ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បច្ចុប្បន្នមាននិស្សិតជាច្រើនបានជួបប្រទះនឹងបញ្ហាធ្វើការខុសពីជំនាញដែលពួកគេរៀននៅសាកលវិទ្យាល័យ ។ ទោះបីជា អាជីពការងារដែលកំពុងបំពេញ មិនស្របជាមួយជំនាញដែលរៀននៅសាលាទាំងស្រុងក៏ពិតមែន ប៉ុន្តែយ៉ាងហោចណាស់ ចំណេះនៅសាលាវាបានបំពេញបន្ថែមនូវចំណេះជំនាញមួយចំនួននៅកន្លែងការងារបាន ។ នេះជាការលើកឡើងរបស់ លោក ពេជ្យ មូន អតីតនិស្សិតដែលបញ្ចប់ការសិក្សាពីសាលាយោធាលើទឹកដីអាមេរិក ក្នុងកម្មវិធីជជែកពិភាក្សាស្ដីអំពី “ការធ្វើការសម្រេចចិត្តនៅក្នុងការសិក្សាដ៏ត្រឹមត្រូវមួយដើម្បីឱ្យអាជីពការងារល្អប្រសើរនាពេលអនាគត” ។
លោក ពេជ្រ មូន លើកឡើងថា ប្រសិនបើមិនទាន់អាចធ្វើការឱ្យស្របនឹងជំនាញដែលបានជ្រើសយក និងរៀននៅសាកលវិទ្យាល័យ គួរគិតត្រឡប់មកវិញថា អ្វីដែលរៀននៅសាកលវិទ្យាល័យវាគ្រាន់តែជាផ្លូវមួយ ដើម្បីចូលរួមចំណែក ជំរុញឱ្យយើងជានិស្សិតមានចំណេះដឹង មានបទពិសោធន៍បន្ថែម ដើម្បីបណ្តុះការគិតរបស់យើង មានភាពល្អប្រសើរមួយកម្រិតថែមទៀត ហើយអាចបំពេញកិច្ចការ ដែលកំពុងតែមានបច្ចុប្បន្ន បានកាន់តែល្អប្រសើរជាងមុន។
លោក ពេជ្យ មូន
“ទោះធ្វើការខុសជំនាញដែលរៀននៅសាកលវិទ្យាល័យ ប៉ុន្តែចំណេះដឹងក្នុងសាលាជាចំណែកបំពេញបន្ថែមដែលមិនអាចខ្វះបាន សូមរៀនឱ្យអស់ពីចិត្ត”
អតីតនិស្សិតយោធារូបនេះ បានលើកយកឧទាហរណ៍ករណីរបស់លោកផ្ទាល់ថា កំឡុងពេលដែលលោករៀនផ្នែកជាកងទ័ព គឺលោកនៅតែបន្តការសិក្សាផ្នែកទំនាក់ទំនងអន្តរជាតិ ឬការសិក្សាអន្តរជាតិ។ លោកបន្តថា នៅក្នុងការលើកជាឧទាហរណ៍ខាងលើ មានការចោទជាសំណួរថា ហេតុអ្វី លោករៀនផ្នែកទាហាន ប៉ុន្តែមិនព្រមបន្តសិក្សាជំនាញដែលទាក់ទងនឹងទាហាន ដូចជា យន្តហោះចម្បាំង ឬក៏ការប្រើប្រាស់នាវាមុជទឹកជាដើម និងផ្នែកផ្សេងៗទៀតជាច្រើន ។ យ៉ាងណាក៏ដោយ ការសម្រេចចិត្តបែបនេះ គឺដោយសារលោកបានសិក្សាឃើញថា បើបានដឹងកាន់តែច្រើនអំពីបរិបទពិភពលោក វាអាចជួយឱ្យលោកមានការសម្រេចចិត្តបានល្អ នៅពេលដែលលោកធ្វើការងារជាទាហាន។ ព្រោះកិច្ចការងារជាទាហានមួយចំនួន វាពាក់ព័ន្ធជាមួយបរិបទពិភពលោក ហើយបើដឹងថា កន្លែងមានសង្រ្គាម កន្លែងជួបគ្រោះ ឬហានិភ័យផ្នែកសន្តិសុខ នោះចំណេះដឹងផ្នែកសិក្សាអន្តរជាតិ ឬហៅថាកិច្ចការបរទេស អាចជួយលោកឱ្យសម្រេចចិត្តបានល្អ។
លោក ពេជ្យ មូន
“សម្រេចចិត្តបន្តការសិក្សាផ្នែកទំនាក់ទំនងអន្តរជាតិ ទាំងដែលខ្ញុំបានរៀនជំនាញកងទ័ព ទោះបីជំនាញទាំងពីខុសគ្នា ប៉ុន្តែវាអាចបំពេញភាពខ្វះចន្លោះគ្នាបាន”
លោកបន្ថែមនៅលើចំណុចដដែលថា ទោះបីជាយើងរៀនអ្វីក៏ដោយ យើងរៀនឱ្យអស់ពីលទ្ធភាពរបស់យើង ទោះបីជាត្រូវជាមួយការងាររបស់យើងក៏ដោយ ឬមិនត្រូវក៏ដោយ គឺត្រូវប្រឹងប្រែងឱ្យអស់ពីសមត្ថភាព ជាពិសេសអ្នកដែលរៀនផ្នែកទំនាក់ទំនងអន្តរជាតិ អ្នកគ្រប់គ្រង និងវិទ្យាសាស្រ្តនយោបាយជាដើម ដែលជំនាញទាំងនោះ មិនមានជំនាញដែលកំណត់ភាពច្បាស់លាល់ទេ ដូច្នេះបើមានការងារធ្វើបន្ថែមពីលើការរៀននៅសាកលវិទ្យាល័យ នោះនឹងអាចដឹងថា តើជំនាញណាមួយ? ដែលគួរតែផ្តោតសំខាន់សម្រាប់យើង ក្នុងការបន្តដំណើរទៅមុខ។
លោក ពេជ្រ មូន សង្កត់ធ្ងន់ថា ការចាប់ជំនាញអ្វីក៏ដោយ វាគ្រាន់តែជាផ្នែកមួយជួយពង្រឹងចំណេះដឹងរបស់យើងនៅក្នុងសាលា ។ ប៉ុន្តែបើអាជីពការងារ ខុសពីអ្វីដែលបានរៀន គឺត្រូវមានជំនាញអមបន្ថែមមួយទៀត ជាពិសេសរៀនបន្ថែមដើម្បីយកទៅសាងជំនាញដែលយើងកំពុងតែធ្វើការងារបច្ចុប្បន្ន។ ដោយឡែកបើសិនជាចង់ផ្លាស់ប្តូរការងារ ហើយត្រឡប់មកកាន់ជំនាញដែលកំពុងតែសិក្សា ឬរកឃើញថា ពិតជាចង់ធ្វើពិតប្រាកដមែន លោកជឿថា ឱកាសការងារនៅតែមាន ឱ្យតែយើងជាមនុស្សដែលមានសមត្ថភាពពិតប្រាកដ៕
