ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការស្រាវជ្រាវថ្មីនៅចក្រភពអង់គ្លេស បានរកឃើញថា របបអាហារ និងការធ្វើលំហាត់ប្រាណ អាចជួយទប់ស្កាត់ហានិភ័យ នៃជំងឺមេតាបូលីស ដោយកាត់បន្ថយបរិមាណជាតិខ្លាញ់ ដែលបង្កគ្រោះថ្នាក់នៅជុំវិញក្បាលពោះ។
ស្របពេលដែលមនុស្សគ្រប់គ្នាបានដឹងជាទូទៅថា ការប្រកាន់ខ្ជាប់របៀបរស់នៅល្អ អាចជួយមនុស្សរក្សាទម្ងន់បានល្អ អ្នកវិទ្យាសាស្ត្របានជំរុញការសិក្សាបន្ថែមទៀត អំពីសារៈសំខាន់ នៃទីតាំងដែលមនុស្សរក្សាទុកជាតិខ្លាញ់នៅលើដងខ្លួន។
ជាក់ស្ដែង ជាតិខ្លាញ់ក្រោមស្បែក គឺជាជាតិខ្លាញ់ដែលអាចចាប់ច្របាច់បាននៅក្រោមស្បែក ប៉ុន្តែជាតិខ្លាញ់ក្នុងពោះ ជាតិខ្លាញ់ក្រាស់ និងជាតិខ្លាញ់លាក់កំបាំង ដែលត្រូវបានរកឃើញនៅជុំវិញសរីរាង្គក្បាលពោះ ត្រូវបានគេជឿថា មានគ្រោះថ្នាក់។ វាមានទំនាក់ទំនងទៅនឹងហានិភ័យខ្ពស់នៃជំងឺបេះដូង និងជំងឺទឹកនោមផ្អែមប្រភេទទី២។
លោកវេជ្ជបណ្ឌិត Shayan Aryannezhad ជាអ្នកវិទ្យាសាស្ត្រសិក្សាអំពីបញ្ហានេះ និងជាអ្នកស្រាវជ្រាវនៅសកលវិទ្យាល័យ Oxford បានលើកឡើងថា «យើងបានរកឃើញថា ការរួមបញ្ចូលគ្នារវាងរបបអាហារល្អ និងការធ្វើលំហាត់ប្រាណ ឬសកម្មភាពរាងកាយត្រឹមត្រូវ គឺជាមធ្យោបាយដ៏មានប្រសិទ្ធភាពមួយ ដើម្បីធ្វើឱ្យប្រសើរឡើង មិនមែនត្រឹមតែទម្ងន់នោះទេ ប៉ុន្តែថែមទាំងបរិមាណ និងកន្លែងដែលជាតិខ្លាញ់ត្រូវបានស្តុកទុកក្នុងរាងកាយ មានភាពល្អប្រសើរផងដែរ។»
សម្រាប់ការសិក្សាដែលបានបោះពុម្ពផ្សាយនៅក្នុងទិនានុប្បវត្តិ JAMA Network Open អ្នកស្រាវជ្រាវបានតាមដានមនុស្សវ័យកណ្ដាលជាង ៧២០០នាក់នៅចក្រភពអង់គ្លេសក្នុងរយៈពេលជាមធ្យម ៧ឆ្នាំ។
ក្រុមអ្នកស្រាវជ្រាវរកឃើញថា អ្នកដែលញ៉ាំអាហារល្អ និងធ្វើលំហាត់ប្រាណបានច្រើន គឺមានទំនោរឡើងទម្ងន់យឺត និងមិនងាយឡើងទាំងខ្លាញ់ក្រោមស្បែក និងខ្លាញ់ក្នុងពោះ ហើយមានហានិភ័យជំងឺខ្លាញ់រំថ្លើមទាបជាងអ្នកដែលមិនបានផ្លាស់ប្ដូររបៀបរស់នៅរបស់ពួកគេ។
លោកស្រីវេជ្ជបណ្ឌិត Nita Forouhi ជាអ្នកវិទ្យាសាស្ត្រម្នាក់ក្នុងការសិក្សានេះ និងជាសាស្ត្រាចារ្យផ្នែកសុខភាពប្រជាជន និងអាហារូបត្ថម្ភនៅសាកលវិទ្យាល័យ Cambridge បាននិយាយថា ការរកឃើញនេះបានបង្ហាញថា ការកែលម្អរបបអាហារ និងការហាត់ប្រាណនៅវ័យកណ្ដាលមិនត្រឹមតែជួយសម្រកទម្ងន់ប៉ុណ្ណោះទេ ប៉ុន្តែថែមទាំងអាចកាត់បន្ថយហានិភ័យនៃជំងឺមេតាប៉ូលីស និងជួយឱ្យសុខភាពរឹងមាំនៅវ័យចាស់ផងដែរ៕
