វិទ្យាស្ថាន​ពហុបច្ចេកទេស​ភូមិ​ភាគ​តេជោសែនស្វាយរៀង បានប្រកាស​ជ្រើសរើស​និស្សិត​ឱ្យ​ចូលរៀន​ជំនាញ​បច្ចេកទេស និង​វិជ្ជាជីវៈ លើកទី២ សម្រាប់​ឆ្នាំសិក្សា​២០២៤-២០២៥ ដោយផ្តល់អាហារូបករណ៍១០០% សរុបចំនួន ២៧០កន្លែង។

កម្រិតជំនាញ​ដែលអាហារូបករណ៍ផ្តល់ជូន​រួមមាន ៖ កម្រិតសញ្ញាបត្រ​បច្ចេកទេស និង​វិជ្ជាជីវៈ២ សិក្សា​រយៈពេល​១ឆ្នាំ មាន ជំនាញ​ដំឡើង​បណ្តាញ​អគ្គិសនី​ក្នុងអគារ ចំនួន២៥នាក់, សេវាកម្មបរិក្ខារត្រជាក់​ក្នុងគេហដ្ឋាន ចំនួន ២៥នាក់ និង ការថែទាំ និងជួសជុលរថយន្ត ចំនួន ២៥នាក់។ លក្ខខណ្ឌសិក្សា ៖ សិស្ស​ប្រឡង​ជាប់​ជា​ស្ថាពរ​សញ្ញាបត្រ​បច្ចេកទេស និង​វិជ្ជាជីវៈ១។

កម្រិតសញ្ញាបត្រ​បច្ចេកទេស និង​វិជ្ជាជីវៈ៣ រួមមាន ជំនាញ​ដំឡើង​បណ្តាញ​អគ្គិសនី​ក្នុងអគារ ២៥នាក់, សេវាកម្មបរិក្ខារត្រជាក់​ក្នុងគេហដ្ឋាន ចំនួន២៥នាក់ និង​ការថែទាំ និង​ជួសជុលរថយន្ត ចំនួន២៥នាក់។ លក្ខខណ្ឌសិក្សា ត្រូវជាសិស្ស​ប្រឡង​ជាប់ជា​ស្ថាពរសញ្ញាបត្រ​បច្ចេកទេស និង​វិជ្ជាជីវៈ២។

កម្រិតសញ្ញាបត្រជាន់ខ្ពស់​បច្ចេកទេស ដែលត្រូវសិក្សា​រយៈពេល២ឆ្នាំ រួមមានជំនាញ វិស្វកម្មមេកាត្រូនិក ចំនួន ៣០នាក់, ជំនាញវិស្វកម្ម​មេកានិកឧស្សាហកម្ម ចំនួន ៦០នាក់ និងវិស្វកម្ម​អេឡិចត្រូនិក ចំនួន ៣០នាក់។ លក្ខខណ្ឌសិក្សា ជាសិស្ស​ប្រឡងជាប់ ឬធ្លាក់សញ្ញាបត្រ​មធ្យមសិក្សា​ទុតិយភូមិ (បាក់ឌុប) ឬសញ្ញាបត្រ​សមមូល ឬសញ្ញាបត្រ​បច្ចេកទេស និង​វិជ្ជាជីវៈ៣។

ការចែក និង​ទទួលពាក្យ គឺចាប់ពីថ្ងៃផ្សាយដំណឹងនេះ រហូត​ដល់ថ្ងៃទី១២ ខែកុម្ភៈ ឆ្នាំ២០២៥។

សម្រាប់ព័ត៌មានបន្ថែម សូមទំនាក់ទំនងទៅកាន់វិទ្យាស្ថាន​ដែលមានអាសយដ្ឋានស្ថិតនៅ ភូមិមេភ្លើង សង្កាត់ស្វាយរៀង ក្រុងស្វាយរៀង ឬទំនាក់ទំនងទៅកាន់ទូរស័ព្ទលេខ 077 54 77 78៕