ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា បានបញ្ជាក់ថា ការផ្លាស់ប្តូរមណ្ឌលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២៦ ពីវិទ្យាល័យហ៊ុនសែនប៊ុនរ៉ានីផ្សារដើមថ្កូវ ទៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) គឺដើម្បីឱ្យគណៈមេប្រយោគ និងបេក្ខជនអាចបំពេញភារកិច្ច និងចូលរួមការប្រឡងដោយមានផាសុកភាពជាងមុន។
ការប្រកាសផ្លាស់ប្តូរមណ្ឌលប្រឡងនេះ បានធ្វើឱ្យមានការចាប់អារម្មណ៍ និងចោទសំណួរពីសំណាក់អ្នកប្រើប្រាស់បណ្តាញសង្គមជាច្រើន ដោយសារវិទ្យាល័យហ៊ុនសែនប៊ុនរ៉ានីផ្សារដើមថ្កូវ ធ្លាប់ត្រូវបានប្រើជាមណ្ឌលប្រឡងជារៀងរាល់ឆ្នាំ ហើយការផ្លាស់ប្តូរត្រូវបានប្រកាសមុនថ្ងៃប្រឡងប្រមាណពីរសប្តាហ៍ប៉ុណ្ណោះ។
ឆ្លើយតបនឹងការងឿងឆ្ងល់នេះ អ្នកនាំពាក្យក្រសួងអប់រំ យុវជន និងកីឡា លោកជំទាវ ឃួន វិច្ឆិកា បានមានប្រសាសន៍ប្រាប់ AMS ថា ការផ្លាស់ប្តូរមណ្ឌលប្រឡងធ្វើឡើងក្នុងគោលបំណងបង្កើនផាសុកភាពដល់គណៈមេប្រយោគ និងបេក្ខជនក្នុងការបំពេញការងារ និងចូលរួមការប្រឡង។
ក្រសួងអប់រំ យុវជន និងកីឡា បានប្រកាសកាលពីថ្ងៃទី២១ ខែកក្កដា អំពីការផ្លាស់ប្តូរមណ្ឌលប្រឡងសម្រាប់សម័យប្រឡងថ្ងៃទី១០ ខែសីហា ឆ្នាំ២០២៦ ដោយមណ្ឌលប្រឡងវិទ្យាល័យហ៊ុនសែនប៊ុនរ៉ានីផ្សារដើមថ្កូវ ដែលមានថ្នាក់វិទ្យាសាស្ត្រចំនួន ៣០ បន្ទប់ និងមានបេក្ខជនអប់រំពិសេសចំនួន ២២នាក់ (ស្រី ៩នាក់) ត្រូវផ្លាស់ប្តូរទៅប្រឡងនៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ដែលស្ថិតក្នុងខណ្ឌចំការមន រាជធានីភ្នំពេញដូចគ្នា។
គួរបញ្ជាក់ថា សម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី១០ ខែសីហា ឆ្នាំ២០២៦ នៅទូទាំងប្រទេស មានមណ្ឌលប្រឡងថ្នាក់វិទ្យាសាស្ត្រចំនួន ៦៨ មណ្ឌល ស្មើនឹង ១,៥៣៣ បន្ទប់ និងមណ្ឌលប្រឡងថ្នាក់វិទ្យាសាស្ត្រសង្គមចំនួន ១៧៦ មណ្ឌល ស្មើនឹង ៤,៦៧៤ បន្ទប់។ ដូច្នេះសរុបមានមណ្ឌលប្រឡងចំនួន ២៤៤ មណ្ឌល និងបន្ទប់ប្រឡងសរុប ៦,២០៧ បន្ទប់ ដែលរៀបចំនៅតាមរាជធានី និងខេត្តទូទាំងប្រទេស៕
