នៅក្នុងពិព័រណ៍ការងារ និងនិងមគ្គទេសក៍អាជីព សម្រាប់ឆ្នាំ២០២៤នេះ យុវជន សិស្សានុសិស្ស ជាច្រើននាក់បានមកចូលរួមស្វែងយល់អំពីព័ត៌មានមួយចំនួនទាក់ទងនឹងឱកាសការងារគ្រប់ប្រភេទជាង ៥៤០០កន្លែង ។ ក្នុងនោះ យុវជនបានលើកឡើងថា ពិព័រណ៍ការងារ និងមគ្គទេសក៍អាជីពនេះ បានផ្ដល់ភាពងាយស្រួលដល់ពួកគេ​ក្នុង​ស្វែងរកឱកាសការងារស្របតាមតម្រូវការទីផ្សារ។

យុវជន តាំង វឌ្ឍនា ជានិស្សិតឆ្នាំទី២ សិក្សាជំនាញអេឡិចត្រូនិច នៃវិទ្យាស្ថានជាតិពហុបច្ចេកទេសកម្ពុជា លើកឡើងថា ពិព័រណ៍ការងារ និងនិងមគ្គទេសក៍អាជីពនេះ បានផ្ដល់ភាពងាយស្រួលដល់និសិ្សតដែលមានបំណងចង់ស្វែងរកការងារ និងមានលក្ខខណៈទូលំទូលាយដល់សិស្ស-និស្សិតដែលទើបបញ្ចប់ការសិក្សា ឬទើបតែចូលរៀន ពិតជាងាយស្រួលក្នុងការជ្រើសរើសជំនាញដែលចង់ធ្វើ។

និស្សិតឆ្នាំទី២ សិក្សាជំនាញអេឡិចត្រូនិច នៃវិទ្យាស្ថានជាតិពហុបច្ចេកទេសកម្ពុជា រូបនេះ បញ្ជាក់ថា រូបគេបានចូលរួមទស្សនាគ្រប់ស្តង់តាំងពិព័រណ៍ការងារ ហើយក៏បានចាប់អារម្មណ៍ដាក់ពាក្យការងារផ្នែកគ្រប់គ្រងប្រព័ន្ធម៉ាស៊ីន។

យុវជន តាំង វឌ្ឍនា ក៏បានលើកទឹកចិត្តសិស្ស-និស្សិតដែលកំពុងរកការងារធ្វើ អាចមកចូលរួមក្នុងកម្មវិធីនេះ ដើម្បីសិក្សាពីក្រុមហ៊ុនផ្សេងៗ និងស្វែងរកឱកាសការងារលើជំនាញដែលខ្លួនចង់បាន។

យុវតី សម្បត្តិ សុខបាន ជានិស្សិតឆ្នាំទី៣ សិក្សាជំនាញគ្រប់គ្រង នៃសាកលវិទ្យាល័យវេស្ទើន បាននិយាយថា រូបគេមកចូលរួមនៅក្នុងពិព័រណ៍ការងារ និងមគ្គទេសក៍អាជីពនេះ ក្នុងគោលបំណងស្វែងរកការងារធ្វើ ដើម្បីអាចទទួលបានបទពិសោធន៍ការងារ ព្រោះគិតថាខ្លួនជានិស្សិតដែលមិនធា្លប់មានបទពិសោធន៍ការងារ ដូច្នេះមកចូលរួមកម្មវិធីនេះ អាចមានឱកាសក្រុមហ៊ុនជ្រើសរើសទៅបម្រើការងារ។

និស្សិតឆ្នាំទី៣ សិក្សាជំនាញគ្រប់គ្រង នៃសាកលវិទ្យាល័យវេស្ទើន រូបនេះ ក៏លើកទឹកចិត្តយុវជនផ្សេងទៀតឱ្យមកចូលរួម ព្រោះឱកាសដ៏ល្អនេះមិនមានរាល់ថ្ងៃនោះទេ ចាំបាច់ត្រូវមកស្វែងយល់ និងចាប់យកឱកាសការងារដែលខ្លួនស្រឡាញ់ពេញចិត្ត។

យុវតី វ៉ាន សារុំ ជានិស្សិតឆ្នាំទី៣ សិក្សាជំនាញគណនេយ្យ នៃសាកលវិទ្យាល័យអាស៊ីអឺរ៉ុប បានបង្ហាញអារម្មណ៍សប្បាយចិត្ត ដែលបានមកចូលរួមពិព័រណ៍ការងារ និងនិងមគ្គទេសក៍អាជីព ដែលផ្ដល់ឱកាសឱ្យសិស្ស-និស្សិតដាក់ពាក្យស្វែងរកការងារជាច្រើនកន្លែងស្របតាមជំនាញ និងការពេញចិត្ត។ យុវតី វ៉ាន សារុំ បន្តថា រូបគេបានចូលរួមទស្សនាគ្រប់ស្តង់តាំងពិព័រណ៍ការងារ ហើយក៏បានចាប់អារម្មន៍ដាក់ពាក្យការងារផ្នែកគិតលុយផងដែរ។

និស្សិតឆ្នាំទី៣ សិក្សាជំនាញគណនេយ្យ នៃសាកលវិទ្យាល័យអាស៊ីអឺរ៉ុប រូបនេះ បន្ថែមថា ប្រសិនបើយុវជន សិស្ស-និស្សិតចង់មានបទពិសោធន៍ការងារពាក់ព័ន្ធនឹងជំនាញ អាចមកចូលរួមពិព័រណ៍ការងារ និងមគ្គទេសក៍អាជីពនៅអគារ KAMPUS ព្រោះមានឱកាសការងារជាច្រើនជំនាញដែលអាចឱ្យយើងដាក់ពាក្យបាន។

គួរជម្រាបជូនថា ពិព័រណ៍ការងារ និងមគ្គទេស៍អាជីពដ៏ធំ រៀបចំឡើងដោយទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយសហភាពសហព័ន្ធយុវជនកម្ពុជារាជធានីភ្នំពេញ ធ្វើឡើងរយៈពេល​២ថ្ងៃ គឺនៅថ្ងៃទី៩ និងថ្ងៃទី១០ ខែឧសភា ឆ្នាំ២០២៤ នៅអគារ KAMPUS។ ក្នុងនោះ ក្រុមហ៊ុនសហគ្រាសធំៗចំនួន ២៥ នឹងផ្តល់ឱកាសការងារជាង ៥ពាន់កន្លែង ដល់យុវជន សិស្ស/និស្សិត និងអ្នកស្វែងរកការងារ៕