ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
គម្រោងរ៉ូបូតសម្លាប់សត្វល្អិត របស់ក្រុមយុវជនកម្ពុជា ដែលជានិស្សិតដេប៉ាតឺម៉ង់ព័ត៌មានវិទ្យា និងទំនាក់ទំនង នៃវិទ្យាស្ថានបច្ចេកវិទ្យាកម្ពុជា បានជាប់ជ័យលាភីលេខ៣ ក្នុងការប្រកួតវគ្គផ្ដាច់ព្រ័ត្រលំដាប់ថ្នាក់ពិភពលោក Innovation Track នៃការប្រកួត Huawei ICT Competition Global Final 2024–2025 នៅទីក្រុងសិនជិន ប្រទេសចិន។
តាមពិតទៅ គម្រោងរ៉ូបូតសម្លាប់សត្វល្អិត របស់ក្រុមយុវជនកម្ពុជា ដែលមានឈ្មោះថា SpecSpark បានជួបជ័យលាភីលេខ១ នៅក្នុងការប្រកួតថ្នាក់តំបន់អាស៊ីប៉ាស៊ីហ្វិក នៅទីក្រុងកូឡាឡាំពួរ ប្រទេសម៉ាឡេស៊ី ។ បន្ទាប់ពីជាប់ជ័យលាភីលេខ១ ប្រចាំថ្នាក់តំបន់ គម្រោងរ៉ូបូតមួយនេះ ក៏ត្រូវបន្តចូលរួមប្រកួតវគ្គផ្ដាច់ព្រ័ត្រ នៅប្រទេសចិន។
កញ្ញា ហេង កល្យាណ និស្សិតឆ្នាំទី៤ ដេប៉ាតឺម៉ង់ទេពកោសល្យ ព័ត៌មានវិទ្យា និងទំនាក់ទំនង នៃវិទ្យាស្ថានបច្ចេកវិទ្យាកម្ពុជា និងជាសមាជិកក្រុម SpecSpark និយាយថា សម្រាប់ក្រុមរបស់នាងផ្ទាល់ មានអារម្មណ៍ថាសប្បាយចិត្តដែលបានទៅវគ្គផ្តាច់ព្រ័ត្រថ្នាក់ពិភពលោកនេះ ដើម្បីចូលរួមប្រកួតជាមួយនឹងប្រទេសចំនួន៧ ដែលមកពីតំបន់ផ្សេងៗគ្នា ដូចជា APAC, Europe, Latam, Middle East & Central Asia, Southern Africa, Northern Africa, Chinese Mainland ដែលមានក្រុមចំនួន១៥ ពីប្រទេសចិន។ ជាពិសេស ក្រុមរបស់ខ្លួនអាចទទួលបានលទ្ធផលចំណាត់ថ្នាក់លេខ៣ ក្នុងការប្រកួតវគ្គផ្ដាច់ព្រ័ត្រនេះ។
កល្យាណ បញ្ជាក់ថា គម្រោងរ៉ូបូតសម្លាប់សត្វល្អិតនេះ មានលក្ខណៈពិសេស ដែល Pestibot បង្កើតឡើងជារ៉ូបូតកសិកម្ម អាចជួយដល់ការបាញ់ថ្នាំសម្លាប់សត្វល្អិត ជាជាងការប្រើប្រាស់មនុស្សផ្ទាល់ដែលអាចប៉ះពាល់ទៅដល់សុខភាពរបស់មនុស្ស ព្រមទាំងបន្ថយការចំណាយទៅលើថ្នាំបាញ់ និងជួយបន្ថយការប៉ះពាល់ដល់បរិស្ថានផងដែរ។ ដោយមុខងារពិសេសរបស់វា គឺការប្រើប្រាស់មុខងារ AI ក្នុងការ detect ចាប់យកសត្វល្អិតប្រភេទមួយចំនួននៅលើដំណាំ និងធ្វើការបាញ់ថ្នាំសម្លាប់សត្វល្អិតដោយស្វ័យប្រវត្តិ ប៉ុន្តែក្រុមរបស់ខ្លួនផ្តោតសំខាន់ទៅលើ ផ្នែក Software ជាងគេប៉ុណ្ណោះ។
នៅក្នុងវគ្គផ្ដាច់ព្រ័ត្រនេះ កញ្ញា ហេង កល្យាណ ប្រាប់ឱ្យដឹងថា ក្រុមរបស់ខ្លួនបានជួបការលំបាកមួយចំនួនដូចជា បន្ទាប់ពីជាប់នៅថ្នាក់ជាតិ និងថ្នាក់តំបន់ ក្រុមបានធ្វើការកែលម្អរ៉ូបូតដោយបន្ថែមពាក់ព័ន្ធទៅនឹងមុខងារមួយចំនួនរបស់វា ព្រមទាំង AI ឱ្យប្រសើរជាងមុន ព្រមទាំងការស្រាវជ្រាវបន្ថែមអំពីព័ត៌មានពាក់ព័ន្ធទៅនឹងផ្នែកកសិកម្មផ្ទាល់ ដើម្បីក្រុមអាចត្រៀមខ្លួនឱ្យបានរួចរាល់ទៅកាន់វគ្គផ្ដាច់ព្រ័ត្រ។
ទោះបីជាគម្រោងរ៉ូបូតសម្លាប់សត្វល្អិតទទួលបានចំណាត់ថ្នាក់លេខ៣ ក្នុងការប្រកួតកម្រិតពិភពលោកក៏ដោយ តែបើតាម កញ្ញា កល្យាណ ក្រោយចប់ការប្រកួតនេះ ក្រុមរបស់ខ្លួន មិនទាន់សម្រេចចិត្តថានឹងធ្វើគម្រោងរ៉ូបូតមួយនេះ ឱ្យចេញជាផលិតផលសម្រេចនៅឡើយទេ ព្រោះការធ្វើចេញផលិតផលសម្រេចជារូបរាង ត្រូវការស្រាវជ្រាវ និងធ្វើបន្ថែមច្រើនទាំងផ្នែក Software និង Hardware របស់រ៉ូបូតផ្ទាល់ ដើម្បីទទួលបានផលិតផលដែលល្អមួយ និងជឿជាក់នៅក្នុងការយកទៅប្រើប្រាស់នៅក្នុងស្ថានភាពជាក់ស្តែង។
គួរជំរាបជូនថា កម្មវិធី Huawei ICT Competition ជាកម្មវិធីមួយដែលជ្រើសរើសនិស្សិតមកពីបណ្តាសាកលវិទ្យាល័យនានាដែលកំពុងចាប់យកជំនាញសិក្សាពាក់ព័ន្ធនឹងបច្ចេកវិទ្យាដើម្បីបង្កើតនូវគំនិតច្នៃប្រឌិតដោយប្រើប្រាស់បច្ចេកវិទ្យា ដើម្បីជាដំណោះស្រាយបញ្ហាណាមួយនៅក្នុងប្រទេសរបស់ខ្លួន៕
