ជាការកត់សម្គាល់បច្ចុប្បន្ននេះ ក្រុមហ៊ុន​ដែល​ធ្វើ​ការវិនិយោគ​លើវិស័យ​យានយន្ត​នៅ​កម្ពុជា កំពុងតែមានតម្រូវការ​អ្នក​បច្ចេកទេស​ដែលជា​ស្រ្តីកាន់តែច្រើន ខណៈ​ដែលជំនាញមួយ​នេះស្រ្តីមិនសូវចុះឈ្មោះចូលរៀននៅឡើយ ហេតុនេះអ្នកជំនាញបច្ចេកទេសយានយន្ត នៃវិទ្យាស្ថានជាតិពហុបច្ចេកទេសកម្ពុជា (NPIC) បានធ្វើការ​អំពាវនាវឱ្យ​យុវនារីចូលរៀនវគ្គបច្ចេកទេសមេកានិកយានយន្តឱ្យ​បានច្រើនថែមទៀត ខណៈជំនាញមួយ​នេះ ក៏​កំពុងតែមានតម្រូវការទីផ្សារការងារខ្ពស់នៅកម្ពុជា ក៏ដូចជាសកលលោក។

លោក មិន ឆេងហ៊ាន់ នាយកមហាវិទ្យាល័យជំនាញបច្ចេសទេសមេកានិកយានយន្ត នៃវិទ្យាស្ថាន NPIC បានមានប្រសាសន៍ថា បច្ចុប្បន្ន​នៅ​វិទ្យាស្ថានរបស់លោក​សិស្សជានារីដែល​បាន​មក​ចុះឈ្មោះ​ចូលរៀន​ជំនាញ​មេកានិកយានយន្ត មានចំនួនតិចជាងសិស្សជាបុរស។ លោកថា ប្រសិនបើសិស្សនារីចូលរៀន នោះគឺជាផលល្អ ព្រោះគាត់អាចមានលទ្ធភាពក្នុងការរកការងារបានឆាប់រហ័ស ខណៈតម្រូវការទីផ្សារលើជំនាញនេះបច្ចុប្បន្ន​​កំពុង​មាន​ខ្ពស់។

បើតាម​លោក ឆេងហ៊ាន់ សិស្ស​នារី​ដែល​រៀនជំនាញ​មេកានិកយានយន្ត​នៅពេលរៀនចប់ ពួក​គាត់​អាចក្លាយជា Service Advisor ព្រោះកន្លងមកលោក​សង្កេតឃើញថា នារី គឺត្រូវ​ក្រុមហ៊ុនដែល​វិនិយោគ​លើវិស័យ​យានយន្ត​ភាគមាន​តម្រូវការច្រើន ដោយសារស្រ្តីអាចកាន់ Spare Part Stock ផ្សេងៗបាន។

លើសពីនេះ លោកនាយកបានលើកទឹកចិត្តដល់សិស្សជានារីគួរតែហ៊ានប្រកួតប្រជែងសមត្ថភាព និងចូលប្រឡូកក្នុងវិស័យមេកានិកយានយន្តជាមួយនឹងសិស្សជាបុរស ព្រោះសមត្ថភាពបុរស និងនារីមិនមានភាពខុសគ្នាច្រើននោះទេ។ នារីបច្ចុប្បន្ននេះមានសមត្ថភាពគ្រប់គ្រាន់ទាំងចំណេះដឹង និងកម្លាំងកាយ ដើម្បីចូលប្រឡូកក្នុងវិស័យការងារផ្នែកយានយន្ត។

ទូទៅសិស្សនិស្សិតដែលរៀនជំនាញមេកានិករថយន្ត ត្រូវបានបង្រៀនឱ្យយល់អំពីមូលដ្ឋានដូចជា អគ្គិសនី គ្រឿងបន្លាស់រថយន្តគ្រប់ប្រភេទ គ្រឿងម៉ាស៊ីនខាងក្នុង និងប្រព័ន្ធគ្រប់គ្រងអេឡិចត្រូនិក។ បន្ទាប់ពីរៀនចប់រយៈពេល​៤ឆ្នាំ សិស្សនិស្សិត​អាចចូលរួមក្នុងឧស្សាហកម្មដែលទាក់ទងនឹងសង្វាក់ផលិតកម្មដូចជា ការផលិតយានយន្តគ្រប់ប្រភេទ អាចចូលរួមក្នុងការងារជួសជុលយានយន្ត និងអាចចាប់ផ្តើមអាជីវកម្មផ្ទាល់ខ្លួន ឬទទួលយកការងារផ្សេងទៀតនៅក្នុងវិស័យមេកានិចយានយន្ត។

យោង​តាម​របាយការណ៍​របស់ក្រសួងការងារ និង​បណ្តុះបណ្តាលវិជ្ជាជីវៈ ក្នុងមួយ​ឆ្នាំគ្រឹះស្ថាន​បណ្តុះបណ្តាលវិជ្ជាជីវៈ​ស្ថិត​ក្រោម​ក្រសួងការងារ បណ្តុះបណ្តាលអ្នកជំនាញមេកានិចយានយន្តប្រមាណ​ជិត​៦ពាន់នាក់ ក្នុងនោះស្រ្តីមានចំនួនប្រមាណ៧ភាគរយ​ប៉ុណ្ណោះ។ ជាក់ស្តែង​នៅ​ក្នុងឆ្នាំ​២០២៣ សិស្ស​និស្សិត​ជំនាញ​មេកានិចយានយន្ត​ដែលត្រូវ​បណ្តុះបណ្តាល​មាន​សរុបចំនួន ៥៧៧៤នាក់ ក្នុងនោះស្រ្តីមានចំនួន ៤០៩នាក់៕