ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសរសេរកំណត់ហេតុ គឺជាទម្លាប់សាមញ្ញ ប៉ុន្តែមានឥទ្ធិពលយ៉ាងខ្លាំងដល់សុខភាពផ្លូវចិត្ត និងជីវិតប្រចាំថ្ងៃ។ តាមការសិក្សា ការដាក់ពេលវេលាដើម្បីសរសេរកំណត់ហេតុ អាចផ្តល់អត្ថប្រយោជន៍ជាច្រើនដូចជា កាត់បន្ថយការចូលប្រើប្រាស់បណ្តាញសង្គម ដែលធ្វើឱ្យយើងមានអារម្មណ៍ស្មុគ្រស្មាញ, ពង្រឹងជំនាញសរសេរ និងការរៀនពីអារម្មណ៍ និងបទពិសោធន៍ផ្ទាល់ខ្លួន។
តាមរយៈ Apartment Therapy ក៏បានបង្ហាញឱ្យដឹងអំពីលទ្ធផលវិជ្ជមានចំនួន៣ ក្រោយសាកល្បងមួយសប្តាហ៍ នៃការសរសេរកំណត់ហេតុជាប្រចាំ។
១. កាត់បន្ថយការប្រើប្រាស់បណ្តាញសង្គម ៖ តាមរយៈការវិនិយោគពេលវេលាទៅក្នុងការសរសេរកំណត់ហេតុ ឬអំពីព្រឹត្តិការណ៍ដែលបានជួបប្រទះប្រចាំថ្ងៃ គឺជាសកម្មភាពមួយជួយឱ្យទទួលបាននូវការផ្តោតទៅលើការប្រើប្រាស់ជីវិតប្រចាំថ្ងៃ ព្រោះការជក់ចិត្តជាមួយនឹងការតាមដានសាច់រឿងរបស់ខ្លួនឯង បានធ្វើឱ្យបង្អាក់ការចុចចូលបណ្តាញសង្គមដើម្បីតាមមើលខ្សែជីវិតក្នុងបណ្តាញសង្គម ឬរឿងរ៉ាវមិនចាំបាច់របស់អ្នកដទៃ មិនថា ក្នុងហ្វេសប៊ុក អ៊ីនស្រ្តាក្រាម ឬបណ្តាញសង្គមដទៃៗទៀត។
២. ភាពស្និទ្ធស្នាលជាមួយរបៀបសរសេរ ៖ ការសរសេរកំណត់ហេតុ កាន់តែជំរុញឱ្យដឹងថា អ្វីទៅជាការចង់បានរបស់ខ្លួន ការបង្ហាញអារ្មណ៍ រួមទាំងរកឃើញនូវវិធីសាស្រ្តសរសេរ ដែលមានប្រសិទ្ធភាពសម្រាប់ខ្លួនឯងបន្ថែម។ ខណៈការសរសេរកំណត់ហេតុ បានជំរុញសុភមង្គល និងកម្លាំងចិត្តឱ្យកាន់តែចង់សរសេរបន្ថែមពីមួយថ្ងៃ ទៅមួយថ្ងៃ រួមទាំងបានបញ្ចប់ថ្ងៃនីមួយៗ ដោយមានភាពសកម្មទៅលើបញ្ញាស្មារតីចំពោះខ្លួនឯង។
៣. ការរៀនសូត្រ ៖ ការចាប់ផ្តើមសរសេរដំបូងៗ វាពុំងាយស្រួលប៉ុន្មានទេ ទោះបីជាមានការតាំងចិត្តមែន ប៉ុន្តែពុំទាន់មានទម្លាប់នោះទេ! ប៉ុន្តែបើអនុវត្តន៍ក្នុងរយៈពេលយូរៗទៅ នោះនឹងឃើញពីភាពងាយស្រួល ក៏ដូចជាភាពបត់បែន យ៉ាងលឿនរហ័សចំពោះការទម្លាប់សរសេរកំណត់ហេតុប្រចាំថ្ងៃ។ ជាងនេះទៅទៀត កាលដែលមានទម្លាប់កាន់ប៊ិក ឬក្ដារចុចកុំព្យូទ័រ ដើម្បីបង្ហាញចុះនូវការគិត ភាពមន្ទិល ក៏ដូចជាហេតុការណ៍ចម្រុះផ្សេងគ្នា សុទ្ធសឹងតែជាសកម្មភាពដែលជួយឱ្យចងចាំពាក្យ ចងចាំប្រយោគ និងការអភិវឌ្ឍន៍ពាក្យពេចន៍កាន់តែងាយស្រួល និងស្គាល់ប្រយោគថ្មីៗច្រើនជាងមុន។ បន្ថែមពីនោះ ក៏ជាឱកាសឆ្លុះបញ្ចំងរាល់រឿងរ៉ាវផ្ទាល់ខ្លួនដែលបានកើតឡើងក្នុងរយៈពេលពេញមួយថ្ងៃ ការបូកសរុបអំពីសកម្មភាពដែលធ្វើរួច និងការតាមដានផលិតភាពជាដើម៕
