ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការចាប់ផ្តើមថ្ងៃថ្មីជាមួយទម្លាប់ល្អៗ មិនគិតពីរឿងសៅហ្មង ធ្វើឱ្យសុខភាពផ្លូវចិត្តរបស់យើងកាន់តែល្អប្រសើរ ដែលវានឹងនាំមកនូវសិរីសួស្តីពេញមួយថ្ងៃ។
ព្រះភិក្ខុវជិរប្បញ្ញោ គូ សុភាព មានសង្ឃដីកាថា ទម្លាប់ពេលព្រឹកដែលនាំមកនូវសិរីសួស្តី និងបញ្ញា គឺជាទម្លាប់ដែលធ្វើឱ្យចិត្តស្រស់ថ្លា សប្បាយចិត្ត, ទម្លាប់មើល ឬស្តាប់រឿងដែលនាំឱ្យជ្រះថ្លាក្នុងចិត្ត។ ព្រះតេជគុណ បញ្ជាក់ថា ខួរក្បាលមនុស្ស គឺឆាប់ភ្ជាប់នឹងរឿងរ៉ាវដែលយើងផ្តោត ដូច្នេះ យុវជន ត្រូវចេះរៀបចំការគិតឱ្យល្អ នៅពេលព្រលឹម បើអាច សូមស្តាប់ធម៌ ឬធ្វើសមាធិឱ្យបាន២ ទៅ៣នាទី ដើម្បីឱ្យចិត្តយើងរឹងប៉ឹង ធ្វើឱ្យមុខស្រស់ថ្លា ធ្វើឱ្យសុខភាពផ្លូវចិត្តល្អ។
ជាមួយគ្នានេះដែរ បើយោងតាមការណែនាំរបស់វេជ្ជបណ្ឌិត អ្វីដែលយើងធ្វើ ឬជួបប្រទះនៅពេលព្រឹក ពិតជាមានឥទ្ធិពលចំពោះអារម្មណ៍ សកម្មភាព និងការគិតរបស់យើងពេញមួយថ្ងៃ ដូច្នេះយើងគួរតែរៀនបង្កើតនូវទម្លាប់ពេលព្រឹកងាយៗ។ ខាងក្រោមនេះ គឺជាទម្លាប់ពេលព្រឹកចំនួន ៧ ដែលនឹងជួយនាំឱ្យយើងមានសិរីសួស្តីពេញមួយថ្ងៃបាន៖
១. ផ្តល់ជាតិទឹកដល់សារពាង្គកាយ ៖ អាចញ៉ាំទឹកមួយកែវពេលព្រឹក ឬទឹកក្រូចឆ្មារលាយជាមួយទឹកក្តៅឧណ្ហៗ ដែលនឹងជួយសម្អាតសារធាតុពុល ផ្តល់នូវវីតាមីន C ធ្វើឱ្យខ្យល់ដង្ហើមស្រស់ថ្លា ហើយវាក៏ជួយឱ្យស្រកទម្ងន់ ព្រមទាំងជំរុញដល់ដំណើរការដុត និងរំលាយអាហារផងដែរ។
២. នឹកគិតបែបសុទិដ្ឋិនិយម និងការដឹងគុណ ៖ ចំណាយពេលប្រមាណ ១នាទី ញញឹម ហើយនឹកគិតដល់អ្វី ឬនរណាម្នាក់ដែលអ្នកដឹងគុណនិងមានអំណរចំពោះវត្តមានរបស់វា ឬគេ ព្រោះថា ការញញឹមនឹងនាំឱ្យមានការផលិតចេញនូវអ័រម៉ូនដែលធ្វើឱ្យអារម្មណ៍ស្រស់ថ្លា ស្របពេលដែលការរំលឹកដឹងអាចនឹងកាត់បន្ថយស្ត្រេស និងនាំឱ្យមានអារម្មណ៍ល្អ។
៣. ធ្វើសមាធិ ៖ សកម្មភាពនេះនឹងជួយត្រៀម ក៏ដូចជាហ្វឹកហាត់ចិត្ត និងអារម្មណ៍ ដែលនឹងមានឥទ្ធិពលលើប្រតិកម្មរបស់អ្នកចំពោះរឿងរ៉ាវគ្រប់យ៉ាងដែលនឹងកើតមានឡើង។ ការសមាធិអាចជាការអង្គុយចុះនៅកន្លែងដែលស្ងប់ស្ងាត់ បិទភ្នែក ហើយផ្តោតលើដង្ហើមចេញ និងចូល ប្រមាណ ៥នាទី ហើយគិតស្រមៃដល់រូបភាពដែលអ្នកនឹងត្រូវធ្វើក្នុងថ្ងៃនេះ រួចបើកភ្នែកសន្ធឹងដៃឡើងលើ ហើយងើបឡើង។
៤. រៀបចំគ្រែ ឬកន្លែងគេង ៖ វានឹងផ្តល់នូវអារម្មណ៍ថា អ្នកបានសម្រេចកិច្ចការមួយ ហើយអារម្មណ៍មោទនភាពក្នុងការសម្រេចការងារបែបនេះ នឹងជួយជំរុញទឹកចិត្តក្នុងការបំពេញកិច្ចការងារជាបន្តបន្ទាប់។
៥. ធ្វើលំហាត់ប្រាណ ៖ លំហាត់ប្រាណងាយៗ យោគៈ ឬសកម្មភាពណាក៏ដោយ ឱ្យតែធ្វើឱ្យអ្នកមានថាមពល និងឫកពារហ័សរហួន គួរតែត្រូវបានធ្វើក្នុងរយៈពេលសមល្មម (១០-២០នាទី) ហើយអាចធ្វើការឆ្លាស់នូវប្រភេទ ក៏ដូចជាសកម្មភាពទាំងនោះក៏បានដែរ។
៦. រៀបចំខ្លួនឱ្យបានស្អាតបាត ៖ សកម្មភាពតូចៗតែសំខាន់ ចំពោះអនាម័យសម្ផស្ស និងសុខភាពរបស់អ្នក ពិតជាមិនអាចរំលងបានឡើយ ព្រោះការរៀបចំខ្លួនបានល្អប្រៀបនឹងការកសាងនូវទំនុកចិត្តដល់ខ្លួនឯងហើយជាលទ្ធផល អ្នកនឹងមានអារម្មណ៍ល្អសម្រាប់ថ្ងៃថ្មីរបស់អ្នក។
៧. ញ៉ាំអាហារពេលព្រឹក ដែលល្អចំពោះសុខភាព ៖ អាហារពេលព្រឹក ជាអាហារដែលសំខាន់ជាងគេ ដូចនេះហើយ វាគួរតែមានសារធាតុចិញ្ចឹមទាំងនេះ (ប្រូតេអុីន ខ្លាញ់ល្អ គ្រាប់ធញ្ញជាតិ…) ដើម្បីឱ្យរាងកាយមានថាមពលព្រមទាំងផ្លូវចិត្តរឹងមាំល្អក្នុងការផ្ចង់អារម្មណ៍ និងបំពេញការងារ។
ទម្លាប់ទាំងនេះអាចជួយនាំមកនូវសិរីសួស្តីពេញមួយថ្ងៃ ហើយវាក៏ជាភាពរីកចម្រើននៅក្នុងជីវិតផងដែរ៕
