ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កម្មវិធីប្រកួតប្រជែងបច្ចេកវិទ្យានវានុវត្តន៍ ដែលជាគំនិតផ្តួចផ្តើមដ៏លេចធ្លោមួយ ក្នុងការបំផុស និងផ្តល់ឱកាសដល់ និស្សិតសាកលវិទ្យាល័យដែលមានគំនិតសហគ្រិនភាព ដើម្បីបង្កើតដំណោះស្រាយសង្គមប្រកបដោយភាពច្នៃប្រឌិត ត្រូវបានសម្ពោធជាផ្លូវការកាលពីចុងសប្តាហ៍កន្លងទៅនេះ។
ឯកឧត្តមបណ្ឌិត ឈៀង វណ្ណមុនិណ្ឌ នាយកប្រតិបត្តិ នៃសហគ្រិនខ្មែរ (Khmer Enterprise) បានមានប្រសាសន៍ថា ទំនាក់ទំនងរវាងស្ថាប័នរដ្ឋ ឯកជន និងសាកលវិទ្យាល័យ ពិតជាមានសារៈសំខាន់ណាស់ ក្នុងការអភិវឌ្ឍប្រព័ន្ធអេកូឡូស៊ី នៃធុរកិច្ចឌីជីថលកម្ពុជាឱ្យកាន់តែរីកចម្រើនទៅមុខ។
បើតាមឯកឧត្តមបណ្ឌិត ឈៀង វណ្ណមុនិណ្ឌ កម្មវិធីប្រកួតប្រជែងនវានុវត្តន៍បច្ចេកវិទ្យា មានគោលដៅលើកកម្ពស់ចំណេះដឹងផ្នែកបច្ចេកវិទ្យា និងវិទ្យាសាស្ត្រ, កសាងសមត្ថភាពសហគ្រិនភាពក្នុងចំណោមនិស្សិតកម្រិតសាកលវិទ្យាល័យដែលអនាគត នឹងក្លាយជាស្ថាបនិកវ័យក្មេង ដែលមានគំនិតច្នៃប្រឌិត, និងជំរុញឱ្យមានការប្រើប្រាស់បច្ចេកវិទ្យា ក្នុងការចូលរួមជួយដោះស្រាយបញ្ហាសង្គម។
លោកសាស្ត្រាចារ្យបណ្ឌិត ឃៀង សុធី សាកលវិទ្យាលធិការនៃសាកលវិទ្យាល័យខេមតិច បានសង្កត់ធ្ងន់អំពីតួនាទីរបស់សាកលវិទ្យាល័យ ក្នុងការបណ្តុះបណ្តាលសហគ្រិនភាព និងអភិវឌ្ឍធនធានមនុស្សដែលមានផ្នត់គំនិតសហគ្រិន ដើម្បីចូលរួមដោះស្រាយបញ្ហា និងអភិវឌ្ឍកម្ពុជា។
ជាមួយគ្នានេះ សាស្ត្រាចារ្យបណ្ឌិត ឆែម គាតរិទ្ធី សាស្ត្រាចារ្យផ្នែកវិទ្យាសាស្ត្រ និងមនុស្សសាស្ត្រនៃសាកលវិទ្យាល័យខេមតិច បានលើកឡើងអំពីតួនាទីបច្ចេកវិទ្យា បញ្ញាសិប្បនិម្មិត និងសមត្ថភាពភាពសហគ្រិនថា ប្រព័ន្ធតិចណូឡូស៊ី ដូចជាបញ្ញាសិប្បិនិម្មិត មិនមានបញ្ញាតាមការបកប្រែពីភាសាអង់គ្លេសនោះទេ។ ហេតុនេះ អ្នកគ្រប់គ្រងធុរកិច្ច ត្រូវតែមានភាពម្ចាស់ការ ក្នុងការវិនិច្ឆ័យលើលទ្ធផលដែលចេញពីបញ្ញាសិប្បិនិម្មិត ដើម្បីប្រើប្រាស់វាដើម្បីជួយដល់សេដ្ឋកិច្ចប្រទេសជាតិ។
គួរជម្រាបជូនថា កម្មវិធីប្រកួតប្រជែងបច្ចេកវិទ្យានវានុវត្តន៍នេះ បានចាប់ផ្តើមធ្វើតាំងពីឆ្នាំ២០២៣មកម្ល៉េះ ក្រោមការចាប់ដៃគ្នារវាងសាកលវិទ្យាល័យខេមតិច និងសហគ្រិនខ្មែរ ហើយសម្រាប់រដូវកាលទី៣នេះ នឹងធ្វើឡើងក្រោមមូលបទ «ជំរុញការច្នៃប្រឌិតប្រកបដោយនិរន្តរភាព ៖ បំប្លែងគំនិតទៅជាការអនុវត្ត»៕
