ការចងសម្ព័ន្ធភាពរៀនជាក្រុមនៅមហាវិទ្យាល័យដោយមិនចាំបាច់មានការផ្តួចផ្តើមពីសំណាក់សាស្រ្តាចារ្យ វាបានផ្តល់អត្ថប្រយោជន៍ជាច្រើនសម្រាប់និស្សិត ដោយវានឹងជួយឱ្យការសិក្សាកាន់តែប្រសើរ ទទួលបាននូវបទពិសោធន៍ និងចំណេះដឹងថ្មីៗ ព្រមទាំងបង្កើនទំនាក់ទំនងល្អថែមទៀតផង។ ខាងក្រោមនេះ គឺជាការចែករំលែកបទពិសោធន៍របស់និស្សិតមកពីមហាវិទ្យាល័យនានា ពីអត្ថប្រយោជន៍ដែលពួកគេទទួលបានពីការរៀនជាក្រុម។

កញ្ញា គង់ ស្រីរត្ន័ និស្សិតសិក្សាផ្នែកទំនាក់ទំនងអន្តរជាតិ និយាយថា ការសហការណ៍គ្នារៀនជាក្រុមនៅសាលាធ្វើឱ្យមនុស្សមានផ្នត់គំនិត ឬឥរិយាបថចេះជួយជ្រោមជ្រែងគ្នា និងសាមគ្គីជាក្រុម ទោះបីជាចង្កោមមនុស្សនៅក្នុងក្រុមមិនទាន់មានសមត្ថភាពស្មើគ្នាក៏ដោយ ប៉ុន្តែបើក្នុងក្រុមមានការចងក្រងសមាជិកដែលមានឆន្ទៈរួម នោះភាពរីកចម្រើននឹងនៅតែបន្តមាន ។ ការសិក្សាជាក្រុមៗនៅមហាវិទ្យាល័យវាមិនមែនជារឿងងាយស្រួលប៉ុន្មានឡើយ ជាពិសេសនៅពេលដែលប្រឡូកក្នុងក្រុមនិស្សិតដែលមានសក្កានុពលពីធម្មជាតិ ឬមនុស្សដែលមានវីធីសាស្រ្តចម្រុះក្នុងការសម្រេចគោលដៅអ្វីមួយ ប៉ុន្តែបញ្ហាត្រង់ចំណុចនេះវាប្រៀបដូចជាវិញ្ញាសាក្នុងថ្នាក់ដូច្នោះដែរ គឺតែងតែបង្កប់នូវដំណោះស្រាយ និងផ្លែផ្កាក្រោយការសាកល្បងកម្រិតសមត្ថភាពនៃបុគ្គលម្នាក់ៗប៉ុណ្ណោះ។

ស្រីរ័ត្ន បន្ថែមថា ទោះបីជាការចងក្រងការរៀនជាក្រុមមានភាពស៉ាំញ៉ាំបន្តិច និងរងនូវការប៉ះទង្គិចពាក្យសម្ដី ឬការបញ្ចេញមតិយ៉ាងណាក្ដី តែវាជាការឆ្លុះបញ្ចាំងគ្នា និងចេះទទួលយកនូវភាពខុសគ្នានៃបុគ្គលិក្ខណៈមនុស្សម្នាក់ៗ ដែលនាំឱ្យមានការសាមគ្គីរួម ។ បើតាមការសង្កេតរបស់ ស្រីរ័ត្ន ពេលដែលជួបមនុស្សមានការយល់ឃើញនៅជ្រុងផ្សេងគ្នា ទស្សនៈខុសគ្នា វាជាឱកាសបង្កើតជាបរិយាកាសជជែកដេញដោលមតិខុសប្លែកគ្នាជាច្រើនផុសឡើង, កត្តាទាំងនេះគឺជាដើមចមនាំឱ្យបរិយាកាសសិក្សាកាន់តែមានភាពចម្រុះ និងបន្ថែមនូវសេចក្ដីមោះមុត ដែលអាចជួយអភិវឌ្ឍសមត្ថភាព និងគំរូភាពទៅកាន់អ្នកសិក្សាជុំវិញខ្លួន។

កាលដែលមានទម្លាប់ចងសម្ព័ន្ធភាពរៀនជាក្រុមបែបនេះហើយ ដែលជាហេតុផលមួយដ៏សំខាន់ធ្វើឱ្យខ្ញុំមិនសូវពិបាកក្នុងការសម្របខ្លួនជាមួយមនុស្សដែលមានលក្ខណៈផ្ទុយគ្នា

-កញ្ញា គង់ ស្រីរត្ន័

សម្រាប់កញ្ញា ជូ សៀកម៉ី និស្សិតផ្នែកវេជ្ជបណ្ឌិតទូទៅវិញ បានឱ្យដឹងថា នាងពិតជាពេញចិត្តចំពោះការរៀនជាក្រុម ទោះបីជាការរៀនជំនាញបែបវិទ្យាសាស្រ្តក៏ដោយ។ កញ្ញាបញ្ជាក់ថា ការរៀនជាក្រុមធ្វើឱ្យនាងមានការត្រៀមលក្ខណៈបានច្រើន ព្រោះរាល់ពេលមានការពិភាក្សាក្រុមម្តងៗ គឺតម្រូវឱ្យមានការចូលរួម ឬមានការឆ្លើយបតនូវសំណួរបំផុសនានា ដូច្នេះហើយ សៀកម៉ី តែងស្រាវជ្រាវបន្ថែមជាប្រចាំមុនពេលទៅជួបប្រជុំក្រុម ហើយការត្រៀមខ្លួនពីមួយពេលទៅមួយពេលជាកត្តាធ្វើឱ្យនាងកាន់តែពង្រឹងសមត្ថភាពខ្លួនឯងបានប្រសើរជាងមុន។

ខ្ញុំសង្កេតឃើញថា ការសិក្សាជាក្រុមកាន់តែជំរុញខ្ញុំនិងធ្វើឱ្យខ្ញុំមានចំណង់ក្នុងការអភិវឌ្ឍសមត្ថភាពទ្វេឡើង ជាងកាលដែលខ្ញុំរៀនតែម្នាក់ឯង

កញ្ញា ជូ សៀកម៉ី និស្សិតផ្នែកវេជ្ជបណ្ឌិតទូទៅ

យុវជន ឆាយ វិនឡុង ជានិស្សិតផ្នែកទំនាក់ទំនងពាណិជ្ជកម្ម និងប្រព័ន្ធផ្សព្វផ្សាយ ក៏បានលើកឡើងដែរថា ខ្លួនគឺជាមនុស្សម្នាក់ដែលចូលចិត្តសិក្សាបែបជាលក្ខណៈក្រុមព្រោះនៅពេលដែលមានចំណុចខ្វះខាតណាមួយ គឺអាចសុំជំនួយពីគ្នាបានលឿន និងកាត់បន្ថយភាពក្រែងចិត្ត ព្រោះពេលចងជាក្រុមធ្វើឱ្យមនុស្សមានភាពស្និតស្នាលគ្នាច្រើនជាងមុន។

ខ្ញុំយល់ថា ការចងសម្ព័ន្ធភាពរៀនជាក្រុមបានផ្តល់លទ្ធផលល្អ ហើយអាចកាត់បន្ថយនូវភាពតាងតឹង និងជំនួសមកវិញនូវភាពសប្បាយរីករាយជាងមុន

លោក ឆាយ វិនឡុង ជានិស្សិតផ្នែកទំនាក់ទំនងពាណិជ្ជកម្ម និងប្រព័ន្ធផ្សព្វផ្សាយ 

វិនឡុង បន្តថា ក្នុងរយៈពេល និងស្ថានភាពតែមួយ ប្រសិនបើយើងធ្វើកិច្ចការអ្វីមួយ ឬទៅរៀនតែម្នាក់ឯង នោះលទ្ធផលដែលទទួលបាន គឺអាចមានត្រឹមតែ១០ទេ។ ប៉ុន្តែបើស្ថិតនៅក្នុងស្ថានភាពនោះដូចគ្នា បើមានមនុស្សជាក្រុមចូលរួម នោះលទ្ធផលដែលទទួលបានអាចឈានរហូតទៅដល់១០០ឯណោះ។ ទាំងនេះហើយដែលជាហេតុផលនាំឱ្យ វិនឡុង ជ្រើសរើសការសិក្សាជាក្រុមនៅមហាវិទ្យាល័យ ជាជាងសិក្សាតែឯង ព្រោះវាមិនត្រឹមតែផ្តល់នូវប្រសិទ្ធភាពប៉ុណ្ណោះទេ វាក៏អាចកាត់បន្ថយនូវសភាពឯកោអំឡុងពេលជាយុវវ័យបានមួយផ្នែកទៀតផង៕