ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មានប្រសាសន៍នៅក្នុងឱកាសចូលរួមពិព័រណ៍ការងារ និងមគ្គទេសក៍អាជីព នាអគារ KAMPUS កាលពីថ្ងៃទី៩ ឧសភា លោកជំទាវ តិមា វិច្ឆិកាល អនុប្រធានសហភាពសហព័ន្ធយុវជនកម្ពុជា រាជធានីភ្នំពេញ បានធ្វើការជំរុញដល់យុវជនដែលកំពុងត្រៀមខ្លួនចូលឧត្តមសិក្សា សូមពិចារណាចាប់យកជំនាញស្ទែម និងបច្ចេកវិទ្យា ដែលជាជំនាញមានឧត្តមភាពសម្រាប់សង្គម និងការអភិវឌ្ឍសេដ្ឋកិច្ច។
លោកជំទាវ តិមា វិច្ឆិកាល មានប្រសាសន៍ថា បច្ចុប្បន្ននេះ ពិភពលោកកំពុងតែវិវឌ្ឍទៅរកការរីកចម្រើនយ៉ាងឆាប់រហ័ស ក្នុងបច្ចេកវិទ្យា, បច្ចេកវិទ្យា AI ការស្រាវជ្រាវពី Robot ក៏ដូចជាបច្ចេកវិទ្យាទិន្នន័យ កំពុងតែអភិវឌ្ឍយ៉ាងឆាប់រហ័ស ។ បើងាកមកមើលប្រទេសកម្ពុជាវិញ ចាប់តាំងពីការរៀបចំគោលនយោបាយជាតិ រហូតដល់ការអនុវត្តនៅតាមក្រសួងស្ថាប័ន គឺកំពុងតែងាកទៅរកឌីជីថល ដោយរាជរដ្ឋាភិបាលមានផែនការក្នុងការអនុវត្តរាជរដ្ឋាភិបាលឌីជីថល ក៏ដូចជាសេដ្ឋកិច្ចបែបឌីជីថល ដូច្នេះលោកជំទាវស្នើដល់យុវជនយកចិត្តទុកដាក់ទៅលើជំនាញស្ទែម និងបច្ចេកវិទ្យា ដែលជាជំនាញស្នូលដ៏សំខាន់របស់បច្ចេកវិទ្យាឌីជីថល។
ពិភពលោកកំពុងតែវិវឌ្ឍទៅរកការរីកចម្រើនយ៉ាងឆាប់រហ័សក្នុងបច្ចេកវិទ្យា ដូច្នេះសូមយុវជនយកចិត្តទុកដាក់នៅក្នុងជំនាញ ឬក៏ការស្រាវជ្រាវដែលគេលើកពី AI ពី Robot ពី Data ព្រោះទាំងអស់នេះ គឺជាស្នូលមួយដ៏សំខាន់…
លោកជំទាវ តិមា វិច្ឆិកាល អនុប្រធានសហភាពសហព័ន្ធយុវជនកម្ពុជា រាជធានីភ្នំពេញ
អនុប្រធានសហភាពសហព័ន្ធយុវជនកម្ពុជា រាជធានីភ្នំពេញ បន្ថែមថា បច្ចេកវិទ្យា និងពិភពលោក គឺវិវឌ្ឍ ជារៀងរាលហូត ហើយប្រែប្រួលលឿន ដូច្នេះ នៅពេលដែលយើងស្វែងរកអាជីពការងារ យើងគួរមានទម្លាប់មួយក្នុងការស្វែងយល់ និងសិក្សាជំនាញថ្មីៗប្រសិនបើជាអាច ។ លោកជំទាវ តិមា វិច្ឆិកាល បន្តថា សម្រាប់ប្អូនៗដែលត្រៀមខ្លួនចូលឧត្តមសិក្សា គឺគួរពិចារណាចាប់យកជំនាញស្ទែម ដែលហៅថា វិទ្យាសាស្រ្ត បច្ចេកវិទ្យា វិស្វកម្ម សិល្បៈ និងគណិតវិទ្យា ដែលជាជំនាញមានឧត្តមភាពខ្ពស់ ទាំងសម្រាប់សង្គមផ្ទាល់ និងសម្រាប់ការអភិវឌ្ឍសេដ្ឋកិច្ច និងការប្រកួតប្រជែងរបស់ប្រទេសកម្ពុជា ដើម្បីឈានទៅសម្រេចបាននូវចក្ខុវិស័យកម្ពុជាឆ្នាំ២០៣០ និង២០៥០។
បើយោងតាមមជ្ឈមណ្ឌលកម្ពុជា ៤.០ បច្ចេកវិទ្យាកាន់តែជឿនលឿនរបស់ពិភពលោក បានកំពុងធ្វើឱ្យវិស័យការងារមានការផ្លាស់ប្តូរយ៉ាងខ្លាំង ខណៈបច្ចុប្បន្នស្ថាប័ននានាកំពុងត្រូវការបុគ្គលិកដែលមានភាពច្នៃប្រឌិត អាចស្វែងរកគំនិតថ្មីៗ និងមានសមត្ថភាពអាចដោះស្រាយបញ្ហាបានយ៉ាងមានប្រសិទ្ធភាព។ ដូច្នេះ ការអប់រំស្ទែម និងបច្ចេកវិទ្យា ពិតជាមានសារៈសំខាន់ណាស់ក្នុងការពង្រឹងសមត្ថភាពសិស្ស-និស្សិត ឱ្យមានជំនាញសមស្រប សម្រាប់តម្រូវការការងារក្នុងសតវត្សរ៍ទី២១ និងអាចចូលរួមដោះស្រាយបញ្ហានានាក្នុងសង្គមបាន ដែលធ្វើឱ្យសេដ្ឋកិច្ចកាន់តែមានភាពប្រកួតប្រជែង៕
