ឱកាស​ទទួល​បានការសិក្សា​ថ្នាក់​បរិញ្ញាបត្រ​ចំនួន២០​កន្លែង​នៅ​សាកលវិទ្យាល័យ​ក្រចេះ សម្រាប់​ឆ្នាំសិក្សា​២០២៤-២០២៥។ អាហារូបករណ៍​ផ្ដល់​ជូន​ការ​សិក្សា​ពី​គម្រោង អាហារូបករណ៍​អភិសន្តិបណ្ឌិត ស សុខា ថ្នាក់ជាតិ ក្រោម​ការ​ឧបត្ថម្ភ និង​គាំទ្រ​ពី​ឯកឧត្ដមអភិសន្តិបណ្ឌិត ស សុខា និង​លោកជំទាវ កែ សួនសុភី សហការ​ជាមួយ​និង​សាកលវិទ្យាល័យ​ក្រចេះ។

ជំនាញ​ដែល​អាហារូបករណ៍​ផ្ដល់​ជូន​រួមមាន ជំនាញ​វិទ្យាសាស្ត្រ​ដី និង​ដំណាំ, ជំនាញ​ការពារ​ដំណាំ និង​បច្ចេកវិទ្យា​ប្រមូល​ផល, ជំនាញ​វិទ្យាសាស្ត្រ​សត្វ និង​បសុពេទ្យ, ជំនាញ​វារីវប្បកម្ម, ជំនាញ​សេនាទិច និង​បង្កាត់ពូជ, ជំនាញ​ចំណី, ជំនាញ​វិទ្យាសាស្ត្រ​ចំណីអាហារ និង​អាហារូបត្ថម្ភ, ជំនាញ​វិស្វកម្ម​ចំណី​អាហារ, ជំនាញ​ភាសាអង់គ្លេស, និង ជំនាញ​គ្រប់គ្រង​អាជីវកម្ម។ សម្រាប់​ព័ត៌មានបន្ថែម​ទាក់ទង​នឹងព័ត៌មាន​សិក្សាជាមួយ​នឹងគ្រឹះស្ថានឧត្ដម​សិក្សា​តាមរយៈ ០១២ ២៨១ ៨៥៣ ឬ​ទៅ​កាន់​ទីតាំង​ផ្ទាល់​ដែល​ស្ថិត​នៅ ផ្លូវជាតិលេខ៧ ភូមិ​ស្រែស្ដៅ សង្កាត់​អូរឬស្សី ក្រុងក្រចេះ ខេត្តក្រចេះ។

លក្ខខណ្ឌ​សម្រាប់​បេក្ខជន​ក្នុង​ការ​ដាក់​ពាក្យ​អាហារូបករណ៍ ៖ ផ្ដល់​ជូន​ដល់​សិស្ស-និស្សិត​ទូទាំង​ប្រទេស បេក្ខជន​ដែល​មក​ពីខេត្តព្រៃវែង បាត់ដំបង និង​ខេត្ត​បន្ទាយមានជ័យ (ទទួល​បាន​អាទិភាព) ជាបេក្ខជន​ដែល​ធ្លាប់​បាន​ចូលរួម​សកម្មភាព​ការងារ​សង្គម ឬ​មាន​ជីវភាព​ខ្វះខាត (ទទួល​បាន​អាទិភាព) ត្រូវ​ភ្ជាប់​ជាមួយ​លិខិត​បញ្ជាក់​ថា បាន​ចូលរួម​សកម្មភាព​សង្គម ឬ​លិខិត​បញ្ជាក់​ភាពក្រីក្រ​ចេញ​ដោយ​អាជ្ញាធរ​មានសមត្ថកិច្ច។ ជា​មួយគ្នា​នេះ បេក្ខជន​ត្រូវ​បំពេញ​ពាក្យ​ស្នើសុំ ប្រវត្តិរូប​សង្ខេប សលាកបត្រ​ឯកត្តជន (មានគំរូ) សិស្ស-និស្សិត​ត្រូវ​បំពេញ​កិច្ចសន្យា​ខិតខំ​រៀនសូត្រ និង​គោរព​តាម​វិធាន​បទបញ្ជា​ផ្ទៃក្នុង​របស់​ក្រុមការងារ។ គួរ​ជម្រាប​ថា បេក្ខជន​ដែល​ស្នើ​ថ្នាក់​បរិញ្ញាបត្រ​ត្រូវ​មាន​សញ្ញាបត្រ​មធ្យមសិក្សា​ទុតិយភូមិ ឬ​សញ្ញាបត្រ​ដែល​មាន​តម្លៃ​ស្មើ។

ដើម្បី​ធ្វើ​ការ​ដាក់​ពាក្យ បេក្ខជន​អាច​ស្នើ​ពាក្យ​អាហារូបករណ៍​បាន​តាម​៣របៀប ដោយ​ទីមួយ បេក្ខជន​អាច​ដាក់ពាក្យ​ដោយ​ផ្ទាល់​នៅ​ទីស្នាក់ការ​អាហារូបករណ៍​អភិសន្តិបណ្ឌិត ស សុខា ដែល​មាន​អាសយដ្ឋាន​ផ្ទះលេខ៤៤ ផ្លូវលេខ៤៣២ សង្កាត់​ទួលទំពូងទី១ ខណ្ឌ​ចំការមន រាជធានី​ភ្នំពេញ ឬ​អាច​ទំនាក់ទំនង​ទៅ​កាន់ ០៩៦ ៥៩១ ៦៩៤២។ របៀប​ទីពីរ តាមរយៈ Google Form (https://forms.gle/9nhkGWXEhDbeMnVd7) អាហារូបករណ៍​អភិសន្តិភិបណ្ឌិត ស សុខា ដោយ​បំពេញ​ពាក្យ​ស្នើសុំ និង​ភ្ជាប់​ជាមួយ​នឹង​ឯកសារ​តម្រូវ Scan ឬ​ថត​ឱ្យច្បាស់។

របៀប​ទីបី តាម​រយៈ​ក្រុមការងារ​អាហារូបករណ៍​អភិសន្តិបណ្ឌិត ស សុខា ដោយ​បំពេញ​ពាក្យ​ស្នើសុំ និង​ភ្ជាប់ជាមួយ​នឹងឯកសារ​តម្រូវ Scan ឱ្យ​បាន​ច្បាស់ រួច​ផ្ញើទៅ Telegram របស់​ក្រុម​ការងារ​តាមរយៈ ៖ កញ្ញា លី សុគន្ធា (០១៧ ៦៨៤ ៨៨១) កញ្ញា វីន បញ្ញាធីតាវល័ក្ខណ៍ (០៩៦ ៥៤៩ ០៧៣៣) និង លោក ម៉ៅ រិទ្ធច័ន្ទសំណាង (០៩៦ ៥៩១ ៦៩៤២)។

ចាប់​ទទួល​ពាក្យ​ពីថ្ងៃផ្សាយ​ដំណឹងនេះ រហូត​ដល់ថ្ងៃទី១​ ខែធ្នូ ឆ្នាំ២០២៤៕