ការបង្ហាញអាកប្បកិរិយាតាមរយៈពាក្យសម្តីក្ដី កាយវិការក្ដី ដែលនាំឱ្យភាគីម្ខាងៗប៉ះពាល់ផ្លូវចិត្ត គឺដល់ពេលដែលត្រូវកាត់បន្ថយ ឬការជជែកស្វែងរកដំណោះស្រាយ។ តាមរយៈគេហទំព័រ verywellmind បានបង្ហាញគន្លឹះ៣ចំណុចក្នុងការពង្រឹងទំនាក់ទំនងដែលល្អស្រាប់ ឱ្យកាន់តែមានផាសុកភាពបន្ថែមទៀត។

១. ប្តេជ្ញាដោះស្រាយ ៖ ដើម្បីឱ្យទំនាក់ទំនងមួយដំណើរការរលូន មិនថាមិត្តជិតស្និទ្ធ ឬក៏ដៃគូជីវិត គឺត្រូវមានការប្តេជ្ញាចិត្តបង្កើនភាពរឹងមាំទាំងគ្រប់ភាគី។ ប្រសិនបើមានតែបុគ្គលម្នាក់ ឬភាគីតែម្ខាងៗ ជាអ្នកដែលមានគំនិតផ្តួចផ្តើមឡើងក្នុងការកសាង គឺជាការបង្កើតបាននូវសេចក្ដីប្រឹងប្រែងម្នាក់ឯង! ដែលចំណុចនេះបណ្តាលឱ្យកើតមានអាការស្រ្តេស មានការអាក់អន់ចិត្ត និងធ្វើឱ្យស្ថានភាពផ្លូវចិត្ត ឬក៏ថាមពលចុះខ្សោយ។ មនុស្សដែលពាក់ព័ន្ធក្នុងទំនាក់ទំនង ត្រូវតែមានការប្តេជ្ញាថែរក្សាទំនាក់ទំនង និងអនុវត្តនូវអ្វីដែលខ្លួនត្រូវធ្វើ ក៏ដូចជាក្លាយជាចំណែកនៃការដោះស្រាយបញ្ហាក្នុងទំនាក់ទំនងដែលកើតមាន ឬបញ្ហាប្រុងនឹងកើតមាន។

២. បង្ហាញនូវការពេញចិត្ត ៖ ការបង្ហាញអារម្មណ៍ ឬសេចក្ដីពេញចិត្តទៅកាន់គ្នា គឺជាបទពិសោធន៍មួយដែលនាំឱ្យសុខភាពផ្លូវចិត្តល្អប្រសើរ រួមទាំងការបង្កើនភាពស្និទ្ធស្នាលនៃទំនាក់ទំនង។ ដូច្នេះព្យាយាមរកវិធីសាស្រ្តក្នុងការបង្ហាញទៅតាមកាលៈទេសៈរៀងៗខ្លួន ដោយហេតុថា ការបង្ហាញការពេញចិត្តចំពោះគ្នាគឺជាចំណែកសំខាន់ដែលមានតួនាទីរុញច្រានទំនាក់ទំនងមានផាសុកភាព។

ការសិក្សាមួយបានឱ្យដឹងថា ការចេះបង្ហាញសេចក្ដីពេញចិត្តចំពោះដៃគូ ឬមិត្តភាព ជាកត្តាអភិវឌ្ឍន៍ទំនាក់ទំនងឱ្យទៅមុខកាន់តែប្រសើរ ហើយកាន់តែមានប្រសិទ្ធភាពទៀតនោះ គឺនៅពេលដែលបង្ហាញការពេញចិត្តទៅកាន់គ្នាដោយសុទ្ធចិត្ត។ មិនតែប៉ុណ្ណោះ ការបង្ហាញសេចក្ដីដឹងគុណអាចជាខែលការពារទំនាក់ទំនង និងកាត់បន្ថយជម្លោះផ្សេងៗ។

៣. រក្សាសកម្មភាពដែលគួរឱ្យចាប់អារម្មណ៍ ៖ មិនយូរ មិនឆាប់ ភាពធុញទ្រាន់ក្នុងទំនាក់ទំនងនឹងកើតមាន ដូច្នេះ គួរឆ្លុះបញ្ចាំង និងកត់ចំណាំសកម្មភាពទាំងឡាយណាដែលនាំឱ្យទំនាក់ទំនងល្អ រួចបង្កើតជាកាលវិភាគ មានម៉ោង មានពេលច្បាស់លាស់ ក្នុងការប្រើប្រាស់ពេលជាមួយគ្នា។ ក្រៅពីនោះ ស្វែងរកសកម្មភាពថ្មីៗដើម្បីធ្វើបន្ថែម មិនថាពាក់ព័ន្ធនឹងការរៀនជំនាញថ្មីៗ ឬក៏ពាក់ព័ន្ធនឹងសកម្មភាពសម្រាប់ធ្វើនៅពេលទំនេរ៕