ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កាលដំបូងឡើយជីវភាពរបស់លោក ផន ថាវី បានជួបការលំបាកជាខ្លាំង ព្រោះតែមិនមានការងារធ្វើច្បាស់លាស់ មិនមានប្រាក់ចំណូលពិតប្រាកដ, តែក្រោយពីលោកសម្រេចចិត្តចូលសិក្សាជំនាញសេវាកម្មបរិក្ខាត្រជាក់ក្នុងគេហដ្ឋាន ពេលនេះជីវភាពរបស់លោកបានផ្លាស់ប្តូរ ដោយមានការងារ មានប្រាក់ចំណូលទៀងទាត់ ហើយបច្ចុប្បន្នលោកបានអភិវឌ្ឍន៍ខ្លួនរហូតក្លាយជាគ្រូបង្រៀនជំនាញនេះផងដែរ។
លោក ផន ថាវី ជាអតីតសិស្សដែលសិក្សាជំនាញសេវាកម្មបរិក្ខាត្រជាក់ក្នុងគេហដ្ឋាន នៃវិទ្យាស្ថានពហុបច្ចេកទេសភូមិភាគតេជោសែនបាត់ដំបង ហើយបច្ចុប្បន្នលោកជាជាងដំឡើង និងថែទាំម៉ាស៊ីនត្រជាក់ និងជួសជុលបណ្ដាញអគ្គិសនីក្នុងអគារ និងជាគ្រូបង្ហាត់បង្រៀនជំនាញមួយនេះ។
លោក ថាវី បានលើកឡើងថា បច្ចុប្បន្នតម្រូវការក្នុងការប្រើប្រាស់ម៉ាស៊ីនត្រជាក់របស់ប្រជាជនយើងមានកាន់តែច្រើន ដូចនេះនាំឱ្យមានតម្រូវការជាងបច្ចេកទេសក៏កាន់តែច្រើនដែលប្រកបដោយវិជ្ជាជីវៈ។ លោកបន្តថា នៅពេលដែលលោកសម្រេចចិត្តរៀនជំនាញនេះដំបូង គឺមិនមានការរារាំង ឬបដិសេធន៍ពីក្រុមគ្រួសារទេ ប៉ុន្តែពួកគាត់មានការព្រួយបារម្ភព្រោះជំនាញនេះនឹងសិក្សាជាមួយអគ្គិសនី និងនៅទីខ្ពស់ជាដើម។ គិតដល់ចំចំណុចនៃការព្រួយបារម្ភនេះវិញ លោក ថាវី យល់ឃើញថា នេះជាការរៀនជំនាញដែលលោកនឹងរៀនពីបច្ចេកទេសផ្សេងៗ និងបានដឹងពីរបៀបការពារខ្លួន ដូចនេះមិនមែនជាបញ្ហាឡើយ។
ជំនាញដែលលោក ផន ថាវី សិក្សានេះ គឺផ្ដោតសំខាន់ទៅលើ ការដំឡើង និងថែទាំ ជួសជុលកំហូចតិចតួចដោយការសិក្សារយៈពេល៣ខែ ៤ខែ។ លើសពីនេះ ការសិក្សាមានវគ្គសិក្សាបន្តបន្ទាប់សម្រាប់សិស្សចប់វគ្គសញ្ញាបត្របច្ចេកទេស C1 C2 និង C3 ដោយសញ្ញាបត្រទាំង៣នេះមានតម្លៃស្មើនឹងសញ្ញាបត្រថ្នាក់ទី១២ ។ លោកបានបន្តថា លោកសម្រេចចិត្តរៀន៣វគ្គនេះ ព្រោះនៅកំឡុងពេលលោកចូលរៀនជំនាញមិនទាន់មានវគ្គខ្លី(៣ និង៤ខែ) ហើយលោកក៏ចង់បានសញ្ញាបត្រស្មើថ្នាក់ទី១២ ដើម្បីអាចងាយស្រួលបន្តការសិក្សាថ្នាក់បរិញ្ញាបត្ររង ឬបរិញ្ញាបត្រប្រសិនបើលោកចង់។
នៅក្នុងកំឡុងពេលសិក្សាជំនាញនេះ លោក ថាវី ក៏បានជួបផលលំបាកក្នុងការសិក្សាជាបន្តបន្ទាប់ផងដែរ ព្រោះក្នុងកំឡុងពេលសិក្សាជាការសិក្សានៅពេលរសៀល និងមិនមានចំណូលសម្រាប់គ្រួសារ ប៉ុន្តែលោកអាចយកពេលទំនេរព្រឹកទៅធ្វើការងារផ្ទះ និងឆ្លៀតពេលចេញធ្វើការឱ្យគេខ្លះដើម្បបានកម្រៃ និងសន្សំបទពិសោធន៍ផង។
« ទោះពិបាកក្នុងការរៀនជំនាញយ៉ាងណា ក៏ខ្ញុំមិនបោះបង់ការសិក្សាម្ដងទៀតឡើយ ព្រោះខ្ញុំបានគិតថា ខ្ញុំធ្លាប់បោះបង់ការសិក្សាម្ដងហើយនៅអនុវិទ្យាល័យ ហើយក្រោយបញ្ចប់ការសិក្សា ខ្ញុំនឹងមានការងារមួយច្បាស់លាស់អាចរកចំណូលចូលគ្រួសារបាននឹងនរ»
លោក ផន ថាវី
លោកគ្រូបង្ហាត់បង្រៀនជំនាញរូបនេះបានបន្ថែមថា ប្រសិនបើសិស្សនិស្សិត ឬយុវជន យុវនារី ចង់មានជំនាញមួយសម្រាប់ខ្លួនឯង អាចទៅចុះឈ្មោះសិក្សានៅវិទ្យាស្ថានពហុបច្ចេកទេសភូមិភាគតេជោសែនបាត់ដំបង និងមជ្ឈមណ្ឌលបច្ចេកនានាតាមបណ្ដាខេត្តដែលខ្លួនរស់នៅ។
ជាមួយគ្នានេះ លោក ផន ថាវី ក៏បានលើកទឹកចិត្តដល់អ្នកទាំងអស់គ្នាដែលចង់សិក្សា និងកំពុងសិក្សាជំនាញបច្ចេកទេស សូមយកចិត្តទុកដាក់ក្នុងការសិក្សា និងព្យាយាមរៀនសូត្រ និងអនុវត្តនូវមេរៀនដែលបានរៀនឱ្យបានច្រើនដើម្បីទទួលបានបទពិសោធន៍៕
