ការសិក្សាថ្មីមួយបានរកឃើញថា ការចំណាយពេលច្រើននៅជាមួយអេក្រង់ក្នុងវ័យកុមារ អាចជះឥទ្ធិពលអវិជ្ជមានដល់ដំណើរការសិក្សាកម្រិតដំបូងរបស់កុមារ។

អ្នកស្រាវជ្រាវបាននិយាយថា ការរកឃើញនេះ បានគូសបញ្ជាក់ពីសារៈសំខាន់ នៃការអភិវឌ្ឍទម្លាប់នៃការប្រើប្រាស់អេក្រង់ឱ្យបានល្អតាំងពីក្មេង។

នៅក្នុងការសិក្សាដែលត្រូវបានបោះពុម្ពនៅក្នុងទស្សនាវដ្តី JAMA Network Open បានបង្ហាញថា កុមារតូចៗ ដែលចំណាយពេលច្រើននៅជាមួយអេក្រង់ មានទំនោរទទួលបានពិន្ទុមិនល្អលើការអាន និងការធ្វើតេស្តគណិតវិទ្យា។

អ្នកវិទ្យាសាស្ត្របានតាមដានកុមារជាង ៣ពាន់នាក់ មកពីរដ្ឋ Ontario ប្រទេសកាណាដា ពីឆ្នាំ២០០៨ ដល់ឆ្នាំ ២០២៣។ នៅក្នុងដំណើរការតាមដាន អ្នកវិទ្យាសាស្ត្របានភ្ជាប់ទិន្ន​ន័យ ដែលរាយការណ៍ដោយមាតាបិតា អំពីម៉ោងដែលកុមារនៅជាមួយអេក្រង់ និងលទ្ធផលលើការធ្វើតេស្តស្ដង់ដារ ដែលធ្វើឡើងលើកុមារថ្នាក់ទី៣ និងទី៦ ដែលមានអាយុប្រហែល ៨ និង១១ឆ្នាំ។

អ្នកស្រាវជ្រាវបានពិនិត្យមើលទំនាក់ទំនងរវាងម៉ោងសរុប ដែលកុមារនៅជាមួយអេក្រង់ និងលទ្ធផលនៃការសិក្សាកម្រិតដំបូងរបស់កុមារ ដោយតាមដានពីសកម្មភាពប្លែកៗពីគ្នា ដែលកុមារនៅជាមួយអេក្រង់ និងលទ្ធផលសិក្សាក្នុងថ្នាក់រៀន។ សកម្មភាពទាំងនោះ រួមមាន ការលេងវីដេអូហ្គេម ការមើលទូរទស្សន៍ និងការចំណាយពេលលើឧបករណ៍ឌីជីថល ដូចជា កុំព្យូទ័រ ស្មាតហ្វូន និងថេប្លេតជាដើម។

ជាលទ្ធផល កុមារ ដែលចំណាយពេលច្រើននៅជាមួយអេក្រង់ ដូចជា ការមើលទូរទស្សន៍ និងឧបករណ៍ឌីជីថល ទទួលលទ្ធផលតេស្តអំណាន និងគណិតវិទ្យា មិនល្អទាល់តែសោះ។

ចំណុចដែលគួរឱ្យកត់សម្គាល់គឺ អ្នកវិទ្យាសាស្ត្រមិនបានរកឃើញភស្តុតាង ដែលជាប់ទាក់ទនងនឹងការចំណាយពេលវេលាជាមួយអេក្រង់ និងការចុះខ្សោយជំនាញសរសេរនោះទេ។

មានតែឪពុកម្ដាយ ២០ភាគរយប៉ុណ្ណោះ ដែលនិយាយថា កូនរបស់ពួកគេលេងវីដេអូហ្គេម។ វីដេអូហ្គេម គឺជាប់ទាក់ទងនឹងការចុះខ្សោយ នៃសមត្ថភាពអាន និងការដោះស្រាយលំហាត់គណិតវិទ្យា របស់សិស្សថ្នាក់ទី៣ ។

វេជ្ជបណ្ឌិត Catherine Birken អ្នកនិពន្ធម្នាក់ នៃការសិក្សា និងអ្នកវិទ្យាសាស្ត្រសុខភាពកុមារជាន់ខ្ពស់នៅវិទ្យាស្ថានស្រាវជ្រាវ SickKids ក្នុងទីក្រុង Toronto ប្រទេសកាណាដា បាននិយាយនៅក្នុងសេចក្តីថ្លែងការណ៍មួយថា ការរកឃើញនេះ បង្ហាញពីសារៈសំខាន់ នៃការធ្វើអន្តរាគមន៍កម្រិតបឋមលើកុមារតូចៗ និងក្រុមគ្រួសាររបស់ពួកគេ ដើម្បីលើកកម្ពស់ការបង្កើតទម្លាប់ល្អនៅជាមួយអេក្រង់។

ទន្ទឹមនឹងលទ្ធផលនៃការសិក្សា អង្គការសុខភាពពិភពលោក (WHO) បានណែនាំឱ្យអាណាព្យាបាល បង្កើតពេលវេលាអតិបរមា សម្រាប់កុមារមានអាយុចន្លោះពី ២ ទៅ៤ឆ្នាំ ត្រឹមមួយម៉ោងក្នុងមួយថ្ងៃ។ ខណៈទារក ដែលមានអាយុក្រោម ១ឆ្នាំ គឺមិនអនុញ្ញាតឱ្យមើលអេក្រង់នោះទេ៕