ការចិញ្ចឹមកូនក្នុងយុគសម័យឌីជីថល មិនមែនជារឿងងាយស្រួលនោះទេ។ សម្រាប់អាណាព្យាបាល កិច្ចការនេះ អាចជារឿងមួយដ៏លំបាក ជាពិសេសតាមឱ្យទាន់ និងដឹងពីរបៀបគ្រប់គ្រងហានិភ័យនៃបច្ចេកវិទ្យា ដែលកំពុងវិវត្តន៍ឥតឈប់ឈរ។ អ្នកជំនាញផ្នែកចិញ្ចឹមកូន លោកស្រីវេជ្ជបណ្ឌិត Jacqueline Nesi បានបង្ហាញពីគន្លឹះសំខាន់ចំនួន ៤ ដល់ឪពុកម្ដាយក្នុងការបង្កើតទម្លាប់វិជ្ជមាន សម្រាប់កុមារ ប្រើប្រាស់បច្ចេកវិទ្យាឌីជីថល។

១. ពន្យល់ និងបង្ហាញពីក្ដីបារម្ភ ៖ ឪពុកម្ដាយ ត្រូវពន្យល់កុមារ អំពីហានិភ័យនៃការប្រើប្រាស់បច្ចេកវិទ្យា។ ដោយឪពុកម្ដាយ អាចបង្ហាញពីក្ដីព្រួយបារម្ភ អំពីមាតិកាដែលគេឃើញ និងសកម្មភាព ប្រឈមហានិភ័យមួយចំនួន ដែលពួកគេអាចធ្វើនៅលើអនឡាញ។ លើសពីនេះ ឪពុកម្ដាយ ត្រូវណែនាំឱ្យកុមារស្វែងរកជំនួយ ប្រសិនបើពួកគេ ជួបបញ្ហានៅលើអនឡាញ។

២. បង្កើតច្បាប់វិន័យ ក្នុងគ្រួសារ ៖ ការបង្កើតច្បាប់វិន័យ ពិតជាសំខាន់ណាស់សម្រាប់កុមារ។ អាណាព្យាបាល ត្រូវកំណត់រឿងដែលកុមារគួរធ្វើ និងមិនគួរធ្វើ ដូចជា ការគម្រាមកំហែងអ្នកដទៃ ឬចែករំលែកទិន្នន័យផ្ទាល់ខ្លួនជាដើម។ លើសពីនេះ នៅក្នុងផ្ទះត្រូវបង្កើតតំបន់គ្មានបច្ចេកវិទ្យា ហាមឃាត់មិនឱ្យកុមារប្រើបច្ចេកវិទ្យា ជាពិសេសនៅក្នុងបន្ទប់គេង។ អ្នកជំនាញខាងលើបានសង្កត់ធ្ងន់ថា អ្នកអាណាព្យាបាលត្រូវកំណត់ និងគ្រប់គ្រងប្រភេទមាតិកា ដែលកុមារត្រូវតាមដាន។

៣. ដឹងពីការប្រើប្រាស់ឧបករណ៍បច្ចេកវិទ្យា របស់កូន ៖ ឪពុកម្ដាយ អាចនៅជាមួយកុមារ ដើម្បីស្វែងយល់ និងដឹងអំពីការប្រើប្រាស់បច្ចេកវិទ្យារបស់កូន។ អំឡុងពេលនៅជាមួយកុមារ អ្នកអាចមើលកម្មវិធីផ្សេងៗជាមួយគ្នា បន្ទាប់មកនិយាយពីគុណសម្បត្តិ និងគុណវិបត្តិនៃការមើលកម្មវិធីទាំងនេះជាមួយគេ។ សម្រាប់កុមារ ដែលអាចយល់ពីប្រភេទមាតិកា និងកម្មវិធីទាំងនោះ អ្នកអាចជំរុញឱ្យពួកគេបង្ហាញពីចំណាប់អារម្មណ៍ អំឡុងពេលជជែកគ្នា។

៤. បង្ហាញពីគម្រូល្អ នៃការប្រើប្រាស់បបច្ចេកវិទ្យា ៖ ដើម្បីណែនាំ និងបង្រៀនកុមារឱ្យដឹងអំពីទម្លាប់នៃការប្រើប្រាស់បច្ចេកវិទ្យា ដោយវិជ្ជមាន ឪពុកម្ដាយ ត្រូវបង្កើតទម្លាប់វិជ្ជមានសម្រាប់ខ្លួនឯងជាមុនសិន។ អ្នកនឹងពិបាក ណែនាំពួកគេ ឱ្យមានទម្លាប់វិជ្ជមាន ប្រសិនបើអ្នក មិនទាន់បង្កើតទម្លាប់វិជ្ជមានសម្រាប់ខ្លួនឯងបាន៕