ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភាពរីករាយ ឬសុភមង្គលអាចកើតមាននៅពេលទទួលបានការសរសើរ ការទិញរបស់របរប្រើប្រាស់ថ្មីៗ ទទួលបានការគាំទ្រក្នុងបណ្ដាញសង្គមតាមរយៈការចុចរូបមេដៃ ឬក៏បេះដូង ក៏អាចផ្តល់នូវភាពរីករាយបានដែរ ប៉ុន្តែភាពរីករាយទាំងនេះ បែរជាកើតមានក្នុងរយៈពេលខ្លីប៉ុណ្ណោះ។ សំណួរសួរថា តើអ្វីទៅជាភាពរីករាយក្នុងរយៈពេលវែង? តាមរយៈគេហទំព័រ Graziamagazine បានបង្ហាញគន្លឹះប្រាំចំណុចដែលអាចរក្សាទឹកចិត្ត ឱ្យរីករាយក្នុងរយៈពេលវែង។
១. ផ្តោតលើសាច់រឿងខ្លួនឯង ៖ ប៉ុន្មានដងហើយដែលអ្នកយកសាច់រឿងរបស់ខ្លួនឯង ទៅប្រៀបធៀបជាមួយនឹងមិត្តភ័ក្ដិ អ្នករួមអាជីព និងមនុស្សក្នុងបណ្តាញសង្គមដែលពុំធ្លាប់សូម្បីបានស្គាល់ និងនិយាយគ្នាម្តងសោះឡើយ? ភាពសោកសៅមួយ អាចនឹងកើតមាននៅពេលចាប់ផ្តើមប្រៀបធៀបខ្សែជីវិតខ្លួនឯងទៅក្នុងបណ្ដាញសង្គម ហើយការប្រៀបធៀបយូរទៅ នឹងជំរុញឱ្យខ្លួនឯងបាត់បង់ ការពេញចិត្តចំពោះអ្វីដែលមាននៅក្នុងបច្ចុប្បន្នភាព។ ដូច្នេះដំណើរសុភមង្គលជា កិច្ចការបុគ្គលដែលត្រូវទទួលខុសត្រូវដោយខ្លួនឯង។
២. កំណត់គោលដៅផ្តល់នូវភាពរីករាយ ៖ ការសិក្សាក៏បានឱ្យដឹងដែរថា ការកំណត់គោលដៅជាក់លាក់ជាហេតុនាំឱ្យសុខភាពផ្លូវចិត្ត មានភាពរីកចម្រើន។ ការចាប់ផ្តើមពីអ្វីដែលខ្លួនពិតជាចង់បាន ការគូសវិភាគអំពីលទ្ធផលវិជ្ជមាន កំណត់សម្គាល់អំពីបញ្ហាលំបាកៗ និងធ្វើផែនការលម្អិតក្នុងការដោះស្រាយបញ្ហាទាំងនោះ។ ការកំណត់គោលដៅផ្ទាល់ខ្លួន ដែលអាចឆ្លុះបញ្ចាំងអំពីគុណតម្លៃនៃខ្លួនឯង និងអបអរសាទររាល់សមិទ្ធផលដែលទទួលបាន ទោះបីជា វានៅក្នុងកម្រិតមួយដែលតូចតាចក្ដី។
៣. វិនិយោគលើបទពិសោធន៍ជំនួសឱ្យសម្ភារៈ ៖ គួរកាត់បន្ថយលើការចំណាយចំពោះសម្ភារៈដែលមិនចាំបាច់ខ្លាំង ជំនួសមកវិញគួរវិនិយោគលើបទពិសោធន៍ឱ្យបានច្រើន។ ការសិក្សាបានបង្ហាញថា រវាងសម្ភារៈ និងបទពិសោធន៍ គឺបទពិសោធន៍ បានជំរុញនូវភាពរីករាយទៅកាន់មនុស្សក្នុងរយៈពេលវែង។ ការទៅក្រៅជាមួយមិត្ត ធ្វើដំណើរកម្សាន្តនៅចុងសប្តាហ៍ និងសកម្មភាពដែលបង្កការចងចាំដទៃទៀតជំនួសឱ្យការទិញសម្ភារៈថ្មីៗបន្ថែម។
៤. រឭកសេចក្ដីដឹងគុណ ៖ ការដឹងគុណ គឺជាឥទ្ធិពលមួយ ដែលជួយឱ្យស្មារតីមានភាពពំនឹង និងរីករាយក្នុងរយៈពេលយូរ មិនតែប៉ុណ្ណោះការមានទម្លាប់ដឹងគុណជាប្រចាំ អាចធ្វើឱ្យសុខុមាលភាពប្រសើរឡើងក្នុងរយៈពេលពីរ ទៅបីសប្តាហ៍។ គួរចំណាយពេលខ្លះដើម្បីកត់សម្គាល់ថា តើមានរឿងល្អៗអ្វីខ្លះ ដែលកើតមានក្នុងដំណើរជីវិត? តាមរយៈការអនុវត្តន៍បែបនេះបានជួយឱ្យអ្នកមានការពេញចិត្តចំពោះការប្រើប្រាស់ជីវិតប្រចាំថ្ងៃច្រើនជាងមុន។
៥. គិតគូរកែលម្អទម្លាប់មិនល្អ ៖ មជ្ឈដ្ឋានជុំវិញខ្លួន បានជះឥទ្ធិពលមកកាន់ខ្លួនឯងដូចគ្នាដែរ ដូច្នេះត្រូវនៅក្បែរបរិយាកាសមួយដែលផ្ដល់ការគាំទ្រ ការជំរុញទឹកចិត្ត និងការថែរក្សាសុខភាពផ្លូវចិត្ត និងជាចំណែកមួយជួយជំរុញដល់ការបង្កើតទម្លាប់វិជ្ជមាន៕
