យើងទាំងអស់គ្នាមានបំណងចង់ទទួលបានការរស់នៅមួយមានភាពប្រសើរពីមួយពេលទៅមួយពេល ប៉ុន្តែពេលខ្លះមិនដឹងថា ត្រូវចាប់ផ្តើមពីណាទៅណា? គេហទំព័រ tiffytaffy បានបង្ហាញគន្លឹះ៣ដើម្បីឈានទៅរកការផ្លាស់ប្តូរបែបវិធីសាស្រ្តងាយៗដើម្បីអភិវឌ្ឍន៍ខ្លួន​ឱ្យប្រសើរជាងកាលពីមិ្សលមិញ។ អ្វីដែលគួរធ្វើបន្ទាប់ពីបានដឹងរាល់គន្លឹះទាំងនេះហើយ គឺការប្តេជ្ញាព្យាយាមអនុវត្តន៍ឱ្យបានទៀងទាត់ជាប្រចាំ។

១. ពិចារណាអំពីតម្រូវការ និងការចង់បាន ៖ បុគ្គលដែលមានវត្ថុបំណងចង់ក្លាយជាមនុស្សម្នាក់មានភាពមោះមុតជាងពេលមុនៗ ចាំបាច់ត្រូវតែវិនិយោគពេលថ្លឹងថ្លែង អំពីអ្វីទៅជាតម្រូវការដែលខ្វះមិនបាន ហើយអ្វីទៅដែលមានក៏បាន ហើយអត់ក៏បាន។ ការគិតនិងវិភាគត្រង់ចំណុចនេះឱ្យច្រើនដង ជួយពង្រឹងដល់ភាពហ្មត់ចត់នៃការប្រើប្រាស់ធនធាន និងពេលវេលាផ្ទាល់ខ្លួន។

២. គិតមុននិយាយ ឬគិតមុនសរសេរ ៖ បើសង្កេតឱ្យមែនទែន មានច្រើនករណីដែលជារឿយៗ ធ្វើឱ្យអ្នកដទៃ ក៏ដូចជាខ្លួនឯង ទទួលរងនូវក្ដីឈឺចាប់ ដោយសារតែការប្រើប្រាស់ពាក្យសម្តីមិនបានគិតពិចារណាឱ្យវែ​ងឆ្ងាយ។ ដូច្នេះ ការគិតមុនពេលនិយាយ អានមុននឹងគិត សុទ្ធសឹងតែជាចំណែកមិនអាចខ្វះបានក្នុងការកសាងសមត្ថភាពឱ្យប្រសើរជាងមុន។ ស្ថិតនៅក្នុងបរិបទមួយដែលផ្តល់តម្លៃចំពោះសេរីភាពនៃការបញ្ចេញមតិជារឿងល្អ ប៉ុន្តែទន្ទឹមគ្នានោះ ក៏ត្រូវរៀនពីរបៀបប្រើប្រាស់សេរីភាពទាំងនោះ ដោយធ្វើយ៉ាងណាបញ្ចៀសផលប៉ះពាល់ទៅកាន់អ្នកដទៃឱ្យបានច្រើនបំផុត។

៣. កាត់បន្ថយការនិយាយអ្វីដែលអ្វីមិនចាំបាច់ក្នុងបណ្តាញសង្គម ៖ បុគ្គលម្នាក់ៗ មានសិទ្ធក្នុងការប្រើប្រាស់បណ្តាញសង្គម និងចែករំលែករឿងរ៉ាវទៅតាមក្ដីប្រាថ្នារបស់ពួកគេ! ប៉ុន្តែគួរចងចាំដែរថា បណ្តាញសង្គមចែកចាយព័ត៌មានបែបសកល ហើយវាក៏ជាកន្លែងមួយជះឥទ្ធិពលមកកាន់ការគិត ឬខួរក្បាលផងដែរ។ ការគិតនៅពីមុខស្រ្គីន និងការគិតតាមបែបបទរស់នៅធម្មតាមានភាពខុសគ្នា។ ហើយការនិយាយលើប្រព័ន្ធផ្សព្វផ្សាយត្រូវការគិតក្នុងរយៈពេលយូរ ពេលខ្លះមនុស្សមួយចំនួនបានផ្សាយវាចារទាំងដែលខ្លួនមិនមានន័យបែបនោះទាល់តែសោះ។ ដូច្នេះ គួរទុកពេលខ្លះដើម្បីឆ្លុះបញ្ចាំងជាមួយនឹងខ្លួនឯង ដោយចោទជាសំណួរថា តើនឹងផ្តល់ផលចំណេញអ្វី? មួយវិញទៀតប្រសិនបើយកពេលដែលចំណាយទៅលើបណ្តាញសង្គមធ្វើសកម្មភាពដែលមិនចាំបាច់ ដើម្បីយកទៅប្រើប្រាស់ក្នុងជីវិត នៃការរស់នៅប្រចាំថ្ងៃវិញ តើវានឹងផ្តល់គុណតម្លៃយ៉ាងណាខ្លះ? ដូច្នេះកាត់បន្ថយការនិយាយអ្វីដែលអ្វីមិនប្រើប្រាស់ក្នុងជីវិតពិត ឬមិនផ្តល់ជាប្រយោជន៍ក្នុងបណ្តាញសង្គម មិនត្រឹមតែជាការពង្រឹងសមត្ថភាពផ្តោតប៉ុណ្ណោះទេ ប៉ុន្តែជាការចាយពេលប្រកបដោយគុណភាព៕