ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីបើកវគ្គបំប៉នគ្រូឧទ្ទេសស្តីពីការអនុវត្តកញ្ចប់សម្ភារៈអំណាន និងគណិតវិទ្យាថ្នាក់ដំបូង កាលពីពេលថ្មីៗនេះ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយកដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា សម្រាប់ទ្រឹស្តីនៃការរៀនភាសាខ្មែរ ដើម្បីឱ្យកុមារឆាប់ចេះអាន និងសរសេរ ពួកគេចាំបាច់ត្រូវរៀនតាមលំដាប់លំដោយ តាមសមាសភាគទាំង៥នៃអំណាន រួមទាំងសំណេរមានដូចជា ការស្គាល់សូរ ការស្គាល់តួអក្សរ និងសូរ ការចេះវាក្យសព្ទ ការអានស្ទាត់ និងការអានយល់ន័យ។
យ៉ាងណាក៏ដោយ ដើម្បីឱ្យការរៀនភាសាខ្មែរផ្នែកអំណាន និងសំណេរឱ្យមានប្រសិទ្ធភាព ឯកឧត្តមបានរំលេចនូវធាតុចូលចំនួន៦ ដែលមានឥទ្ធិពលលើការរៀនភាសាផ្នែកអំណាន និងសំណេរ។ ធាតុចូលទាំង៦ នោះ រួមមាន ៖
ទី១. វិធីសាស្ត្រអំណានដំបូង ៖ គឺផ្តោតលើមូលដ្ឋាននៃវិទ្យាសាស្ត្រអំណាន ដើម្បីលើកកម្ពស់បំណិនអំណានស្ទាត់ និងសំណេរ។ ក្រសួងបានយកវិធីសាស្ត្រទាំងនេះ មករៀបជាកញ្ចប់អំណានដំបូង ដែលប្រើប្រាស់សម្រាប់ការបង្រៀនភាសាខ្មែរ។
ទី២. វិធីសាស្ត្របង្រៀនភាសាខ្មែរ ៖ ទ្រឹស្តីនៃការរៀនភាសាខ្មែរ ត្រូវមានបំណិនមូលដ្ឋាន ឱ្យសិស្សស្គាល់សូរ ចេះប្រកប ស្គាល់ស្រះ ស្រះពេញតួរ និងយល់ពីទំនាក់ទំនាងរវាងព្យាង្គ។ វិធីសាស្ត្របង្រៀន មាន២របៀប ១) ការបង្រៀនតាមបែបស្គាល់សូរ គឺបង្រៀនសិស្សឱ្យចេះប្រកប ស្គាល់តួអក្សរ និងប្រើរូបផងដែរ, ២) វិធីសាស្ត្រតាមបែបសរុប ជាការច្របាច់បញ្ចូលគ្នានៃវិធិសាស្ត្របែបចម្រុះ ដែលប្រើប្រាស់ញាណទាំងអស់។
ទី៣. ខួរក្បាល និងការចងចាំ ៖ សិស្សត្រូវរៀនដោយប្រើសៀវភៅគោល សៀវភៅជំនួយ និងអានសៀវភៅបន្ថែម ដើម្បីពង្រឹងសមត្ថភាពក្នុងការចងចាំ (រម្លឹកឡើងវិញដដែលៗច្រើនដង) ហើយមានតែការដុសខាត់ប្រើប្រាស់ញឹកញាប់ ទើបសិស្សអាចចងចាំបានយូរ។ ដូច្នេះហើយត្រូវមានសៀវភៅរឿងដើម្បីឱ្យកុមារអានបន្ថែម។
ទី៤. ទ្រឹស្តី នៃការរៀនភាសា ៖ បើតាមប្រសាសន៍ឯកឧត្តម ហង់ជួន ណារ៉ុន ទ្រឹស្តីនៃការរៀនភាសាមានចំនួន២ គឺ ១) «ការចាប់យកភាសា» កើតទ្បើងដូចកុមារដែលរៀននិយាយភាសាកំណើតរបស់ខ្លួន ២) «ការរៀនភាសា» គឺជាការរៀនភាសានៅក្នុងថ្នាក់រៀន តាមមេរៀនដែលគ្រូបង្រៀន។
ទី៥. វិធីសាស្ត្រអំណានក្នុងបណ្ណាល័យ ៖ សាលារៀនត្រូវតែមានបណ្ណាល័យស្តង់ដា មានសៀវភៅមានស្តង់ដា ការអានសៀវភៅត្រូវតាមកម្រិត នឹងជួយសិស្សឱ្យចេះវិភាគ និងចេះច្បាស់ ចងចាំបានយូរ។
ទី៦. តួនាទីមាតាបិតា ៖ ការគាំទ្ររបស់មាតាបិតាដល់ការសិក្សារបស់កូនៗ និងការថែទាំសុខុមាលភាពកុមារ កត្តាបរិស្ថាន មានសារៈសំខាន់ណាស់ចំពោះការលូតលាស់របស់កុមារ។ អ្នកអាណាព្យាបាលទាំងអស់ ត្រូវចូលរួមគាំទ្របង្រៀនកូនបន្ថែមនៅផ្ទះ និងជំរុញលើកទឹកចិត្តកូនឱ្យខិតខំប្រឹងប្រែងរៀនសូត្រ ដោយត្រូវអាន និងធ្វើលំហាត់ឱ្យច្រើន បន្ថែមពីលើការបញ្ជូនកូនមកទទួលការអប់រំនៅសាលារៀន។
ឯកឧត្ដមបណ្ឌិតសភាចារ្យបញ្ជាក់បន្ថែមថា ដើម្បីចេះភាសា អ្នកសិក្សាត្រូវទទួលធាតុចូលជាភាសាដែលខ្លួនរៀន ដើម្បីបង្កើនកម្រិតស្ទាត់ជំនាញឱ្យកាន់តែខ្លាំងទ្បើងថែមទៀត ដូចជាការរៀនពាក្យវេយ្យាករណ៍ ការបន្លឺសម្លេង និងបរិបទសង្គម និងវប្បធម៌នៃការប្រើប្រាស់វាក្យស័ព្ទ៕
