ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
កាលពីថ្ងៃព្រហស្បត្តិ៍ (៣១ កក្កដា) ក្រសួងអប់រំ យុវជន និងកីឡា បានបើកកិច្ចប្រជុំបន្ទាន់មួយ ដើម្បីធ្វើការពិនិត្យឡើងវិញនូវអាទិភាពជួសជុល និងសាងសង់សាលារៀនដែលរងការខូចខាត ដោយការប៉ះទង្គិចគ្នារវាងកងទ័ពកម្ពុជា និងថៃ ដើម្បីបើកដំណើរការសាលារៀនឡើងវិញសម្រាប់បវេសនកាលឆ្នាំថ្មីនៅពេលខាងមុខ។
ក្នុងកិច្ចប្រជុំនោះ ឯកឧត្តមបណ្ឌិតសភាចារ្យ ហង់ជួន ណារ៉ុន បានជំរុញដល់គ្រប់ភាគីពាក់ព័ន្ធទាំងអស់ ត្រូវជួយគាំទ្រឱ្យសាលារៀនដែលរងផលប៉ះពាល់អាចបើកដំណើរការឡើងវិញសម្រាប់បវេសនកាលឆ្នាំថ្មីនេះ បានទាន់ពេលវេលា និងផ្តល់បរិយាកាសសិក្សាប្រកបដោយសុវត្ថិភាព និងផាសុកភាពជូនដល់សិស្សានុសិស្សរបស់យើង។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានឱ្យដឹងថា ក្រសួងអប់រំនឹងពន្លឿនការជួសជុលអាគារសិក្សាមួយចំនួនឡើងវិញក្នុងខេត្តព្រះវិហារ និងខេត្តឧត្តរមានជ័យ ដែលរងការបំផ្លិចបំផ្លាញដោយសារការបាញ់គ្រាប់ប្លោងរបស់កងទ័ពថៃ។ បើតាមលោកជំទាវអ្នកនាំពាក្យ គម្រោងជួសជុល និងសាងសង់អាគារសិក្សាឡើងវិញទាំងនោះ គឺជាការប្រញាប់បំផុត ដើម្បីធានាថា សិស្សានុសិស្សភៀសសឹកអាចវិលត្រឡប់ចូលរៀនវិញទាន់ពេលវេលាសម្រាប់បវេសនកាលឆ្នាំថ្មី។
គួរជំរាបជូនថា ក្នុងជម្លោះព្រំដែនរវាងកងទ័ពកម្ពុជា និងថៃ មានសាលារៀនមួយចំនួនក្នុងខេត្តឧត្តរមានជ័យ និងខេត្តព្រះវិហារ រងការខូចខាត ក្នុងនោះការខូចខាតមានដូចជា អគារសិក្សា ដាច់ខ្សែភ្លើង ខូចខាតម៉ាស៊ីនកូពី កុំព្យូទ័រ ទូរសម្ភារសិក្សា កង្ហារ សម្ភារសិក្សា តុ កៅអី និងក្តារខៀន ដោយសារការទម្លាក់គ្រាប់ និងការបាញ់ប្លោងចូលក្នុងទីធ្លាសាលារៀនរបស់កងទ័ពថៃ។
យ៉ាងណាក៏ដោយ តាមគូសបញ្ជាក់របស់ ឯកឧត្តមបណ្ឌិតសភាចារ្យ ហង់ជួន ណារ៉ុន ក្រសួងអប់រំ យុវជន និងកីឡា នឹងបន្តខិតខំប្រឹងប្រែង រកគ្រប់មធ្យោបាយ ដើម្បីធានាបាននូវការគាំទ្រ និងការអភិវឌ្ឍវិស័យអប់រំឱ្យកាន់តែប្រសើរឡើងនាពេលអនាគត ជាពិសេសតំបន់ដែលជាប់ព្រំដែន៕
