ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មិនថាការប្រើប្រាស់ជីវិតនៅសាកលវិទ្យាល័យ ឬនៅកន្លែងធ្វើការនោះទេ ការធ្វើបទបង្ហាញទៅកាន់ក្រុមមនុស្ស ឬអ្នកចូលរួម ជាចំណុចដែលត្រូវឆ្លងកាត់ ហើយពិបាកនឹងជៀសផុតណាស់។ តាមរយៈគេហទំព័រ University of Sheffield បានពន្យល់អំពីសារៈសំខាន់ នៃការធ្វើបទបង្ហាញថា ជំនាញមួយនេះ ជំរុញឱ្យមនុស្សមានសមត្ថភាពក្នុងការចែកចាយគំនិត អភិវឌ្ឍន៍នៃការគិត រួមទាំងបង្កើនភាពជឿជាក់ចំពោះខ្លួនឯង និងជាជំនាញដែលមនុស្សស្ទើរតែគ្រប់គ្នាត្រូវការជាចាំបាច់។
ជំនាញនៃការធ្វើបទបង្ហាញទៀតសោត គេអាចអភិវឌ្ឍន៍បានដោយគ្រាន់តែត្រូវការប្រើពេលវេលា ការអនុវត្តមុនពេលចាប់ផ្តើមជាប្រចាំ និងការរក្សាភាពអត់ធ្មត់។ ប្រសិនបើអ្នកកំពុងតែចាប់ផ្តើម អនុវត្តន៍ជំនាញនៃការធ្វើបទបង្ហាញឱ្យកាន់តែប្រសើរ គឺមាន៤ចំណុចបន្ថែមនៅខាងក្រោមនេះ ៖
១.ស្គាល់ប្រធានបទខ្លួនឯង និងអ្នកចូលរួមស្តាប់ ៖ ជំហានដំបូងដែលត្រូវអនុវត្តន៍ជំនាញធ្វើបទបង្ហាញ គឺការគិតអំពីថា តើក្រុមមនុស្សបែបណាដែលអ្នកនឹងធ្វើបទបង្ហាញជូន ព្រោះការគិតគូរអំពីចំណុចនេះ បានរួមចំណែកបង្កើនការអធិប្បាយចំគោលដៅ ដោយហេតុថា ការធ្វើបទបង្ហាញត្រូវបង្កើតប្រធានបទជាក់លាក់ និងការអធិប្បាយទៅតាមប្រភេទមនុស្សថា តើជានិស្សិត ជាអ្នកធ្វើអាជីវកម្ម ឬអ្នកមានមុខងារអ្វីមួយ ពុំគួរប្រើប្រាស់វិធីសាស្រ្តដូចៗគ្នា គ្រប់ពេលរហូតនោះទេ។ អ្វីដែលត្រូវនិយាយ របៀបដែលគួរបង្ហាញ និងកម្រិតនៃការចែកចាយព័ត៌មានអាស្រ័យលើក្រុមមនុស្សដែលមកស្តាប់។ មុនចាប់ផ្តើម ត្រូវស្គាល់ខ្លួនឯង ស្គាល់ប្រធានបទ និងខ្លឹមសារដែលត្រូវចែករំលែក។
២.រក្សាតុល្យភាពពេលវេលាដែលមាន និងការអធិប្បាយ ៖ កំហុសដ៏ធំមួយដែលអ្នកធ្វើបទបង្ហាញបានប្រព្រឹត្ត គឺការបកស្រាយលឿនពេក និងខ្សោយពេករហូតពិបាកស្តាប់។ កំឡុងពេលធ្វើបទបង្ហាញ មិនចាំបាច់ត្រូវចេញអាការៈប្រញាប់ប្រញាល់ពេកនោះទេ ត្រូវថ្លឹងថ្លែងខ្លឹមសារ និងរយៈពេលឱ្យមានតុល្យភាពដោយខ្លួនឯង។ ការនិយាយមួយៗ ច្បាស់ៗ បង្ហាញពីទំនុកចិត្តលើខ្លួនឯង និងភាពទុកចិត្តបាននៃប្រធានបទដែលបានលើកមកជជែក។ យ៉ាងណា បើអ្នកនិយាយលឿនពេក អ្នកស្តាប់មួយចំនួន នឹងមានការពិបាកក្នុងការយល់អំពីអ្វីដែលអ្នកបានអធិប្បាយ។ វាក៏មានសារៈសំខាន់ដែរ ដោយត្រូវប្រាកដក្នុងចិត្តថា សំឡេងដែលកំពុងធ្វើបទបង្ហាញលឺៗ ហើយច្បាស់ៗ ដែលផ្តល់ភាពងាយស្រួលឱ្យមនុស្សនៅក្នុងបរិវេណបានស្តាប់ទាំងអស់គ្នា។ ការយកចិត្តទុកដាក់ចំពោះអ្នកស្តាប់ ឬយល់ពីតម្រូវការអ្នកចូលរួម មានភាពសំខាន់ណាស់ពេលធ្វើបទបង្ហាញម្តងៗ។
៣.ប្រើប្រាស់ភាសាកាយវិការ ៖ បើអ្នកចង់អភិវឌ្ឍន៍ជំនាញធ្វើបទបង្ហាញក្នុងរយៈពេលដែលលឿន ការប្រើប្រាស់ភាសាកាយវិការប្រកបដោយភាពស្វាហាប់ និងរួសរាយ អាចជាចំណែកមួយជួយបាន។ ជាក់ស្តែង នៅមានវិធីជាច្រើនទៀត ក្នុងការបង្ហាញនូវភាពជឿជាក់ដូចជា សូមកុំឈរនៅពីមុខមនុស្សស្មើពេក និងជៀសវាងការឈរឱបដៃ ឬដាក់ដៃជ្រែងហោប៉ៅ។ ព្យាយាមធ្វើឱ្យអ្នកស្តាប់ស្ថិតក្នុងបច្ចុប្បន្នភាព ស្របគ្នាទៅនឹងប្រធានបទដែលកំពុងបង្ហាញ។ ហើយប្រសិនបើក្នុងបរិវេណ ធ្វើបទបង្ហាញមានទីតាំងធំទូលាយ ការដើរចុះឡើងមួយៗ ដើម្បីបង្កើនរូបភាពគួរឱ្យចាប់អារម្មណ៍ បានរួមចំណែកកាត់បន្ថយភាពធុញទ្រាន់ទៅកាន់អ្នកស្តាប់ និងភាពទាក់ទាញរបស់អ្នកធ្វើបទបង្ហាញ។
៤. អនុវត្តន៍ម្តង ហើយម្តងទៀត ៖ វិធីដែលងាយស្រួលក្នុងការអភិវឌ្ឍជំនាញធ្វើបទបង្ហាញ គឺការអនុវត្ត ម្តងហើយ ម្តងទៀត។ សាកល្បងអនុវត្តន៍ជាមួយក្រុមតូចៗ និងនៅមុខកញ្ចក់ ទោះបីជាមើលទៅគួរឱ្យខ្មាសអៀនបន្តិចក្ដី ព្រោះការធ្វើបែបនេះ អាចជួយឱ្យលោកអ្នករកឃើញថា ចំណុចណាដែលអ្នកធ្វើបានល្អ ហើយចំណុចណាត្រូវកែប្រែបន្ថែម។ មួយវិញទៀតអាចប្រើប្រាស់ឧបករណ៍ថតសម្លេង នៅពេលសាកល្បងធ្វើបទបង្ហាញ ដើម្បីដឹងអំពីរយៈពេលនៃការធ្វើបង្ហាញនីមួយៗ ឬក៏រកឱ្យឃើញអ្វីដែលគួរផ្លាស់ប្តូរ និងអ្វីគួរបន្ថែម។ ប្រភេទទូរស័ព្ទឆ្លាតវៃ នាពេលបច្ចុប្បន្ននេះ អនុញ្ញាតឱ្យលោកអ្នកអាចអនុវត្តន៍មានប្រសិទ្ធភាពជាងមុន និងការស្វែងរកគន្លឹះកែលម្អខ្លួនបន្ថែម៕
