ការមានអារម្មណ៍ហេលហាល បាត់បង់ខ្លួនឯង ជំរុញឱ្យមនុស្សគេចចេញពីអ្វីៗគ្រប់យ៉ាងដែលកើតឡើងនៅជុំវិញខ្លួន។ នៅពេលខ្លះ អ្នកអាចនឹងឆ្ងល់ថា ហេតុអ្វីក៏ឈានដល់ដំណាក់កាលនេះ ហើយមិនដឹងថាត្រូវធ្វើអ្វីនៅជំហានបន្ទាប់។ មិនត្រឹមតែប៉ុណ្ណោះ ពេលខ្លះហាក់ដូចជា ជីវិតគ្មានវត្ថុបំណង គ្មានគោលដៅ ឬក៏ការបោះជំហានអភិវឌ្ឍន៍ខ្លួនទៅមុខមិនលឿនដូចមុនសោះ។ អារម្មណ៍ប្រភេទនេះបានបង្កើនការសង្ស័យជាច្រើនចំពោះសមត្ថភាពខ្លួនឯង ហើយមិនដឹងថាត្រូវដោះយ៉ាងណាប្រកបដោយវិធីសាស្រ្តវិជ្ជមាន។ តាមរយៈគេហទំព័រ verywellmind បានបង្ហាញគន្លឹះ ១២ចំណុច ក្នុងការដោះស្រាយនឹងស្ថានភាពមួយនេះ។

១. ឆ្លុះបញ្ចាំងតម្រូវការផ្ទាល់ខ្លួន ៖ អាចនឹងជួយបានច្រើនដែរ នៅពេលដែលវិនិយោគពេលជាមួយខ្លួនឯងតាមរយៈ ការសួរខ្លួនឯងថាមានរឿងអ្វីកើតឡើងខ្លះ? ហេតុអ្វីអ្នកមានអារម្មណ៍បែបនេះ? រួចហើយវិភាគ និងផ្ទៀងផ្ទាត់អំពីតម្រូវការផ្ទាល់ខ្លួន ថា តើអ្វីដែលចង់បានទាំងនោះបណ្តាលមកពីជម្រើសខ្លួនឯង ឬក៏ឥទ្ធិពលបរិយាកាសសង្គម។  

២. ស្វែងរកឱកាសអភិវឌ្ឍន៍ខ្លួនជានិច្ច ៖  គិតទៅដល់រូបភាពដែលចង់ផ្លាស់ប្តូរ  ចង់ឱ្យកើតមាននៅពេលអនាគត តើចង់ឃើញភាពរីកចម្រើនអ្វីខ្លះ? ចង់អភិវឌ្ឍន៍សមត្ថភាពនៅចំណុចណាខ្លះ? អារម្មណ៍ដែលបាត់បង់ខ្លួនឯង គឺមិនមានផាសុកភាពនោះទេ ដូច្នេះត្រូវស្វែងរកឱកាសបន្ថែមដើម្បីពង្រឹងសមត្ថភាពមិនថា ជីវិតផ្ទាល់ខ្លួន និងអាជីពវិជ្ជាជីវៈក៏ដូចជា សុខភាពផ្លូវចិត្ត។

៣. ផ្តោតសកម្មភាពអាទិភាព ៖ ផ្តោតទៅលើពេលវេលា និងថាមពលផ្ទាល់ខ្លួនគឺជារឿងអាទិភាព និងបញ្ចៀសរាល់សកម្មភាពទាំងឡាយណាដែលនាំឱ្យកាត់ចង្វាក់ការផ្តោតទៅលើចំណុចមួយនេះ។

៤. ថែទាំខ្លួនឯង ៖ តម្រូវការផ្ទាល់ខ្លួនត្រូវចាត់ជាអាទិភាព និងយកចិត្តទុកដាក់ ឬក៏ថែទាំសុខភាពផ្លូវកាយនិងចិត្ត តាមរយៈការមានសកម្មភាពផ្លូវកាយអនុវត្តន៍បានទៀតទាត់រាល់ថ្ងៃ។

៥. ធ្វើសមាធិជាប្រចាំ ៖ ការធ្វើសមាធិ និងហ្វឹកហាត់ស្មារតីរំលឹកដឹង ជួយកាត់បន្ថយកម្រិតស្រ្តេស ដែលកំពុងតែកើតមាន រួមទាំងរក្សាការផ្ចង់អារម្មណ៍ឱ្យស្ថិតក្នុងបច្ចុប្បន្នភាព។

៦. សរសេរកំណត់ហេតុ ៖ សរសេររាល់ការគិតទាំងអស់ចេញមកក្រៅ ជួយឱ្យស្គាល់អារម្មណ៍ខ្លួនឯងជាងមុន មានការជំរុញចិត្តជាងមុន និងការរកឃើញឬសគល់ដែលបណ្តាលឱ្យបាត់បង់ខ្លួនឯង។

៧. និយាយពាក្យល្អឱ្យឮៗ ៖ ការនិយាយប្រយោគ ល្អៗ ចំពោះខ្លួនឯងឱ្យឮៗ រៀងរាល់ថ្ងៃ បានបង្កើននូវទំនុកចិត្តចំពោះខ្លួនឯង និងទទួលបានអារម្មណ៍ល្អៗ។

៨. ទាក់ទងទៅកាន់មនុស្សជាទីស្រឡាញ់ ៖ អនុញ្ញាតិឱ្យមនុស្សជាទីស្រឡាញ់របស់អ្នក បានដឹងអំពីអារម្មណ៍ដែលអ្នកកំពុងមាន ចែករំលែកអំពីភាពមន្ទិលដែលកំពុងមាន ក៏ដូចជាការជជែកអំពីការសម្រេចចិត្តសំខាន់ៗជាមួយពួកគាត់ រួមទាំងអនុញ្ញាតិឱ្យពួកគាត់ដឹងអំពីអ្វីដែលអាចជួយបាន។

៩. កាត់ផ្តាច់ពីទំនាក់ទំនងគ្មានផាសុកភាព ៖ វាយតម្លៃនូវទំនាក់ទំនងដែលអ្នកកំពុងមាន បើរកឃើញថា កំពុងស្ថិតក្នុងស្ថានភាពមួយគ្មានផាសុកភាព គួរតែរក្សាគម្លាតពីទំនាក់ទំនងមួយនោះ ព្រោះវាមិនមែនជាជម្រើសល្អសម្រាប់អ្នកទេ គួរផ្តោតទៅលើទំនាក់ទំនងណា ដែលផ្តល់ការគាំទ្រ និងផ្តល់អារម្មណ៍វិជ្ជមានចំពោះគ្នាទៅវិញទៅមក។

១០. រក្សាមនុស្សដែលផ្តល់ការគាំទ្រ ៖ បង្កើតឬក៏រក្សាបណ្តាញដែលអាចជួយគ្នា គាំទ្រគ្នា តាមរយៈការចែករំលែកគំនិត សកម្មភាពដែលអ្នកចូលចិត្ត ចូលរួមជួបជុំតាមកម្មវិធីអនឡាញ និងចូលជាសមាជិកដែលផ្តល់ការគាំទ្រណាមួយ។ គួរតែរក្សាទំនាក់ទំនងជាមួយក្រុមដែលផ្តល់ការគាំទ្រឱ្យបានទៀងទាត់ ឬក៏ក្លាយជាចំណែកនៃក្រុមទាំងនោះដើម្បីផ្តល់ការគាំទ្រទៅកាន់មនុស្សដទៃវិញ។

១១. រក្សាទម្លាប់ដែលនាំឱ្យមានផាសុកភាព ៖  ទម្លាប់ប្រចាំថ្ងៃត្រូវរួមបញ្ចូលទាំងសកម្មភាពលំហាត់ប្រាណ គេងបានគ្រប់គ្រាន់ របបអាហារមានតុល្យភាព និងមានជីវជាតិ ដែលកត្តាទាំងអស់នេះហើយជំរុញឱ្យអារម្មណ៍មានស្ថិរភាព និងអាចគ្រប់គ្រងបានគ្រប់កាលៈទេសៈ។

១២. ស្វែងរកជំនួយ ៖ ស្ថិតនៅក្នុងអារម្មណ៍មួយដែលច្របូកច្របល់ រួមទាំងបាត់បង់ខ្លួនឯង ដោយមិនដឹងថាត្រូវធ្វើអ្វីបន្តទៀត ឬក៏ពិបាកក្នុងការគ្រប់គ្រងខ្លួនឯង ការជជែកជាមួយអ្នកជំនាញសុខភាពផ្លូវចិត្ត ឬក៏អ្នកមានគន្លឹះជួយក្នុងការដោះស្រាយ អាចថាជាចំណុចដែលមានប្រសិទ្ធភាព បន្ទាប់ពីប្រឹងអស់លទ្ធភាពដោះស្រាយដោយខ្លួនឯង៕