ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងសម័យកាលដែលការប្រស្រ័យទាក់ទងភាគច្រើនបានផ្លាស់ប្តូរទៅលើអេក្រង់ទូរស័ព្ទ និងកុំព្យូទ័រ ការផ្ញើសារ ការប្រើប្រាស់អ៊ីមែល ឬការប្រជុំតាមអនឡាញ មិនមែនគ្រាន់តែជាការផ្លាស់ប្តូរព័ត៌មានប៉ុណ្ណោះទេ ប៉ុន្តែវាជាការឆ្លុះបញ្ចាំងពីបុគ្គលិកលក្ខណៈ ភាពចាស់ទុំ និងកម្រិតនៃការគោរពដែលអ្នកត្រូវមានចំពោះអ្នកដទៃ។
តាមរយៈសៀវភៅ ”Digital Body Language” របស់លោកស្រី Erica Dhawan ខាងក្រោមនេះ គឺជា “ភាសាកាយវិការឌីជីថល” ទាំង ៦ ដែលយុវជនគ្រប់រូបគួរយល់ដឹង និងអនុវត្ត ដើម្បីកសាងទំនាក់ទំនងអនឡាញប្រកបដោយភាពចាស់ទុំ ៖
១. ការសរសេរសារច្បាស់លាស់ គឺជាការគោរព
សមត្ថភាពក្នុងការសរសេរសារបានត្រឹមត្រូវ និងច្បាស់លាស់ គឺជាការគោរពដំបូងគេទៅកាន់អ្នកទទួល។ ការផ្ញើសារដាច់ៗពីគ្នា (ផ្ញើមួយម៉ាត់ៗច្រើនសារ) ឬការប្រើប្រាស់ពាក្យកាត់ច្រើនជ្រុល អាចធ្វើឱ្យអ្នកអានមានអារម្មណ៍ធុញថប់ ឬពិបាកយល់ ជាពិសេសក្នុងការទំនាក់ទំនងជាមួយសាស្ត្រាចារ្យ រៀមច្បង ឬដៃគូការងារ។ ចាប់ផ្តើមទម្លាប់សរសេរសារដែលមានអត្ថន័យពេញលេញ និងមានរចនាសម្ព័ន្ធត្រឹមត្រូវ។
២. ចំណាយពេល ៥ វិនាទី អានឡើងវិញមុនចុច ”Send”
ពាក្យសម្តីដែលសរសេរលើអេក្រង់ គ្មានសំឡេង ឬកាយវិការអមឡើយ ដែលងាយនឹងធ្វើឱ្យមានការយល់ច្រឡំលើអត្ថន័យ និងអាកប្បកិរិយា។ ការចំណាយពេលត្រឹមតែ ៥ វិនាទី ដើម្បីពិនិត្យមើលកំហុសអក្ខរាវិរុទ្ធ និងសម្លេងនៃការនិយាយ (Tone) មុនពេលបញ្ជូន នឹងជួយអ្នកជៀសវាងនូវកំហុសអចេតនា។
៣. ឆ្លើយតបឱ្យបានទាន់ពេលវេលា
ក្នុងការធ្វើការងារក្រុម ឬកិច្ចការសាលា ការស្ងាត់ស្ងៀមធ្វើឱ្យដៃគូម្ខាងទៀតមានអារម្មណ៍មិនប្រាកដប្រជា។ ប្រសិនបើអ្នកកំពុងរវល់ និងមិនទាន់អាចពិនិត្យខ្លឹមសារបានស៊ីជម្រៅ យ៉ាងហោចណាស់គួរបញ្ជូនសារឆ្លើយតបខ្លីមួយដូចជា «ខ្ញុំបានទទួលសារហើយ ចាំល្ងាចនេះខ្ញុំពិនិត្យជូន»។ ការឆ្លើយតបទទួលស្គាល់សារបែបនេះ បង្ហាញពីការទទួលខុសត្រូវ និងការយកចិត្តទុកដាក់ខ្ពស់។
៤. គោរពពេលវេលាឯកជនរបស់អ្នកដទៃ
ព្រំដែនពេលវេលាសំខាន់ណាស់ក្នុងយុគសម័យឌីជីថល។ ជៀសវាងការផ្ញើសារសួរនាំកិច្ចការងារ ឬលំហាត់នៅពេលយប់ជ្រៅ ឬក្នុងថ្ងៃឈប់សម្រាក ដោយរំពឹងចង់បានការឆ្លើយតបភ្លាមៗ។ ប្រសិនបើចាំបាច់ត្រូវផ្ញើក្នុងម៉ោងទាំងនោះ គួរបញ្ជាក់ថា «មិនបាច់តបភ្លាមៗក៏បានដែរ» ឬប្រើមុខងារផ្ញើសារតាមពេលកំណត់ (Schedule Send) ដើម្បីបង្ហាញពីការយល់យោគដល់ពេលវេលាសម្រាករបស់គេ។
៥. បើកកាមេរ៉ា និងផ្តោតអារម្មណ៍ពេលប្រជុំអនឡាញ
នៅក្នុងជំនួបតាម Zoom ឬ Google Meet ការបើកកាមេរ៉ា និងការមើលទៅអេក្រង់ ស្មើនឹងការប្រសព្វភ្នែក (Eye Contact) ក្នុងពិភពពិត។ វាជាការផ្តល់កិត្តិយស និងការលើកទឹកចិត្តដ៏ធំធេងដល់អ្នកសម្របសម្រួល ឬអ្នកធ្វើបទបង្ហាញ។ ការបើកកាមេរ៉ា និងចៀសវាងការធ្វើកិច្ចការផ្សេងទន្ទឹមគ្នា នឹងជួយឱ្យអ្នកទទួលបានព័ត៌មានពេញលេញ និងបង្ហាញពីភាពចាស់ទុំរបស់អ្នក។
៦. ប្រើប្រាស់អ៊ីមែល (Email) សម្រាប់កិច្ចការផ្លូវការ
ប្រព័ន្ធឆាត (Chat) ត្រូវបានបង្កើតឡើងសម្រាប់ទំនាក់ទំនងរហ័ស ប៉ុន្តែសម្រាប់កិច្ចការសាលា ការដាក់ពាក្យ ឬការទំនាក់ទំនងផ្លូវការ អ៊ីមែលនៅតែជាស្តង់ដារចម្បង។ ការផ្ញើអ៊ីមែលដែលត្រឹមត្រូវ ត្រូវតែមានចំណងជើង (Subject) ច្បាស់លាស់ ពាក្យរាក់ទាក់ (Salutation) ខ្លឹមសារសង្ខេប និងពាក្យជូនពរនៅខាងចុង។ ការផ្ញើកិច្ចការសំខាន់ៗតាមឆាតផ្ទាល់ខ្លួន ដោយគ្មានទម្រង់ត្រឹមត្រូវ អាចធ្វើឱ្យអ្នកបាត់បង់ភាពជាអាជីព៕
