ការស្ដាប់ដោយសកម្ម និងយកចិត្តទុកដាក់ គឺជាធាតុផ្សំដ៏សំខាន់ ក្នុងការប្រាស្រ័យទាក់ទងប្រកបដោយប្រសិទ្ធភាព។ ជាមួយគ្នានេះ បញ្ញាផ្នែកអារម្មណ៍ (EI) ជាគន្លឹះដ៏មានសារៈសំខាន់ ដើម្បីពង្រឹងជំនាញទាំងនេះ។ បញ្ញាផ្នែកអារម្មណ៍ សំដៅលើសមត្ថភាពក្នុងការទទួលស្គាល់ យល់ និងគ្រប់គ្រងអារម្មណ៍ខ្លួនឯង និងអារម្មណ៍អ្នកដទៃ។ តាមរយៈការប្រើប្រាស់ EI អ្នកអាចបង្កើនសមត្ថភាពស្ដាប់របស់អ្នក ដោយធានាថា អ្នកមិនគ្រាន់តែឮគេនិយាយប៉ុណ្ណោះទេ អ្នកក៏យល់ច្បាស់នូវអ្វីដែលនិយាយដែរ។ មានគន្លឹះចំនួន ៥ ដែលអ្នកអាចពង្រឹងសមត្ថភាពនេះបាន។

១. យល់ច្បាស់អំពី បញ្ញាផ្នែកអារម្មណ៍ ៖ បញ្ញាផ្នែកអារម្មណ៍ត្រូវបានបែងចែកទៅជាជំនាញស្នូលចំនួន ៤ សំខាន់ ក្នុងនោះមានដូចជា ការស្គាល់ខ្លួនឯង (Self-awareness) ការគ្រប់គ្រងខ្លួនឯង (Self-management) ការយល់ដឹងអំពីសង្គម (Social awareness) និងការគ្រប់គ្រងទំនាក់ទំនង (relationship management)។ តាមរយៈការពង្រឹងជំនាញស្នូលទាំង ៤នេះ សមត្ថភាពស្ដាប់របស់អ្នក នឹងត្រូវបានពង្រឹង។

២. យល់អំពី ការស្តាប់សកម្ម (Active listening) ៖ ការស្ដាប់សកម្មភាព គឺជាបច្ចេកទេស ដែលតម្រូវឱ្យអ្នកស្ដាប់ដៃគូសន្ទាន ដោយផ្ដោតអារម្មណ៍ ដើម្បីយល់អំពីអ្វីដែលគេនិយាយ អាចឆ្លើយតប និងចងចាំនូវអ្វីដែលគេនិយាយ។ សកម្មភាពនេះ គឺជាផ្នែកមួយដ៏សំខាន់នៅក្នុងការសន្ទនា ដែលមានអត្ថន័យ។ អំឡុងពេលសន្ទនា អ្នកអាចប្រើភាសាកាយវិការ (body language) និងសំឡេង ដើម្បីបង្ហាញថា អ្នកកំពុងស្ដាប់គេដោយយកចិត្តទុកដាក់។ ការស្ដាប់សកម្មភាព នឹងជួយអ្នកឱ្យយល់កាន់តែច្បាស់អំពីអារម្មណ៍ ទស្សនៈ និងសារ ដែលដៃគូសន្ទនាចង់ចែករំលែក។

៣. យល់អំពី ការស្តាប់ដោយយកចិត្តទុកដាក់ (Attentive listening) ៖ ការស្ដាប់ដោយយកចិត្តទុកដាក់ គឺលើសពីការស្ដាប់ពាក្យ និងឃ្លា ដែលដៃគូសន្ទនានិយាយ។ ប៉ុន្តែយើងជាអ្នកស្ដាប់ក៏ចូលរួមយ៉ាងសកម្មក្នុងសន្ទនានោះដែរ។ ដើម្បីពង្រឹងការស្ដាប់ដោយយកចិត្តទុកដាក់ អ្នកត្រូវគ្រប់គ្រងការប្រតិកម្មរបស់អ្នក ហើយមិនបង្ហាញថា អ្នកកំពុងតែវិនិច្ឆ័យ នូវអ្វីដែលគេកំពុងនិយាយ បន្ទាប់មកឆ្លើយតបនូវអ្វីដែលអ្នកបានឮ ជាមួយនឹងកាយវិការសមរម្យ។ សកម្មភាពនេះ នឹងជួយឱ្យអ្នកយល់បានស៊ីជម្រៅនូវអ្វី ដែលអ្នកបានឮ ព្រមទាំងអាចបង្កើនទំនុកចិត្ត និងពង្រឹងទំនាក់ទំនងជាមួយដៃគូសន្ទនារបស់អ្នក។

៤. ការប្រើសញ្ញាមិនមែនជាពាក្យសម្តី (Non-Verbal Cues) ៖ អ្នកស្ដាប់ដ៏ពូកែម្នាក់ យល់ច្បាស់អំពីរបៀបប្រើភាសាសញ្ញាមិនមែនជាពាក្យសម្តី នៅអំឡុងពេលសន្ទនា។ សញ្ញាទាំងនោះ មានដូចជា ភាសាកាយវិការ ទឹកមុខ និងការលើកដាក់សំឡេងឱ្យស្របតាមអ្វីដែលគេកំពុងនិយាយ។ ការប្រើសញ្ញាទាំងនេះ នឹងធ្វើឱ្យដៃគូសន្ទនា មានអារម្មណ៍ថា អ្នកកំពុងយល់ពីគេ ហើយអ្នកកំពុងតែបង្កើតបរិយាកាស ដែលធ្វើឱ្យគេទទួលបាននូវអារម្មណ៍ថា គេមិនមែនកំពុងតែនិយាយតែម្នាក់ឯង។

៥. ការឆ្លើយតបនូវអ្វីដែលគេបាននិយាយ ៖ ការឆ្លើយតបនូវអ្វីដែលគេបាននិយាយពិតជាមានភាពសំខាន់ ព្រោះវាបានបង្ហាញថា អ្នកកំពុងស្ដាប់គេយ៉ាងសកម្ម និងយកចិត្តទុកដាក់។ ក្រោយពីគេនិយាយចប់ អ្នកអាចសង្ខេបនូវអ្វី ដែលគេបាននិយាយឡើងវិញ និងសួរសំណួរ ដើម្បីបញ្ជាក់នូវអ្វី ដែលគេបាននិយាយ។​ ទន្ទឹមនឹងនេះ អ្នកក៏អាច ផ្ដល់ជាមតិកែលម្អ ដែលមានលក្ខណៈស្ថាបនា និងលើកទឹកចិត្តបន្ថែម។ ការឆ្លើយតបចំពោះអ្វីដែលអ្នកបានស្ដាប់ គឺជាការបង្ហាញថា អ្នកបានបើកចិត្តស្ដាប់គេដោយស្មោះ ហើយនេះគឺជា សញ្ញាសម្គាល់នៃការទំនាក់ទំនងប្រកបដោយប្រសិទ្ធភាព៕