ការងារយ៉ាងតិច៥ឆ្នាំ និងជំនាញពាក់ព័ន្ធ, ជំនាញ MPP ត្រូវមានបទពិសោធន៍ការងារយ៉ាងតិច២ឆ្នាំ និងជំនាញពាក់ព័ន្ធ, ជំនាញ MIA ត្រូវមានបទពិសោធន៍ការងារយ៉ាងតិច២ឆ្នាំ និងជំនាញពាក់ព័ន្ធ។

សម្រាប់លក្ខខណ្ឌជ្រើសរើស ៖ បេក្ខជនត្រូវមានសញ្ជាតិខ្មែរ ជាមន្ត្រីរាជការពេញសិទ្ធកំពុងបំពេញការងារក្នុងក្របខណ្ឌសាធារណៈ មានសញ្ញាបត្របរិញ្ញាបត្រ និងបទពិសោធន៍ការងារ (បានបញ្ជាក់ខាងលើ) និងមានពិន្ទុIELTS ៧.០ ឬ TOEFL ibt ១០០ ឬមានលិខិតបញ្ជាក់ពីសាកលវិទ្យាល័យអំពីការសិក្សាថ្នាក់បរិញ្ញាបត្ររបស់បេក្ខជនជាភាសាអង់គ្លេស។

ជាមួយគ្នានេះ បេក្ខជនត្រូវភ្ជាប់ជាមួយឯកសារចាំបាច់មួយចំនួនដូចជា វិញ្ញាបនបត្ររដ្ឋបាលបញ្ជាក់ដោយក្រសួង-ស្ថាប័ន ឬប័ណ្ណសម្គាល់មន្ត្រីរាជការ សញ្ញាបត្រថ្នាក់បរិញ្ញាបត្រ លិខិតបញ្ជាក់ភាសាអង់គ្លេស ប្រវត្តិរូបសង្ខេបជាភាសាអង់គ្លេស (CV) letter of Interest ជាភាសាអង់គ្លេស(២៥០ពាក្យ) និងEssay ចំនួន២ដោយប្រធានបទទី១ (៦០០ពាក្យ) អំពី What is the most urgent challenge facing your community or nation today? ប្រធានបទទី២ (៤០០ពាក្យ) អំពី What are your personal and/or Professional goals and how do you think the program can help you in achieving your goals?

គួរបញ្ជាក់ដែរថា បេក្ខជនដែលទទួលបានការចាត់តាំងបញ្ជូនពីក្រសួង-ស្ថាប័នត្រូវដាក់ស្នើឯកសារពាក់ព័ន្ធទៅកាន់ក្រុមការងារតាមរយៈ Google Form (Submit all required documents via Google Form)។ បេក្ខជនដែលទទួលបានការចាត់តាំងបញ្ជូនពីក្រសួង-ស្ថាប័ន នឹងត្រូវឆ្លងកាត់ការវាយតម្លៃសមត្ថភាព០២ដំណាក់កាល។

ដំណាក់កាលទី១ បេក្ខជនត្រូវឆ្លងកាត់ការពិនិត្យ និងវាយតម្លៃដោយក្រុមការងារ ស.ស.យ.ក រាជធានីភ្នំពេញលើសមត្ថភាព និងឯកសារដែលបេក្ខជនបានដាក់ស្នើជាមុនសិនដើម្បីបន្តទៅជាប់ក្នុងបញ្ជីជ្រើសរើសដំបូង (Shortlist) រួចនឹងទទួលបានការឧទ្ទេសនាមជាផ្លូវការពីឯកឧត្ដមប្រធាន ស.ស.យ.ក រាជធានីភ្នំពេញទៅកាន់សាលាលីក្វាន់យូ (Official Nomination)។ ដំណាក់កាលទី២ ក្រោយទទួលបានការឧទ្ទេសនាមពីឯកឧត្ដមប្រធាន ស.ស.យ.ក រាជធានីភ្នំពេញបេក្ខជនត្រូវបំពេញតាមលក្ខខណ្ឌនានាដែលសាលាបានកំណត់។ បេក្ខជន-បេក្ខនារីដែលជាប់ជាស្ថាពរត្រូវគោរពគោលការណ៍របស់ ស.ស.យ.ក រាជធានីភ្នំពេញ និងសាលាលីក្វាន់យូ។

សម្រាប់ Submit ឯកសារតាមរយៈ Google form អាចចូលទៅកាន់តំណភ្ជាប់ https://docs.google.com/forms/d/e/1FAIpQLSdq3nwTtHAJ6ATDlqMGir-CeBxnYXtspoKAR6W8An-p8evDYA/viewform ។ សម្រាប់ការទាញយកឯកសារទាក់ទងនឹងព័ត៌មានផ្សេងៗអាចចូលទៅកាន់តំណភ្ជាប់ https://drive.google.com/drive/folders/1vAP0ECHlB9Xq1RXV42s9SpLZmcSlpxYQ ។

លោក លោកស្រីជាប្រធាន ស.ស.យ.ក តាមបណ្ដាវិស័យអង្គភាពរដ្ឋបាលរាជធានីភ្នំពេញ និងនាយក នាយិកា កម្មវិធីចំណុះមេត្តារៀបចំបញ្ជូនបញ្ជីឈ្មោះបេក្ខជនចំនួន០២រូបដែលមានសមត្ថភាព និងបានបំពេញគ្រប់លក្ខខណ្ឌនៃការជ្រើសរើសខាងលើដោយភ្ជាប់ឯកសារពាក់ព័ន្ធទៅកាន់លេខាធិការដ្ឋាន ស.ស.យ.ក រាជធានីភ្នំពេញឱ្យបានមុខថ្ងៃទី២០ ខែតុលា ឆ្នាំ២០២៣ត្រឹមម៉ោង៥:០០នាទីល្ងាច៕