ភ្នំពេញ – បន្ទាប់ពីបង្ហាញរ៉ូប៉ូតដែលអាចធ្វើដំណើរដោយរក្សាលំនឹងខ្លួនបានគ្រប់ស្ថានភាពផ្លូវ ទោះបីផ្លូវនោះខ្ពស់ទាបពុំរាបស្មើ ឬចង្អៀតយ៉ាងណាក៏ដោយ នៅក្នុងពិព័រណ៌ទិវានៃជាតិវិទ្យាសាស្ត្រ បច្ចេកវិទ្យា និងនវានុវត្តន៍ លើកទី១ លោក អ៊ាន សុខណាង ប្រធានក្រុមវិស្វករ STEAM នៃក្រុមហ៊ុន AI Farm បាននិយាយថា បច្ចុប្បន្នយុវជនកម្ពុជាចាប់ផ្តើមចាប់អារម្មណ៍កាន់តែខ្លាំងលើការអភិវឌ្ឍន៍បច្ចេកវិទ្យាថ្មីៗ ដែលជាសញ្ញាមួយបញ្ជាក់ថា កម្ពុជាកំពុងបោះជំហានឆ្ពោះទៅរកនិន្នាការអភិវឌ្ឍបច្ចេកវិទ្យា និងនវានុវត្តន៍កាន់តែប្រសើរ ។

ក្នុងនាមជាអ្នកជំនាញផ្នែកអភិវឌ្ឍបច្ចេកវិទ្យាទំនើប លោក អ៊ាន សុខណាង យល់ឃើញថា ទោះបីកម្ពុជាបច្ចប្បន្នជាប្រទេសកំពុងអភិវឌ្ឍន៍ និងជាប្រទេសប្រើប្រាស់បច្ចេកវិទ្យាក៏ពិតមែន ប៉ុន្តែការសិក្សា និងការបង្កើតបច្ចេកវិទ្យាថ្មីៗបម្រើដល់ឧស្សាហកម្មក្នុងស្រុកទៅថ្ងៃអនាគតជាតម្រូវការចាំបាច់មួយដែលយុវជនកម្ពុជាត្រូវចាប់ផ្តើមពីថ្ងៃនេះ ។

លោក អ៊ាន សុខណាង ប្រធានក្រុមវិស្វករ STEAM នៃក្រុមហ៊ុន AI Farm បាននិយាយថា

“យើងទទួលស្គាល់ថា ការបង្កើតបច្ចេកវិទ្យារបស់យើងយឺតជាងប្រទេសអភិវឌ្ឍន៍ពិតមែន ប៉ុន្តែការចាប់ផ្តើមរបស់យើងនៅថ្ងៃនេះនឹងចូលរួមជួយកាត់បន្ថយកម្លាំងពលកម្មរបស់មនុស្សទៅថ្ងៃអនាគត បើបង្កើតបានធនធានមនុស្សបានថ្ងៃនេះ នោះយើងមិនចាំបាច់ចំណាយច្រើន (លុយ) ជួលអ្នកធនធានមនុស្សមកពីក្រៅស្រុកនោះទេ ។”

សម្រាប់អ្នកសិក្សាជំនាញវិទ្យាសាស្ត្រ បច្ចេកវិទ្យា និងនវានុវត្តន៍រូបនេះ បន្តយល់ឃើញបន្តថា ដើម្បីឱ្យវិស័យវិទ្យាសាស្ត្រ បច្ចេកវិទ្យា និងនវានុវត្តន៍កម្ពុជារីកចម្រើនលឿន ការសិក្សាមុខវិជ្ជាវិទ្យាស្ត្រពិតតាំងពីកម្រិតវិទ្យាល័យ ឬបណ្តុះគំនិតកុមារឱ្យស្រឡាញ់វិទ្យាសាស្ត្រជាភារៈដែលភាគីពាក់ព័ន្ធត្រូវធ្វើ ។ សព្វថ្ងៃភាពយឺតយ៉ាងក្នុងការអភិវឌ្ឍន៍បច្ចេកវិទ្យានៅកម្ពុជាកើតឡើងដោយសារកង្វះធនធានមនុស្សជំនាញ និងកង្វះថវិកាវិនិយោគលើការស្រាវជ្រាវបច្ចេកវិទ្យា ។   

សូមជម្រាបថា ឯកឧត្តមទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងនៅក្នុងពិព័រណ៌នៃទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ថា តាមរយៈការដឹកនាំរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជាកំពុងរៀបចំហេដ្ឋារចនាសម្ព័ន្ធគាំទ្រដល់ការសិក្សា និងការបង្កើតថ្មី ។ ទន្ទឹមគ្នានេះ កម្ពុជានឹងស្មើមុខមាត់ជាមួយប្រទេសអភិវឌ្ឍន៍លើការផលិតឧបករណ៍ និងសម្ភារៈវិទ្យាសាស្ត្រ បច្ចេកវិទ្យា និងនវានុវត្តន៍នៅថ្ងៃណាមួយ ៕