ការយកចិត្តទុកដាក់ចំពោះខ្លួនឯង (Self-care) មានន័យថា ការ​ចេះវិនិយោគពេលវេលាក្នុងការរស់នៅប្រចាំថ្ងៃបានគាប់ប្រសើរ និងអាចអភិវឌ្ឍទាំងសុខភាពផ្លូវចិត្ត និងផ្លូវកាយ ។ ចំណែកឯ ការថែទាំខ្លួន គឺផ្តោតចំពោះសុខភាពផ្លូវចិត្ត ដោយ​ចាំបាច់ត្រូវចេះគ្រប់គ្រងភាពតាងតឹង កាត់បន្ថយហានិភ័យ នៃជំងឺនានា និងបង្កើនថាមពលផ្នែកស្មារតីឱ្យរឹងមាំ។ យោងតាមគេហទំព័រ National Institute of Mental Health (NIH) បានប្រាប់នូវវិធីសាស្រ្ត៨ចំណុច ដែលបញ្ជាក់ថា អ្នកបានយកចិត្តទុកដាក់ចំពោះខ្លួនឯង ឬក៏អ្នកអាចប្រើប្រាស់វិធីទាំងនោះ យកទៅប្រតិបត្តិដោយគិតចាប់ពីឥឡូវនេះតែម្តង ដើម្បីជំរុញការវិវឌ្ឍន៍សមត្ថភាពបន្ថែម។

១. ហាត់ប្រាណឱ្យទៀងទាត់ ៖ ត្រឹមតែការដើរហាត់ប្រាណ៣០នាទីក្នុងមួយថ្ងៃ វាក៏អាចជួយជំរុញដល់ភាពស្រស់ស្រាយផ្នែកសុខភាពផ្លូវចិត្ត ព្រមទាំងលំនឹងស្មារតី ។ ប៉ុន្តែប្រសិនបើស្ថានភាពរាងកាយរបស់អ្នកមិនអាចធ្វើទៅរួច ចូរកាត់បន្ថយរយៈពេលចុះ ប៉ុន្តែសូមហាត់ឱ្យបានទៀងទាត់ ទោះបីជាមិនបានគ្រប់៣០នាទីក៏ដោយ។

២. គិតអំពីអាហារកិច្ច ៖ ការគិតគូរអំពីរបបអាហារមានដូចជា ប្រភេទបន្លែផ្លែឈើ ត្រីសាច់ ឬរបស់ផ្សេងៗទៀត ដែលផ្តល់អត្ថប្រយោជន៍ដល់សុខភាព និងការបរិភោគទឹកឱ្យបានគ្រប់គ្រាន់ជាដើម ។ ការចេះស្ទង់កម្រិត អំពីបរិមាណនៃរបបអាហារដែលត្រូវបរិភោគប្រចាំថ្ងៃ (មិនខ្វះខាត ឬលើសពេក) អាចជំរុញឱ្យមានថាមពលគ្រប់គ្រាន់ និងអាចផ្តោតសតិបានពេញមួយថ្ងៃ។ មួយវិញទៀតត្រូវយកចិត្តទុកដាក់ អំពីការទទួលទានរាល់ជាតិកាហ្វេអ៊ីននានា ឱ្យស្របនឹងតម្រូវការរាងកាយ ដែលមានដូចជា ភេសជ្ជៈ គ្រឿងកំប៉ុង និងកាហ្វេជាដើម។

៣. ផ្តល់អាទិភាពចំពោះដំណេក៖ ជាទូទៅមានភារកិច្ចជាច្រើនដែលគេត្រូវបង្កើតផែនការសកម្មភាព ហើយសូម្បីតែការគេង ក៏មានភាពចាំបាច់ក្នុងការកំណត់នូវ​ពេលវេលាឱ្យបានជាក់លាក់ដែរ ។ ដើម្បីជំរុញឱ្យការគេងឆ្លើយតបនឹងតម្រូវការសុខភាព ជាដំបូងត្រូវយកចិត្តទុកដាក់ជាមួយកាលវិភាគ និងត្រូវកំណត់រយៈពេល​គេងឱ្យបានគ្រប់គ្រាន់។ តាមការសិក្សាបានរកឃើញថា ពន្លឺដែលជះចេញពីអេក្រង់អេឡិចត្រូនិច មិនថា ទូរស័ព្ទ ឬកុំព្យូទ័រ គឺសុទ្ធតែប៉ះពាល់ទៅកាន់ដំណេក និងនាំឱ្យកើតមានបញ្ហា ការគេងមិនងាយលក់ជាដើម ប៉ុន្តែបើបានប្តូរអេក្រង់ ឱ្យទៅជាពន្លឺសម្រាប់ពេលយប់ ឬរក្សាគម្លាតពីពន្លឺអេក្រង់មុននឹងប្រះដេក នោះវានឹងអាចសម្រួលដល់បញ្ហានេះបានមួយចំនួន។

៤. ធ្វើសកម្មភាពកម្សាន្ត ៖ សាកល្បងសកម្មភាពថ្មីៗដែលធ្វើឱ្យមានអារម្មណ៍រីករាយ ឬក៏ប្រើប្រាស់កម្មវិធីដែលពាក់ព័ន្ធនឹងការថែទាំសុខភាព មានដូចជា កម្មវីធីសមាធិ របៀបសម្រាកបន្ធូរសាច់ដុំ និងរបៀបហាត់ដកដង្ហើមជាដើម ។ សកម្មភាពទាំងនេះ ត្រូវសរសេរបញ្ចូលទៅក្នុងសកម្មភាព ដើម្បីអនុវត្តឱ្យបានទៀងទាត់។ ទន្ទឹមគ្នានោះ ជ្រើសរើសសកម្មភាពណាមួយដែលជាចំណូចចិត្តផ្ទាល់ខ្លួន ដូចជាការសរសេរកំណត់ហេតុជាដើម។

៥. កំរិតគោលដៅ និងចាត់ចំណុចអាទិភាព ៖ គ្រាន់តែបែងចែកឱ្យដាច់រវាងកិច្ចការដែលជាអាទិភាព និងការងារបន្ទាប់បន្សំ ។ កិច្ចការបន្ទាន់ត្រូវធ្វើវាមុន កិច្ចការដែលអាចចាំបាន ត្រូវធ្វើនៅកិច្ចបន្ទាប់ ។ ប្រសិនបើអ្នកមានភារកិច្ចច្រើន ហើយមិនអាចបន្ថែមភារកិច្ចថ្មីទៅក្នុងកាលវិភាគបានទេ គឺត្រូវក្លាហានក្នុងការបដិសេធ ពេលមានការស្នើនូវកិច្ចការបន្ថែម។ ត្រូវរៀនមានមោទកភាពជាមួយនឹងលទ្ធផលដែលសម្រេចបានក្នុងរយៈពេលពេញមួយថ្ងៃ ជំនួសឱ្យការគិតនូវអ្វីដែលមិនអាចសម្រេចបានតែមួយមុខ។

៦. រំឮកលទ្ធផល ៖ រំឮកខ្លួនឯងជារៀងរាល់ថ្ងៃនូវ​អ្វីដែលធ្វើបានល្អៗកន្លងមក ហើយឆ្លុះបញ្ចាំងនូវ​ចំណុចជាក់លាក់ រួចកត់ត្រាវាទុកក្នុងសៀវភៅ ឬក្នុងកុំព្យូទ័រនៅពេលយប់ ឬក៏ការគិតវិភាគទុកក្នុងចិត្តក៏បាន។

៧. ផ្តោតលើអ្វីដែលអាចធ្វើបាន ៖ កត់សម្គាល់ និងហ៊ានប្រឈមនូវបញ្ហាអវិជ្ជមាន និងផ្លាស់ប្តូរនូវការគិតទាំងឡាយណា ដែលមិនផ្តល់ផលចំណេញ។

៨. រក្សាទំនាក់ទំនង៖ ចាប់ផ្តើមទាក់ទងទៅកាន់មិត្តរបស់អ្នកជាមុន ឬសមាជិកគ្រួសារណាដែលតែងតែផ្តល់នូវអារម្មណ៍ល្អៗ និងបុគ្គលដែលអាច ឬធ្លាប់ជួយអ្នកបានក្នុងផ្នែកណាមួយ៕