កម្ពុជាកំពុងមានការអភិវឌ្ឍន៍ទៅមុខស្ទើរគ្រប់វិស័យ បានធ្វើ​ឱ្យយុវជនជាច្រើនបានមើលឃើញពីចំណង់ចំណូលចិត្តនៃជំនាញសិក្សាដែលខ្លួនត្រូវជ្រើសរើសដើម្បីក្លាយជាធនធានមនុស្សសម្រាប់ប្រទេសជាតិ ។ ដោយឡែកយុវជន តាំង សុវណ្ណារ័ត្ន បច្ចុប្បន្ន​ជានិស្សិតកម្ពុជាកំពុងសិក្សាអាហារូបករណ៍ថ្នាក់បរិញ្ញាបត្រជំនាញ វិស្វករកែច្នៃរ៉ែ, សុវណ្ណរ័ត្ន និយាយថា ការរៀនជំនាញនេះ គឺព្រោះខ្លួនស្រលាញ់ និងមើលឃើញទីផ្សារការងារខ្ពស់។

យុវជន តាំង សុវណ្ណារ័ត្ន កំពុងសិក្សានៅសាកលវិទ្យាល័យវិទ្យាសាស្ត្រ និងបច្ចេកវិទ្យាប៉េកាំង (USTB) ជំនាញវិស្វករកែច្នៃរ៉ែ(mineral processing engineering)ពីកម្មវិធីអាហារូបករណ៍រដ្ឋាភិបាលចិនឆ្នាំ២០២២-២០២៦ នៃសាធារណប្រជាមានិតចិន ។ សុវណ្ណារ័ត្ន បានប្រាប់ឱ្យដឹងថា លោកត្រូវសិក្សារយៈពេល៥ឆ្នាំដោយបច្ចុប្បន្នបានបញ្ចប់ឆ្នាំទីមួយហើយ ។

យុវជនវ័យ២០ឆ្នាំរូបនេះបានបន្តថា ការសិក្សាជំនាញនេះតម្រូវឱ្យបេក្ខជនតាំងចិត្តក្នុងការសិក្សា និងមានមូលដ្ឋានគ្រឹះពីវិទ្យាល័យនូវមុខវិជ្ជា គណិតវិទ្យា រូបវិទ្យា គីមីវិទ្យា ។ លើសពីនេះបេក្ខជនត្រូវសិក្សាបន្ថែមតាមរយៈការស្វែងរកឯកសារសិក្សា និងសៀវភៅផ្សេងៗដែលពាក់ព័ន្ធមេរៀនដើម្បីឱ្យកាន់តែស៊ីជម្រៅ ។

យុវជនមានស្រុកកំណើតនៅរាជធានីភ្នំពេញរូបនេះប្រាប់ឱ្យដឹងថា ក្រោយពេលទៅសិក្សាអស់រយៈពេលជាងមួយឆ្នាំនេះ លោកមិនមានបញ្ហាក្នុងការទំនាក់ទំនង ឬបញ្ហាជាមួយកម្មវិធីសិក្សាឡើយព្រោះលោកធ្លាប់បានសិក្សាភាសាចិនតាំងពីនៅកុមារ ប៉ុន្តែមានបញ្ហាលើអាហារបន្តិចបន្តួច ។

ខ្ញុំត្រូវបែងចែកម៉ោងសិក្សាឱ្យបានច្បាស់ព្រោះមានមុខវិជ្ជាច្រើនត្រូវស្វែងយល់ ថែមទាំងការធ្វើស្វ័យសិក្សានៅបណ្ដាល័យផងដែរ

លោក តាំង សុវណ្ណារ័ត្ន

លោក តាំង សុវណ្ណារ័ត្ន បានបន្ថែមថា ដើម្បីទទួលបានអាហារូបករណ៍នេះលោកបានស្នើពាក្យអាហារូបករណ៍តាមរយៈ Website អាហារូបករណ៍របស់រដ្ឋាភិបាលចិនប្រភេទ A ដោយឡែកក៏មានអាហារូបករណ៍រដ្ឋាភិបាលចិនប្រភេទផ្សេងដែររួមមាន អាហារូបកណ៍រដ្ឋាភិបាលចិនប្រភេទB  និង អាហារូបកណ៍រដ្ឋាភិបាលចិនប្រភេទ C ហើយការដាក់ស្នើពាក្យអាហារូបករណ៍នីមួយៗមានដំណាក់កាលស្នើពាក្យ និងប្រឡងប្រជែងខុសគ្នាបន្តិចបន្តួចដូចជា ការស្នើពាក្យប្រឡងតាមក្រសួងអប់រំ យុវជន និងកីឡា ជាដើម ។

បេក្ខភាពអាហារូបករណ៍រូបនេះបានលើកឡើងថា បេក្ខជនដែលចង់ស្នើពាក្យអាហារូបករណ៍ត្រូវត្រៀមឯកសារចាំបាច់ដែលអាហារូបករណ៍តម្រូវឱ្យមានដូចជា សញ្ញាបត្រមធ្យមសិក្សាទុតិយភូមិ, រូបថតសិស្ស (៤x៦ ឬ ៣x៤ អាស្រ័យតាមតម្រូវការចាំបាច់របស់ឯកសារ), សំបុត្រកំណើតនិងឯកសារផ្សេងៗទៀតដែលមានបម្រែបម្រួលទៅតាមឆ្នាំដោយចេញផ្សាយនៅលិខិតប្រកាសបើមានការប្រែប្រួល ។

ជាចុងក្រោយ លោក តាំង សុវណ្ណារ័ត្ន មានការតាំងចិត្តយកចំណេះដឹងដែលបានសិក្សាពីឱកាសសិក្សាអាហារូបករណ៍មកអភិវឌ្ឍន៍ប្រទេសជាតិឱ្យកាន់តែរីកចម្រើន និងលើកទឹកចិត្តដល់អ្នកជំនាន់ក្រោយដែលមានក្ដីស្រមៃបន្តការសិក្សាក្រៅប្រទេសសូមសាកល្បងស្នើពាក្យអាហារូបករណ៍ព្រោះអាហារូបករណ៍បានផ្ដល់ឱកាសសិក្សា និងអត្ថប្រយោជន៍ជាច្រើនសម្រាប់និស្សិតគ្រប់គ្នា ។ ការស្នើពាក្យអាហារូបករណ៍ជាប់ ឬធ្លាក់និស្សិតអាចទទួលបានបទពិសោធន៍សម្រាប់អ្នកគ្រប់គ្នាដែលបានសាកល្បងស្នើពាក្យប្រឡងអាហារូបករណ៍ ៕