ក្រសួងការងារ និងបណ្ដុះបណ្ដាលវិជ្ជាជីវៈកម្ពុជា និងមូលនិធិអភិវឌ្ឍន៍វិស័យអប់រំខេត្តអានហួយ ប្រទេសចិន កាលពី​រសៀល​ថ្ងៃទី២ កញ្ញា បានចុះអនុស្សរណៈនៃការយោគយល់គ្នា (MoU) ដើម្បីបង្កើតមជ្ឈមណ្ឌលបណ្ដុះបណ្ដាលជំនាញវិជ្ជាជីវៈ និង មជ្ឈមណ្ឌលឧត្ដមភាពទទួលស្គាល់ជំនាញកម្ពុជា-ចិន—រោងជាង ហួយជាំង (Huijiang workshop)។

តាមប្រកាសរបស់ក្រសួងការងារ និង​បណ្តុះបណ្តាលវិជ្ជាជីវៈ អនុស្សរណៈនេះ មានគោលបំណងពង្រឹងកិច្ចសហប្រតិបត្តិការរវាងភាគីទាំងពីរលើវិស័យអប់រំបណ្ដុះបណ្ដាលបច្ចេកទេស និងវិជ្ជាជីវៈ តាមរយៈមជ្ឈមណ្ឌលបណ្តុះបណ្តាល និងទទួលស្គាល់ជំនាញរួមគ្នារវាង កម្ពុជា-ចិន ដោយនឹងផ្ដោតសំខាន់លើការសហការរៀបចំកម្មវិធីសិក្សា ការបណ្តុះបណ្តាលវិជ្ជាជីវៈ និងការផ្លាស់ប្ដូរការសិក្សា ដើម្បីលើកកម្ពស់កម្រិតស្ដង់ដាអន្តរជាតិនៃការអប់រំបណ្តុះបណ្តាលវិជ្ជាជីវៈ។

ឯកឧត្ដម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ថា កិច្ចសហប្រតិបត្តិការនេះនឹងក្លាយជាចលករជំរុញដ៏សំខាន់បន្ថែម​ទៀតសម្រាប់កម្ពុជា ក្នុងការទាក់ទាញវិនិយោគិនពីបរទេស ជាពិសេសវិនិយោគិនចិន។ ឯកឧត្ដមបានបន្ថែមថា នេះជាការបោះជំហានបន្ថែមទៀតដើម្បីពង្រឹងទំនាក់ទំនងដ៏រឹងមាំដែលមានស្រាប់រវាងកម្ពុជា និងចិន។ តាមរយៈមជ្ឈមណ្ឌលនេះ ឯកឧត្តមជឿជាក់ថា សិស្ស និស្សិត និងគ្រូបណ្ដុះបណ្ដាលកម្ពុជា ចិន មានសមត្ថភាពកាន់តែប្រសើរស្របតាមការរីកចម្រើន និងការវិវឌ្ឍនៃបច្ចេកវិទ្យា។

ជាមួយគ្នានេះ លោកស្រី Ling Shuangying អគ្គលេខាធិការនៃសម្ព័ន្ធអភិវឌ្ឍន៍វិស័យអប់រំបណ្តុះបណ្តាលវិជ្ជាជីវៈអន្តរជាតិ ខេត្តអានហួយ ប្រទេសចិន បានសម្ដែងការដឹងគុណចំពោះកិច្ចសហប្រតិបត្តិការដ៏សំខាន់នេះ។

បើតាម​លោកស្រី Ling Shuangying មជ្ឈមណ្ឌលបណ្តុះបណ្តាល​ដែល​បង្កើត​ឡើង​រួមគ្នានេះ នឹងជួយពង្រឹងការបណ្ដុះបណ្ដាលជំនាញលើវិស័យសំខាន់ៗដូចជា ពាណិជ្ជកម្មតាមប្រព័ន្ធអេឡិចត្រូនិក បច្ចេកទេសយានយន្តអគ្គិសនី និង បច្ចេកវិទ្យាកុំព្យូទ័រ ឱ្យមានកម្រិតស្តង់ដារវិជ្ជាជីវៈខ្ពស់ ដែលអាចទទួលស្គាល់បានរវាងប្រទេសទាំងពីរ។

យ៉ាងណាក៏ដោយ​បើតាម ឯកឧត្តម ស៊ុន មេសា អ្នកនាំពាក្យ​ក្រសួងការងារ និងបណ្តុះបណ្តាលវិជ្ជាជីវៈ អនុស្សរណៈនេះ គឺជា​ការ​ចាប់ផ្តើម ដោយ​ឡែក​​កាលបរិច្ឆេទនៃការ​បង្កើតមជ្ឈមណ្ឌល​ដ៏មានសារៈសំខាន់នេះ នឹងធ្វើការ​កំណត់នៅពេល​ក្រោយ​ដែល​ក្រុមការងារទាំងពីរនឹងពិភាក្សាបន្ថែមទៀត។

ពាក់ព័ន្ធនឹងការ​បណ្តុះបណ្តាលជំនាញវិជ្ជាជីវៈនៅ​តាម​បណ្តាសាលា​ TVET ក្រោមឱវាទក្រសួងការងារវិញ បើ​តាម​ ឯកឧត្តម ស៊ុន មេសា បច្ចុប្បន្ន​នេះ ការ​បណ្តុះបណ្តាលជំនាញទាំង៤៥ កំពុងតែធ្វើ​ឱ្យវិស័យឯកជនពេញចិត្តជាខ្លាំង ដោយ​គេបានឃើញពីផលិតភាពរបស់សិស្សដែលមានជំនាញកាន់តែខ្ពស់ ហើយ​ជួយ​ទៅ​ដល់ផលិតកម្ម​របស់ពួកគេកាន់តែមានប្រសិទ្ធភាព។

ជាមួយ​គ្នានេះ ឯកឧត្តមក៏បានអំពាវនាវ​ដល់យុវជន​កម្ពុជា ក៏​ដូចជា​ប្រជាពលរដ្ឋ​ទូទៅ បន្ត​ចូលសិក្សា​ជំនាញបច្ចេកទេស​វិជ្ជាជីវៈ សម្រាប់អ្នកដែលមិន​ទាន់​មានជំនាញ ឬអ្នកដែលចង់ដូរជំនាញ ចង់ផ្លាស់ប្តូរបទពិសោធន៍ សូមទៅសិក្សា​នៅមជ្ឈមណ្ឌល ឬក៏សាលា​បណ្តុះបណ្តាលបច្ចេកទេស និងវិជ្ជាជីវៈនៅទូទាំង​ប្រទេស​ដោយ​មិនគិតថ្លៃ៕